Matagaluega o le Va i Fafo (16 IULAI 2020); E fautuaina le mamalu ole atunuu oloo tumau pea, le le tatalaina o tuaoi faavaomalo o atunuu uma ole Pasefika faapea Samoa, Ausetalia ma Niu Sila.
O malaga a vaalele oloo faaauauina pea i vaiaso taitasi ale Ea Niu Sila oloo fesoasoani lea ile aumaia o oloa moomia vave ae maise oloa tau le soifua maloloina faatasi ai ma taumafaiga ina ia toe vave faafoi mai I fanua o le 2,000 tagatanuu Samoa ma e nonofo i Samoa.
E faaopoopo iai ma le isi 400 tagata Samoa oloo faatalitali avanoa e toe foi mai ai mai isi atunuu ole lalolagi e ese mai ia Niu Sila.
O nei tagata e aofia ai tama ma teine sikolasipi ua mae’a aoaoga faapea ai tama taaalo faakonekarate I atunuu o Europa faapea seila sa galulue I vaa lau pasese peitai ua mae’a nei konekarate faigaluega.
Ona ole faamuamua oloo ave ile aumaia o tagata e nonofo I Samoa ini auala saogalemu, ole ala lea ole le mafai ona tatala ni avanoa e faimalaga mai ai ona oni faalavelave e pei o maliu, faaipoipoga, faaulufalega poo le fia asiasi mai i nisi o aiga o loo gasegase.
Ole faaauauina ole le mailoa ole tulaga o iai le faamai ae maise ai foi ole naunautaiga ole atunuu ina ia faasaoina pea Samoa mai le pepesi ai ole Koviti 19, e maitauina le ono faateleina o puipuiga ma faigata o femalagaiga ile lumanai.
Tatou tatalo ma faatuatua pea ile alofa ole Atua ia vave ona iai se faamama avega o nei faafitauli.
