O SOU MANATU?
E ui e le’i āfea Samoa i le fa’ama’i o le Koviti -19, peita’i o lo’o fa’agasolo pea fuafuaga a le Malo i le tu’uina atu o fesoasoani mo le mamalu o le atunu’u e aofia ai le Fa’amāma Avega (Stimulus Package) a le Malo i lana Tala o le Tupe.
I le Fono Usu a le Fono Aoao Faitulafono a Samoa, le Palemene o lo’o usuia i lenei lua vaiaso, na lagalagā ai finagalo o nisi o Faipule, fa’atatau i fa’amanuiaga o lo’o maua e tinā ma tamā matutua ua penisione i le atunuu, pe le tatau ona fa’apafala fa’amanuiaga i le feoa’i fua i va’a i le va o Upolu ma Savaii ma le talaina fua o vailā’au ma fuālā’au mai le falema’i, ae si’itia le seleni maua mo le au penisione i masina ta’itasi.
Na fesiligia e le Savali finagalo o nisi o le mamalu o le atunuu fa’atatau i ia fesoasoani a le Malo, aemaise finagalo fa’aālia e nisi o Sui Faipule o le Palemene fa’atatau lava i lenei fa’amanuiaga mo le au penisione.
O le finagalo la lenei o nisi o le mamalu o le atunuu;
Mareta Afeaki
Saina
E fa’aleoina la’u fa’afetai i le Malo ona ua mafai ona a’e se tofā mo ni fa’amanuiaga e maua e le mamalu o le atunu’u ona o le Koviti -19. O le agaga o le fa’afetai, ona o lea ua fa’agasolo polokalame fesoasoani a le Malo, a’o lea e le’i o’o mai le fa’ama’i ia Samoa. O lenei fesoasoani a le Malo e pei ona folasia ma fa’alogologo atu i ai. Oka! matua’i 100% lea fuafuaga. O lea ua tatou molimauina le a’afiaga ogaoga o atunu’u tetele tamaoaiga o le lalolagi, aemaise atunu’u o lo’o aumau ai nisi o fanau Samoa sa fa’alagolago i ai i le tele o taimi i mea fai a aiga, ekalesia ma le nu’u, ona o le fa’ama’i, ma ua a’afia atu ai ma a latou galuega. Ae fa’afetai i le Malo o lea ua tali mai, pe telē pe la’ititi a’o lea ua minoi e fa’atino le latou alolofa moni ia Samoa. E o’o fo’i i le manatu o nisi o Sui Faipule o le Palemene i le fa’apafala o fa’amanuiaga e maua e matou ia e penisione, manaia o latou manatu e pei ona fa’alogologo atu i ai, auā o a’u le i si tagata ua penisione.
Pau a o lea, ua na’o se tu’ualalo i le Malo ma latou fuafuaga ua fa’ata’atia mai po ua foufou fo’i e fa’atino, ina ia toe taga’i ane i fa’amanuiaga mo matou ua penisione. E manaia ae fa’apafala le fa’amanuiaga lea e aga’i ai matou le au penisione i le motu tele i Salafai, auā o le taimi lenei ua seāseā toe aga’i atu i Savai’i, ae aumai na tupe e fa’aopo’opo i seleni e maua i masina ta’itasi e le au penisione. Ae fa’aauau pea fa’amanuiaga lea e maua i tulaga tau i le soifua maloloina.
Muliausolo Isa Isaako
Moata’a ma Fagalii
O le taimi lenei, a tatou oi atu i tatou fanau o lo’o aumau i atunu’u i fafo, a’o la e oi mai foi latou ona o le tulaga e pei ona i ai le Koviti -19 ma ona a’afiaga. O lo’u afafine i Ausetalia, toe lava o lona to’alua la e faigaluega, e tausia lo lāua aiga ma le la fanau. O lo’u aiga, o lea e fa’atau matou meataulima i le Flea Maketi i Savalalo, mo se seleni e tausi ai si ou aiga. E le’o toe tutusa aso, auā o le tulaga sa i ai muamua ae le’i sau le fa’ama’i, sa manaia tupe maua i fa’atauga i aso ta’itasi, ona o tagata malaga asiasi mai i Samoa, peita’i ua sau le fa’ama’i ma taofia ai le femalagaa’i o tagata, ma ua seāseā ai ona toe maua se tagata fa’atau i se aso.
