(Aso Faraile 24 Iulai, 2020 6:00pm)
Sūsū lau Susuga Siaosi Salesulu
Afifio Minisita o le Kapeneta
Afifio Sui o Malō mai Fafo
Mamalu o le Auvalaaulia,
O lea ua tatou patipatiā ma molimauina le tatalaina o le Ofisa o le Kirikiti Faavaōmalō a Samoa e pei ona i ai lenei afiafi. O lenei galuega sa faatupeina e le Kirikiti a le Lalolagi (International Cricket Council).
Sa faatinoina lenei galuega e le Kamupanī fau Fale a le RPA Design and Build (Paepae Aiono) i le tinoitupe e $288,000 Talā.
O le Kirikiti o se tasi lenei o taaloga ua maitauina le solosolo lelei o lona atina’eina ma ana galuega fai.
O le taimi lenei o lo o tulaga valu (8) Samoa i le faasologa o atunuu e ivasefulu ma le fa (94) o le lalolagi o lo o tāua o Associate Members i lalo o le fa’amalu a le Kirikiti a le Lalolagi.
O lenei tulaga ua mafua ona o le lelei o le atina’eina o le taaloga i ona vaega uma, e pei foi ona tatou vaaia le faatuputupulai’a o tupulaga laiti, tupulaga talavou ma le au matutuā e fiafia e tatalo i lenei taaloga.
O lea faatoa uma atu taaloga a le Pasefika i le tausaga ua mavae, lea na manumalō ai le au a Tamaita’i i le pine auro ma le au a Alii i le pine apa memea. O taaloga foi a le Pasefika I le tausaga e 2015 na manumalō ai foi le au a Tamaita’i i le pine auro.
O le fa’atulagaina o au a Tamaita’i i le lalolagi (World Ranking) i le T20 Format o lo o tulaga sefuluvalu (18) ai Samoa mai au a atunuu e selau ma le lima (105) o lo’o i lalo o le fa’amalu a le Kirkiti a le lalolagi.
O Taaloga o se tasi lea o atina’e ua telē lona sao i le tamaoiga o le atunuu. O le ala foi lea o le lagolagoina malosi o lenei atina’e e lo tatou Malō ona e tele seleni e maua ai. E pei foi ona fausia fale ta’alo ma faaleleia malae ta’alo ina ia faapenā ona unai’a alii ma tamaita’i e
fiafia i taaloga e koleni ma maua ai avanoa e taaalo ai faakonekarate ma faasikolasipi i atunuu i fafo e fesoasoani mo so latou lumana’i manuia.
Ae le gata i lea o le tele o tupe maua mai i tagata tafafao mai fafo (Sports Tourism) pe a oo ina faatino tauvaga (competitions) po’o ni ta’amilosaga (tournaments) i totonu o lo tatou atunu’u, auā e manuia uma ai tagata ma pisinisi pei o le au fai faatoaga fualaauaina (esi/avaoka/kapisi/tamato), fai faatoga (talo/fai), pisinisi gaosi mea taulima (handicrafts), fale aiga, taavale la’u pasese, faletupe, faleoloa, mata’aga, faletalimalō ma isi.
O Taaloga foi o lo o fesoasoam tele i le tau faaitiitia o faama’i le pipisi (toto maualuga, fatu ga’o, ma’i fatu, suka). aemaise le faatoātoāina o le vevesi (stress) o le mafaufau.
Ia alofa le Atua ma saga faamanuia i le atina’eina o Taaloga i totonu o si o tatou atunu’u.
Soifua!
