TEUTEUGA O LE FA’AVAE & TULAFONO TAU FA’AOFI 2020 – MATAGALUEGA O FAAMASINOGA
Vaega 2.
O le Vaega Lua lenei o le faatalatalanoaga ma lē sa avea ma Faamasino Sili o le Malo o Samoa, Afioga Tiavaasue Patu Falefatu Sapolu, lea ua faailoa manino ai lona finagalo i Teuteuga o le Faavae ma Tulafono Taufaaofi i le Matagaluega o Faamasinoga ma Mataupu tau Faamasinoga.
O le Vaega Lua lenei o le fa’aauauina o le faatalatalanoaga, ua saunoa ai Tiavaasue, o le a aofia uma aiā tatau a alii ma faipule ma le aiā tatau a tagata taitoatasi, i totonu o Teuteuga o le Faavae.
Ona oo mai lea o sa’u faamatalaga i le faafitauli ua tula’i mai. O le mea na tupu i le 1980 faato’a fai ai lava lea o se faamasinoga i luma o le Faamasinoga Maualuga, ua aafia ai le va faafeagai o le pule mamalu a alii ma faipule o se afioaga, ma aiā tatau a tagata taitoatasi o lo o aiaia i lalo o le Faavae.
Ma o le mataupu lenei, e mafua mai i le afioaga i Matautu Falelatai, ona ua faasala ma faate’a e alii ma faipule o le afioaga i Matautu Falelatai ia Tariu Tuivaiti, ona ua avea le Aso Sa, o se aso lea e fai ai galuega o ana pasi, ae tulata foi le mea o lo o fai ai ia galuega i le Falesa o le afioaga.
Atonu ua silafia le faaiuga na fai e alii ma faipule, ma fautuaina ai Tariu e taofia ia galuega, ae le i usitaia e Tariu, lea na faasala ai loa e alii ma faipule. Tagi mai loa Tariu i le Faamasinoga. O le iuga a le Faamasinoga, na malolo (faiaina) le pule a alii ma faipule o Matautu Falelatai, ae manumalo le aiā tatau a Tariu Tuivaiti. Le aiā tatau lea na aafia ai ii, o le saolotoga lea i mea o tapuaiga.
O le manatu o le Faamasinoga e tusa ai ma le Tulafono, o le saolotoga e tapuai ai se tagata i se tapuaiga e talitonu ia i ai, e aofia ai ma le saolotoga e te le auai i se tapuaiga, lona uiga e aofia ai ma le saolotoga e te le alu ai i se lotu i se Aso Sa. Ae pule a oe i au mea e fai.
O le saolotoga foi la lea. E mafai ai ona e Lotu i se lotu e le o se lotu kerisiano, e mafai ai ona e tapuai i se Ekalesia e lē talitonu i le Atua lea e talitonu i ai ma tapuai i ai le au kerisiano i Samoa nei.
E lautele le saolotoga lea. O le saolotoga foi lenei, e mafai ai ona e tapuai i se mea e le o se atua, pei o se laau, maa po o se papa maa, e pule lava oe. E lautele naua le saolotoga lenei. O le saolotoga la lena, na fetaui ma le pule mamalu a alii ma faipule o Matautu Falelatai, ia ma faaleaogaina le faaiuga a alii ma faipule.
Ona uma lea o le faamasinoga lea a Tariu Tuivaiti, faasolo mai loa ma isi faamasinoga i saolotoga o mea tau tapuaiga, ma na Manumalo lava le aiā tatau.
Ona alu alu lea pei ua le toe auamaia i luma o le Faamasinoga maualuga ia ni feeseeseaiga faapea. Ae ua mulimulita’i lava Faamasinoga o Fanua ma Suafa i faaiuga a le Faamasinoga Maualuga.