Ae fa’afetai lava i le Malo ma le latou fuafuaga lea, o le a maua ai ia fesoasoani tāua mo le atunu’u. Afai o le fuafuaga lea a le Malo, fa’afetai o le a maua se i si fesoasoani mo le tausiga o matou aiga aemaise o matou fanau.
A’o le tulaga o penisione, ia te a’u lava ia o le tagata penisione, o lea ua manaia fa’amanuiaga lea ua maua i le taimi nei. Pe si’i le tupe maua a le au penisione pe leai, e leai lava se afāina o lea itu. Auā silasila fo’i, o le taimi nei o lea e malaga fua i Savai’i, a gasegase e taoto fua i le Falema’i, a fai talavai, e tala fua e aunoa ma se tupe totogi, ae afai ae ave’ese fesoasoani ia mo le aufai penisione ae gasegase se tasi, ae tu’u mai i le fanau e leai se seleni e ‘ave ai le matua i le falema’i, ona tele foi laia o le fa’aseā i le Malo. Ae afai e finagalo le Malo e fa’aopo’opo se isi tupe i le tupe maua a le aufai penisione, o le finagalo lena o le Malo. Ae fa’afetai tele lava i le Malo, ona o le tofā ua a’e e fa’asafua ai ia fesoasoani mo le atunu’u atoa.
Teleiai Pita
Samatau
E leai se fuafuaga a le Malo ou te iloa e fa’aletonu. O lea ua tatou va’ava’ai i nisi o fesoasoani o lo’o ofoina mai e isi Matagaluega ma Fa’alapotopotoga Tuma’oti a le Malo. O lea foi ua saputu mai nei fesoasoani, a lea e le’i o’o mai le fa’ama’i. Ou te talitonu, pei lava se ata tifaga lea ta te matamata atu i ai, ta te nofo ma galue i le fale, a’o lea e alu atu lava fa’amanuiaga a le Malo.
O le manaia lea o se Malo o le alofa i lona atunu’u. Lea ua fuafua nei fa’amanuiaga ona o le va’ai alofa i aiga o Samoa, i le tulaga pagātia o lo’o i ai nisi o atunu’u o lo’o feagai ma le fa’ama’i oti.
E leai se isi tala e sili atu, ua na’o le lagona o le fa’afetai. E o’o fo’i i le tulaga o penisione o nai tagata mātutua, ou te talitonu o lea lava e manaia le tulaga o lo’o i ai. Auā o lo’u talitonuga o pesione mo tagata mātutua o lo’o i ai, pau lava le mea e fa’aaoga i ai, na’o mea fa’ale – lotu ma nisi mea e mo’omia e i latou. Ae afai fo’i e finagalo le Malo ia fai sina si’itaga o penisione, ou te iloa e matuā fa’afiafiaina ai lava nai tagata mātutua, ae ia tumau pea ma isi fa’amanuiaga o lo’o i ai nei, pei o pasese i va’a ma fuālā’au, vailā’au ma le siakiina o le soifua maloloina i falema’i a le Malo o lo’o i ai nei.
Tunu Ah Leong
Vaitele-uta
Afai o le finagalo o le Atua o lo o tauala mai i le Malo, e aumai fa’amanuiaga mo le mamalu o le atunu’u, ia fa’apea ia ona fai. Auā o le mea moni, e leai se aiga o toe tutusa le tamaoaiga o i ai i le taimi nei, e o’o lava foi i lo’u aiga, to’atele a tatou fanau i atunu’u i fafo, ua lē toe faigaluega ona o le Koviti -19. Ae fa’afetai i le Atua ona o lo’o malutia pea Samoa i ona ā’ao alofa.
