LAAU TOTŌ MO TOGAFITIGA FA’AFOMA’I
Tusia: Asenati Taugasolo Semu
Ua silia ma le 100 laau totō e faaaoga mo le togafitiga o gasegase ua totōina e le Faalapotopotoga o Suesuega Faasaienisi a Samoa (SROS) i Nafanua.
O lea faamoemoe taua na faalauiloa aloaia ma tatala aloaia i le Aso Faraile ua mavae, lea foi na faalauiloa ai ma le Fuafuaga Autasi 2020-2024 a le Faalapotopotoga.
O ia galuega tetele na saunoa ai le Minisita o Faatoaga, Lopaoo Natanielu Mua, ua faafetaia e le Malo tauala i le fono a le Palemene o lo o usuia nei.
“Sa tele saunoaga i totonu o le Palemene i galuega ma le sao o le ofisa suesue (SROS) i le tatou atunuu,” saunoa ai Lopaoo.
“Ua folasia i luma o le Palemene galuega lelei o fai i le SROS.”
Na saunoa Lopaoo, na manatu sui o le Palemene, na o oloa gaosi o lo o galulue ai le SROS, a o lea foi ua iloa, o lo o agai foi galuega i le faia o suesuega mo vailaau faafomai e faaaoga ai laau Samoa mo togafitiga.
“O le mea lea ou te fiafia e faailoa atu le agaga faafetai o le Malo ia tou galuega.”
Na faafetai foi e le Minisita le faalauiloaina o le Corporate Plan po o le Fuafuaga Autasi a le Faalapotopotoga, ma ia saunoa, ua atagia ai vaega uma nei o suesuega ma vaega e pei o technical services, totoina ma le vaega o seleselega o laau, siosiomaga ma le malosiaga faafouina, auaunaga faainisia, auaunaga faale tupe, vaega ua faamaonia mai le Kapeneta tau faatoaga ma suesuega laau toto, ma le Nafanua Pure Products Company Limited mo oloa gaosia.
“Ua aloaia foi le aumaia o suesuega o laau totō mai lalo o Vaega o Faatoaga i le tatou fale suesue (SROS). Taua ia o le tulaga lea o le suesuega o laau mo le fofōina ma le togafitiga o ma’i.
“O le taimi muamua lenei ua tatou molimauina ai ma le agaga faafetai ma le fiafia ua amata ona tino mai le ogaeleele lenei o se mea o lo o faia ai ni galuega taua faasaienitisi.
“O le mea la lea ou te fai atu ai e ese lo’u mitamita i ai. Faamalo atu ai i le alii pule, le pulega ma outou uma le galulue. Ua tele le tou sao i le taumafaiga o lenei atinae aua le lelei o Samoa ma ona tagata.”
Na faamamafa foi le saunoaga a Lopaoo i le aufaigaluega ina ia agai pea i luma suesuega mo le manuia o Samoa, ina ia vaai mamao, ma suesue atili ina ia ausia faaiuga lelei.
“O la’u faamalosi’au atu ia outou ia faia mea silisili faatasi ai ma le alofa mai o le Atua e fesaosoani ma taitai outou ia outou galuega ma o outou ala ia manuia. O upu a le Tusi Paia, ia lūlū ma loimata ae selesele ma le fiafia.”
Na auai foi i lea aso sui o Kolisi a Avele ma Papauta mo le molimauina o lea faamoemoe taua.
Na faailoa ai e fanau lo latou agaga fiafia, ma le naunau ia faaauau galuega lelei mo le lumanai.
“Ua ou fiafia ua mafai ona ou auai i lenei aso, talosia ia toatele fanau a Samoa e galulue mo le faia o suesuega i laau mo togafitiga, faapea foi taumafa mo Samoa,” na saunoa ai Filoi Simiti o le Kolisi o Avele.