Ua silafia e le Faamasinoga o Fanua ma Suafa, le mea lea e i ai le tulafono, e pei ona fai ai faaiuga a le Faamasinoga Maualuga, ua maua lava la i o le tali i le Faamasinoga o Fanua ma Suafa.
Ma ou te talitonu, o le mea foi lena ua i ai le atunuu, ua silafia e alii ma faipule, a faasala se tagata, e pei ona i ai Tariu Tuivaiti, ae oo mai i le Faamasinoga le mataupu, e manumalo lava le aiā tatau a le tagata e to’atasi.
O le fesili la e tula’i mai i lo’u lava mafaufau, po o le mea lea tatou te mananao i ai, o le tutū lava o le pule a alii ma faipule ma le faamatai, ma aiā tatau a le tagata toatasi i lalo o le Faavae, ia tko (faiaina) le faamatai po o le faitau upu a le faamatai, ae manumalo ia le aiā tatau a le tagata e toatasi?
O le isi foi aiā tatau ua laga mai i luma o le Faamasinoga, o le aiā tatau lea i le mea e te alala ma e nofo ai. O lau aiā tatau e te feafioa’i ai i totonu o Samoa.
O le tulaga na laga mai ai le aiā tatau lea i se tasi o taimi i luma o le Faamasinoga, ona ua faatula’i ese e alii ma faipule i se tasi o afioaga, se taulealea ua le usitaia sala na fai e le nuu. Ua le totogia faasalaga, ma ua fai fai lava faapea loa le nuu o le a faate’a ona ua le totogia sala e pei ona faaiugafonoina.
Na talosaga mai le tagata lea i le Faamasinoga i lana aiā tatau. Ia o le tulaga lena lea e i ai nei, e pei ua manumalo lava le aiā tatau a le tagata taitoatasi i le va ma le faamatai, ona o lea ei totonu o le Faavae ia aiā tatau nei. Ae pei ua faatuatuana’i atu ai i le pule mamalu a alii ma faipule.
Ae silafia e le tatou atunuu, e taua aiā tatau, taua tele mo le agai i luma o Samoa i tulaga faaneionapo. Ma ou te talitonu foi, e le i talia fua ma tuuina i totonu o le Faavae e o tatou tuaa na faia le Faavae aiā tatau nei, pe ana latou le silafia, le taua mo tatou. Ae aua nei galo ia tatou, e taua foi le pule mamalu a alii ma faipule ma le faamatai.
Muamua, o le pule alii ma faipule lea e filemu ma maopoopo ai nuu ma afioaga. O le pule lea o lea a faamalosia le tulafono i totonu o nuu ma afioaga. E tele foi le fesoasoani a le pule a alii ma faipule, faapea le faamatai i le galuega faaleoleo. Tele taimi ua faapena ona sosola ai pagota i tua ma faigata i alii leoleo ona toe maua uma mai. Ae o ai e tula’i mai e fesoasoani? O alii ma faipule o nuu ma afioaga. A masalomia se tagata ua na fai soligatulafono ae le maua e leoleo lea tagata, e faatagisia lava le pule mamalu a alii ma faipule ma le latou fesoasoani e saili mai tagata nei. E tele la le aoga i le galuega faaletulafono a le pule mamalu a alii ma faipule.
Lona lua. O le taua o le pule a alii ma faipule, ona o le pule lea e tu ai le Lotu a Ekalesia i totonu o nuu ma afioaga. E lē tu le faamatai i luga o le Lotu. O le Lotu e tu i luga o le faamatai. A leai le faamatai, ua leiloa poo fea e tu ai le Lotu ma le Ekalesia. O le pule a alii ma faipule lea e mafai ai ona fausia falesa i totonu o nuu ma afioaga. O le pule foi lea e mafai ai ona fausia maota o faafeagaiga ma tausia faafeagaiga i totonu o nuu ma afioaga.
E tele la le sootaga i lo’u manatu, o le pule mamalu a alii ma faipule, ma le i ai o le Talalelei i totonu o Samoa. Atonu o lea lava e silafia e le tatou atunuu. O matai na taunuu mai ai le Talalelei i totonu o Samoa.
