$4 MILIONA MO LE AUFAI PENISIONA A LE SNPF
Tusia: Tusiga Taofiga
E lata i le $4 miliona le vaega tupe ua fa’ata’atia e le Malo, mo le fa’atupeina o fa’amanuiaga e fa’asafua atu i tinā ma tamā mātutua ua penisione, mo le Vaega lua o le Fa’amāma Avega a le Malo auā le Koviti – 19 e tusa ai ma lana Tala o le Tupe o lo’o fa’agasolo nei.
O lenei auaunaga a le Fa’alapotopotoga o Fa’aputugatupe mo le Lumana’i Manuia o Samoa (SNPF) na amata fa’avaeina mai i le tausaga e 1990, ma ua fesoasoani malosi mo tina ma tama ua ausia le 65 tausaga le mātutua i totonu o le atunuu, e i ai fa’amanuiaga tau seleni i masina ta’itasi fa’atasi ai ma le talafuaina o vailā’au ma fuālā’au, siakiina fua o le foma’i e aofia ai ma le malaga fua i le va o Upolu ma Savaii e leai se totogi.
I le saunoaga a le Minisita o le Matagaluega o Tupe, ia Sili Epa Tuioti, na ia fa’ailoa ai e $1.1 miliona le seleni ua fuafua e faasoa atu i lea fa’amanuiaga, tusa lea ma le ta’i $100 mo le au penisione i le masina na’o Iulai o le tausaga nei 2020.
Peita’i e $145 le tupe maua masani a tagata mātutua i masina ta’itasi a’o lea o le a toe fa’a’opo’opo i ai e le Malo le $15, o lona uiga o le a $160 le seleni maua a so’o se penisione i masina uma amata atu ia Iulai 2020.
Ma o le tau atoa o lenei si’itaga fou o le a i ai e $2.7 miliona tala.
I le masina fou ia Iulai lava ia, o lona uiga o le a maua fa’atasi e le au penisione le $100 fa’a’opo’opo mo le fa’amāma avega a le Malo, a’o le $15 mo le si’itaga fou o penisione, i lona aotelega e $260 le seleni atoa o le a mafai ona maua e so’o se tasi ua penisione i le atunuu, pe a aulia le masina fou ia Iulai 2020.
Saunoa Sili, o lenei fa’amāma avega o le a fesoasoani malosi, i le au penisione, auā le tulaga o le fa’asoa i lenei vaitau pagātia o i ai le lalolagi ona o le Koviti – 19, ua a’afia uma ai le tamaoaiga o le lalolagi atoa.
Mo le silafia e le’i galoma malie atu fo’i le isi fa’amāma avega a le Malo mo le au penisione e aofia ai le ta’i $300 fa’a’opo’opo, a’o lenei ua toe fa’amanuiaina fo’i i le isi ta’i $100 fa’a’opo’opo mo le masina fou ia Iulai.
O le naunauta’iga o le Malo e pei ona fa’ailoa e le Minisita, ia fa’aauau pea ona tu’uina atu le tauau o le Malo, e fesoasoani ai i le tulaga tau tamaoaiga o le atunuu e le gata o Samoa aoao, a’o aiga ta’itasi, ma o le tasi lea o fa’amamafa a le Malo ma le Vaega Fa’aupufai a le HRPP, ia tuliloaina pea le si’itia o fa’amanuiaga ‘ese’ese e fa’asāfua atu mo le atunuu atoa, i so’o se auaunaga, e aofia ai tagata mātutua, oi latou e i ai a’afiaga tumau o le soifua, o tulaga i a’oa’oga, soifua maloloina, fa’ato’aga, tagata faigaluega ma galuega fa’a’opo’opo ma isi.
Fa’ailoa fo’i e le Minisita, o le fa’alauiloa i le fa’ai’uga o le vaiaso nei, se tasi o fa’amanuiaga o lo’o tulimata’i pea e le atunu’u lautele, e ala i le ponesi o le pasene a le SNPF i le amataga o tausaga fa’aletupe i tausaga ta’itasi.
