A MAUA’A LE FA’AVAE E MAUSALĪ FO’I LE FALE
Tusia: Taunuuga Toatasi
E fa tusi ta’iala o alagāoa mo a’oa’oga, ua fa’alauiloa aloāia e le Matagaluega o Aoga Ta’aloga ma Aganu’u i le vaiaso ua mavae, e fesoasoani ai i le si’itia maualuga o le fa’atinoga o galuega a Faiaoga mo le a’oa’oina o fanau aoga a Samoa.
O nei tusi ta’iala e fa e aofia ai le Tusi o Mataupu A’oa’oina mo Aoga Amata, tusi Tomatau mo Faiaoga ma Aoga Amata, Ta’iala mo A’oa’oga Sauo’o ma le tusi le Samoa for Tomorrow Volume 1.
O le sini autū o nei tusi ta’iala ia saga poupou ai le auaunaga a faiaoga, mo le si’itia o le silafia ma le malamalama i metotia ‘ese’ese e a’oa’oina ai le fanau i mataupu ta’itasi o lo o a’oa’oina i totonu o potu aoga.
Saunoa le Ofisa Sili Lagolago o le Matagaluega o Aoga, Ta’aloga ma Aganu’u (MESC) ia Mamea Vau Peseta e fa’apea;
“O lea ua tino mai galuega lelei ma fuafuaga alualu mamao a le Malo, tauala atu i le Matagaluega ma ana pa’aga fa’alea’oa’oga, i taumafaiga ina ia nofofale i finagalo ma manatu o tagata uma le tāua o le a’oa’oina o fanau.
“Po’o le tama po’o le teine, o le a fo’i lona matua, o lō tatou nafa ma lā tatou matafaioi tauave lea, o le tapenaina ia lava tāoso fanau mo le lumana’i.”
“O le fa’amoemoe ia ‘aua ne’i ola falōlō ma fememea’i fanau.”
O le tusi o mataupu a’oa’oina mo Aoga Amata ma le tusi Tomatau mo faiaoga o Aoga Amata, o alagāoa ia ua tufatufaina, ina ia mafai ona fa’aaogā e faiaoga o Aoga Amata mo aoga a le fanau.
O le Ta’iala mo A’oa’oga Sauo’o, o tusi ia e ta’iala ai galuega a faiaoga, o lo o latou a’oa’oina fanau e i ai a’afiaga tumau o le soifua, a’o le tusi o le Samoa for Tomorrow Volume 1, ua tu’ufa’atasia mo Kolisi maualuluga, e le gata e fa’aaoga e faiaoga, ae fa’apea fo’i i tamaiti aoga.
O ia alagaoa e pei ona saunoa Mamea, sa i ai le fuafuaga e fa’alauiloa i se taimi ua tuana’i, peita’i, talu ai o tulaga e pei ona i ai le lalolagi i le taimi nei, na fa’atuai ai ona fa’alauiloa.
I le fautuaga malosi a le Matagaluega o Aoga mo faiaoga e pei ona fa’aleoina e Mamea e fa’apea;
‘O le tatalo a le Matagaluega ma ana pa’aga, ina ia aogā ma fa’aaogā lelei ia alagaoa, auā outou faiva alofilima mo le a’oa’oina o fanau.
“Aua ne’i galo iā te tatou le tāua o lō tatou vala’auina o le avea ma faiaoga, i le fa’afaileleina o le lumana’i o Samoa mo a taeao.”
