ULUA’I MASINI O SU’ESU’EGA O LE KOVITI – 19 MA LE FA’AMA’I MANU I SAMOA
Tusia: Taunuuga Toatasi
Ua taulimaina e le Fa’alapotopotoga o Su’esu’ega Fa’asaienisi a Samoa (SROS) le masini fa’apitoa (Real Time – Quantitative Polymerase Chain Reaction (RT – wPCR)) e sailia ai fa’ai’uga o le fa’ama’i o le Koviti -19 aemaise o le fa’ama’i manu – African Swine Fever (ASF).
O le tau atoa o lenei masini e $795,451 tala ma sa fesoasoani mai ai le Malo Aufa’atasi (UNDP) ma le UNICEF i le faigapa’aga ma le Malo Samoa.
O le Minisita o le Matagaluega o Fa’atoaga ma Faigafaiva, Lopao’o Natainielu Mua na fai ma sui o le Malo e taliaina lenei fesoasoani tāua mai le Malo Aufa’atasi ma le UNICEF.
Saunoa Lopao’o e fa’apea;
“E lagona le fa’agae’etia i pa’aga fesoasoani a le tatou Malo, ona o ua taulimaina e le SROS lenei masini aogā tele.
“Tatou fa’afetaia le Atua ona o lona alofa ma loga agalelei ia Samoa, lea e le’o a’afia i le fa’ama’i e pei ona vevesi ai le lalolagi.
“E ui e le’i afea Samoa i lenei fa’ama’i, ae o le agaga o le fa’afetai, ona o lea ua i ai le masini e fa’atino ai su’esu’ega ma maua vave ai fa’ai’uga o su’esu’ega e fai i se taimi vave.”
Fa’ailoa e Lopao’o, o le a galulue fa’atasi le SROS ma le Matagaluega o le Soifua Maloloina i le fa’atinoina o su’esu’ega fa’apitoa mo i latou e ono masalomia ua a’afia i le vairasi o le Koviti – 19.
“Ua mae’a fo’i ona logoina le Faatonu Sili o le Soifua Maloloina, a mana’omia le masini, ona omai lea e fa’aāoga auā e tāua tele i le soifua o tatou tagata.
O le masini lenei e pei ona fa’aālia e le Minisita, ina ua a’afia le lalolagi i le Afican Swine Fever o meaituāolō, o Samoa le atunu’u muamua o le Pasefika na galulue fa’atasi ma le FAO i le tau fofōina o le fa’afitauli.
“Alu a’i, alu a’i fe’utana’iga i le tausaga na se’i mavae, o’o mai le 2020, ae o’o mai loa ma le Koviti 19.
“O le masini sa matou sa’ilia, o le masini e test ai le ASF, ae ina oso mai le Koviti – 19, na tupu a’e ai se manatu i le Pulega a le SROS e tatau ona saili se masini e mafai ona fa’atino ai su’esu’ega o le Koviti – 19 fa’atasi ai ma su’esu’ega o le fa’ama’i o meaituāolō.
“Lea ua i ai le masini lenei e pei ona tatou molimauina le fa’amoemoe o le asō, o le masini mo fa’ai’uga o su’esu’ega o le Koviti – 19, ma mafai ai ona maua fa’ai’uga o su’esu’ega o le fa’ama’i o meaituāōlō.”
Na fa’afetaia fo’i e le Minisita le Malo Aufa’atasi fa’apea le UNICEF ona o le taliaina o le talosaga a le SROS.
I le asia ai e le auvala’aulia o le fale o le a fa’aaogaina e fa’atautaia ai galuega su’esu’e e i ai le masini lenei, na saunoa ai le Ofisa Sili o Pulega a le SROS, Seuseu Dr.Joseph Edward Tauati e fa’apea, e lua vaiaso o le a fa’agasolo ai a’oa’oga toe fa’amanatu mo saienitisi a le SROS mo le fa’aaogaina o lea masini.
O ia a’oa’oga o le a a’oa’oina ai saienitisi e to’aono (6) o lo o galulue i le SROS, e le gata o a’oa’oga tautala (theory) ae fa’apea fo’i i galuega fa’atino (practical), ma o le a fa’atautaia ia a’oa’oga e i latou ua lava le tomai ma agava’a i le fa’aaogaina o lenei masini.
E o’o mai i le taimi nei, o lo’o saogalemu pea Samoa mai le Koviti 19, peita’i o le i ai o lea masini, na saunoa ai Seuseu, o le a fesoasoani tele i le fa’atinoga o su’esu’ega ma itu uma e tapenapena ai Samoa mai le ono a’afia ai i le Koviti – 19.