Ou te momoli atu foi le fa’afetai i le Malo, auā e ui e le’i o’o mai le fa’ama’i i totonu o Samoa, ae o lo’o fa’atino lava a outou galuega fesoasoani mo le atunu’u. Ou te iloa e i ai nisi o Matagaluega e pei ona i ai le Matagaluega o Fa’ato’aga ma Faigafaiva, ua amata fa’agasolo latou fesoasoani e ala i tiapula ma fatu la’au a’ina. O le olaga lava ia o le Samoa e ola galue, e pei ona maitau atu, o lo’o logologopuiali’I mai pea e le Malo tupulaga ma taulele’a ina ia aga’i e toe gagau le vao, lea ua tula’i mai fa’afitauli, o le taimi lenei ua tatau ona fua mai ni atina’e tau fa’ato’aga, ae o lea fo’i e tu’u mai lava le tauau o le Malo e ala i fa’amanuiaga ‘ese’ese mo le aufai fa’ato’aga, fa’afetai tele lava!
O lona uiga o lo’u talitonuga e lelei lava so’o se fuafuaga a le Malo, e aofia ai ma le tofā liuliu mo nai o tatou tagata ua matutua, ua ausia tausaga fa’atapula’a mo le fa’amanuiaga tau penisione.
Simo Sione
Satui Malufilufi
Ou te iloa o le galuega fa’atino lava lea a le Malo i taimi uma, taimi uma, o le fesoasoani mo le mamalu o le atunu’u. Ua tele fa’alauiloa ma polokalame o lo’o fa’agasolo e unaia ai pea le mamalu o le atunu’u i tulaga tau i atina’e mo le manuia o aiga. Lea ua sau le fa’ama’i lenei fa’ama’i oti, ua afāina ai galuega a nisi o fanau o lo’o tele ina fesoasoani i aiga.
E lagona le fiafia ona o fuafuaga alualu mamao a le Malo, lea e manuia ai ona tagata. Lea foi ua fa’ata’atia ana fuafuaga mo fesoasoani i aiga uma o Samoa ona o le Koviti – 19, e ui e le’i o’o mai le fa’ama’i i le atunuu, a’o lea lava e fa’agasolo ana polokalame ma fuafuaga, ina ia nofo tapena ai Samoa aoao. Ou te iloa mo penisione a le au mātutua, e i ai le manatu e tu’u atu pea i le Malo. Afai lava e silasila atu le Malo e lelei mo nai tamā ma tinā ua penisione, o le a le mea e saga tu’u umi ai, tatou ō e fa’atino ma tatou faia le tala a le isi toeaina, “O le o’o a i ai.”
Mikaele Tufua
Tulaele
I lo’u manatu i fesoasoani ia a le Malo, fa’afetai o lea ua a’e se tofā e tu’uina mai nei fesoasoani mo le atunuu lautele. A tatou tagataga’i fo’i i le tulaga e pei ona i ai le lalolagi i le taimi nei, matua’i a’afia lava lona tamaoaiga, ae fa’afetai i le Atua, ona o le malu puipuia pea o Samoa i lona alofa ma lona agalelei.
Fa’afetai i le Malo i le tofā tatala, e tu’uina mai fesoasoani mo tatou, mo le tausiga o aiga, aemaise o fanau aoga, fa’afetaia fo’i i le Malo, auā o lea fo’i e a’afia le tatou tamaoaiga, ona ua leai ni tagata asiasi maimoa mai fafo, ona ua tapunia femalaga’iga fa’avaomalo i le va o Samoa ma i si atunuu o le lalolagi, peita’i o lo’o taumafai lava e aumai sina fesoasoani mo tatou aiga. E o’o lava i penisione o nai tinā ma tamā mātutua, fa’afetai auā e le’o a’afia lava pe taofia le maua o penisione o nai tagata matutua, ona o le Koviti -19. Ae afai o le a se fuafuaga i lea fa’amanuiaga mo le au matutua, e manaia ae faapafala le fa’amanuiaga lea e malaga ai Savai’i, auā e i ai lo’u talitonuga, fa’atoā malaga lava le au mātutua pe afai ni fa’alavelave tau aiga, ae aumai lena seleni e fa’aopo’opo i luga o latou penisione maua i le masina, ae ia tumau pea le fa’amanuiaga mo le soifua maloloina.
