E FA’ALAUA’ITELE TAUOFOGA O GALUEGA UMA A LE MALO
Tusia: Tusiga Taofiga
Ua manino le fa’amalamalamaga a le Palemia, Tuilaepa Sailele Malielegaoi, e uiga i le fa’agasologa o galuega tauofo i so’o se atina’e tele a le Malo e fausia.
O lenei fa’amalamalamaga e tali atu ai i nisi o fa’asalalauga lē fa’avāea ua tu’uaia ai le fa’agasologa o galuega tauofo mo le malae va’alele i Ti’avea, e fa’apea e 7 miliona le tau atoa o lea galuega na tu’usa’o atu i se konekarate e aunoa ma se tauofoga na faia.
Peita’i na fa’asa’o e le Palemia ia lafoga ma ia fautuaina ai nisi o ala fa’asalalau o lo o latou fa’asalalauina nei tu’ua’iga sesē, ina ia fa’a’ete’ete i le so’ona fa’asalalauina o ni lafoga ogaoga ma le matuiā e lē fa’avāea auā e molia ai i le tulafono.
“O le galuega lenei ua mae’a ona fa’asalalauina fa’alaua’itele tauofoga mo se konekarate latou te faia lenei galuega tele, peita’i o la’u tau fa’alogologo atu i lau fesili ua tu’uina mai, e lē māma ia te a’u tu’ua’iga nei ua aumai, o le mea pitosili ona mata’utia le tu’ua’iga lea, ona o lea e saofa’i ai le Loia Sili a le Malo i totonu o le iloiloina o tauofoga nei na fai mo le malae va’alele lea.
“E lē tu’u māmaina la e a’u ma le Malo tu’ua’iga sese nei, a’o la’u lava tu’ualalo i auala o fa’asalalauga ia latou te fa’asalalauina tulaga nei, e lelei ona tou toe tilotilo lelei.
Saunoa Tuilaepa na āsia e le Komiti o Atina’e a le Kapeneta (CDC) le galuega lenei, ma ua mae’a fo’i ona ou fa’asalalauina fa’alaua’itele le vaai mamao a le Malo i le malae va’alele lenei i Ti’avea.
Talu ai ona o le ogaoga o tu’ua’iga ua fa’asalalauina fa’asaga i le Malo, na saunoa ai le Palemia e fa’apea;
“O le Aso Gafua o le a ou tapā ai le Ofisa o le Loia Sili, e lelei ona toe silasila toto’a i vaega nei, e lelei a ae aumai ni manatu fa’aālia ae sa’o, a’o le aumai lea ae sesē ona fetoai loa lea ma le tulafono.
“Ua fa’afia ea ona fa’asala ai le Samoa Observer i le aumai o ni fa’asalalauga tau fa’aleaga, ae lē fa’avāea, e lē māma la i le Ofisa o le Loia Sili le mea lea, leaga o lea e saofa’i ai le Loia Sili i totonu o le Komiti o Tauofoga e aofia ai ma le Matagaluega o Galuega, e vaai po’o sa’o le fa’atinoga o tulafono, ae po’o sa’o fo’i le tau atoa o le galuega ma lona fa’atupega, mo le tu’uina mai o le lipoti fa’ai’u i le Kapeneta mo la latou fa’ai’uga.
“A aumai se galuega e silasila atu le Malo o lo o i ai se fa’aletonu, e toe fa’afo’i lelei i le Komiti lenei mo le toe iloiloina pe toe fa’asalalau tauofoga po’o se i si fo’i i’uga talafeagai a le Komiti.
“O la’u lapata’iga i tv ma leitio ia latou te fa’asalalauina fa’amatalaga nei, ia matuā fa’a’ete’ete i mea fa’apenei aemaise pe a aumai i se tagata ua lauiloa le pepelo, o le tulaga lena e tatau ona matuā fa’a’ete’ete i ai.