O le Lona Tolu. O le taua o le faamatai, ona e pei e faalagolago nisi o polokalame ma poloketi ma galuega fai a le Malo, i luga o le lagolago a alii ma faipule. E leai se totogi o alii ma faipule. Pei foi o le fesoasoani lea e fai e alii ma faipule i le galuega faaleoleo. Ou te le i faalogo lava o ave se totogi o alii ma faipule e tusa ma le latou fesoasoani. Ae lagolago mai lava. Lea lava e faaauau e oo mai lava i lenei taimi. Lea la afai o faaauau le tulaga o lo o i ai nei, faamata o le a se finagalo o si o tatou atunuu. O le a faaauau pea la le feto’ai o le aiā tatau a le tagata e toatasi e pei ona i ai i lalo o le Faavae, ma le faamatai, malolo (faiaina) le faamatai. E alu alu lava i’u lava ina faavaivai. Atonu o sa’u folasaga amata lena.
O lo’u iloa, e le aveesea aiā tatau i totonu o le Faavae. E tumau lava. E le aveesea. E pau le vaega lea ua i ai le suiga, o le tulaga lea afai e fai se faamasinoga i luma o Faamasinoga o Fanua ma suafa ae le faamalieina ai se finagalo o se itu faamasinoga, i se faaiuga a le Faamasinoga o Fanua ma Suafa, a o lea faaiuga o lo o aafia ai se aiā tatau a se tagata e toatasi, o lo o i lalo o le Faavae, o lea e mafai lava ona talosaga for review i le Faamasinoga Maualuga. O le suiga la, o le a lē mafai ona toe talosaga i le Faamasinoga Maualuga, ae o le a talosaga i le Faamasinoga Lona 3 lea ua faatula’i mai, o le Faamasinoga o Fanua ma Suafa. A o aiā tatau ia ei totonu o le Faavae, e tumau lava. O le isi la suiga i la’u maitau atu i ai, i le taimi nei a tutū faatasi le pule a alii ma faipule ma se aiā tatau a se tagata e toatasi i luma o le Faamasinoga, e malolo (faiaina) lava le pule a alii ma faipule. Aisea? Leaga o lea e aiaia i totonu o le Faavae le aiā tatau a le tagata e toatasi. O le mea lea o le a sui nei, o lea o le a ave i le Faamasinoga lea Lona 3 o Fanua ma Suafa, se feseeseaiga faapea e tula’i mai e aafia ai le aiā tatau a le tagata e toatasi ma le pule a alii ma faipule. O iina e iloilo ai e le Faaasinoga Lona 3 o Fanua ma Suafa vaega uma o mataupu, le aiā tatau a le tagata e toatasi, pule a alii ma faipule po o communal rights. O le a okomeki ona malō aiā tatau a tagata taitoatasi, e pei ona i ai i le taimi nei i lalo o le Faavae.
O le a tutusa uma aiā tatau nei e lua. Ae o le a taoto i le Faamasinoga e faia le iloiloga ma le fuafuaga, poo fea e taoto i ai le amiotonu o le mataupu.
O le a lē toe okomeki ma malo le aiā tatau a le tagata e toatasi, ae o le a iloilo faatasi aiā tatau ma le communal rights po o le pule a alii ma faipule, ona fuafua lea po o lea le faaiuga amiotonu e tatau ona i ai. E pei ona fai atu le faataitaiga lea. O le taulealea na faasala e le nuu ona o soligatulafono, ae le totogia ana sala. E faate’a e le nuu ae tagi mai i le Faamasinoga.
O le mea la lea o le a i ai nei. Ou te masalo, o ituaiga tagata faapea, o le a lē toe alofaga i lalo o le aiā tatau lea e te pule lava oe po o fea e te alala ma e afio ai.
