O SOU MANATU!
O le unaia pea e le Malo tauala atu i le Pulega o Tagata Tafafao maimoa mai fafo (STA) o tatou tagata ina ia aga’i e fa’aāoga auaunaga o lo’o ofoina mai e faletalimalo, falea’iga ma isi auaunaga mo le atina’e o faletalimalo ona ua telegese le itu o tagata tafafao maimoa mai fafo i lenei vaitau.
O lea fuafuaga a le Pulega o STA na fesiligia ai le mamalu o le atunuu i so latou finagalo fa’aālia, ona o lenei vaitau i le tapunia ai o femalaga’iga i le va o atunu’u e aofia ai ma Samoa, ona o a’afiaga o le Koviti 19 ma ua leai ai ni turisi e afea o tatou laufanua, sa tele ina fa’alagolago i ai i latou o lo’o fa’afoeina ia auaunaga.
Romeo Silver
Faleula
O turisi malaga mai i Samoa e i ai lo’u taofi o latou ia e patino i ai le fa’aaogaina o auaunaga e pei ona ofoina atu e faletalimalo, falea’iga, o matou iinei le Maketi lea e fa’atau a matou fualā’aua’ina aemaise foi i latou o lo’o fa’atau meataulima, e pei oi latou ia sa fa’alagolago i ai.
Peita’i, talu ona tula’i mai le Koviti 19, lea ua fa’alogologo atu, matuā a’afia lava le itu tau turisi i totonu o Samoa, ma o i foi sa fa’alagolago tele i ai tupe maua a ia auaunaga auā le fa’agaioiga o a latou pisinisi.
Ae afai o le fuafuaga lea a le Pulega, o se fuafuaga ua tatau ona fai, e i ai lava o tatou tagata e fiafia e aga’i i faletalimalo ma mata’aga e tafafao ai, atonu o sina vaega tupe e maua mai ai, o le a fesoasoani i le fa’agaioiga o pisinisi ma toe maua ai avanoa o tatou tagata i ni galuega, a’o feagai le lalolagi ma lenei fa’ama’i mata’utia.
Tuma Amaile
Levi Saleimoa
Atonu o le taimi lenei tatou te tutū fa’atasi ai e atia’e le itu tau turisi o si o tatou atunu’u. Fa’afetai i le Pulega mo a latou fuafuaga mo le atina’eina o lea vaega tāua, auā silasila fo’i i le tulaga lea ua i ai le lalolagi i le taimi lenei, matua’i fa’aletonu lava le tamaoa’iga ona o a’afiaga o le Koviti 19. Ae ou te fa’afetai i le Atua ona e le’o afea Samoa i lenei fa’ama’i mata’utia.
I lo’u manatu i le fuafuaga a le Pulega, ua talafegai ma onomea lelei, ae a fa’aopoopo loa i ai ma le gaseseina o taumafa e fa’aāoga ai lava oa o lo’o maua i totonu o Samoa e aunoa ma le fa’alagolago i taumafa ia e masani ona latou gaseseina mo turisi mai atunu’u i fafo, ona 100% loa lea. O le uiga o la’u fa’amatalaga, manaia ae gasese taumafa Samoa, le fa’aausi esi po’o le talo, koko esi, suafa’i, vaisalo mo le malū i le taeao, palusami, limu, size 2, sua i’a mo taumafataga o le aoauli ia ma le taumafa māmā loa i le afiafi, auā e uma loa aga’i e momoe, oka! uma aulia foi le isi aso fou o le Alii.
Sose Faataalili
Falefa
Atonu e umi ona feagai le lalolagi ma a’afiaga o le Koviti 19, ma ou te talitonu foi, o le a fa’apenā foi ona umi se taimi e tapunia ai femalaga’iga i le va o atunu’u ta’itasi. Ae i so’u taofi i lea mataupu, ua talafeagai lelei lava fuafuaga a le Pulega.
Silasila foi i le taimi lenei, o lo’o saogalemu pea Samoa ma malutia aao alofa o le Alii, e fa’afetaia ai le alofa ma le agalelei o le Alii ia Samoa ma ona tagata.
O le atina’e o turisi i totonu o Samoa, o le galuega fai fa’atasi a tatou uma. Auā a fua i ai le tulaga lea e i ai Samoa, e sili atu ona tāua le puipuia o tatou tagata mai le fa’ama’i nai lo le tatala o femalaga’iga ma avea ma ala e sao mai ai lea fa’ama’i mata’utia i totonu o si o tatou atunu’u. O tatou o tagata galulue, tatou te atia’e si o tatotu atunu’u i mea ua tatou maua. Pe tasi lua aso e te alu ai e te tafao ma fa’aāoga auaunaga ua ofoina mai ei latou o lo’o fa’atautaia ia auaunaga, a o la e maua sina seleni e faagaioi ai a latou pisinisi ma fesoasoani ai mo le tausiga o latou aiga. Ia tatou tutū fa’atasi, ina ia tatou galulue fa’atasi ma le Malo mo le atina’e atili o le tatou atunu’u, aemaise o tatou vaega tau turisi.
Malae Tialino Peniamina
Tuana’i
Ou te fa’afetai i le Pulega pe afai o le latou fuafuaga lea. E i ai lava tagata o si o tatou atunu’u e mafai ona latou fa’aaogaina ia auaunaga i se tau talafeagai. Atonu fo’i e mafai e nei auaunaga ona fa’apaū tau ina ia gafatia e o tatou tagata ona totogi, ona aga’i lea e tafafao ai mo ni nai aso, a la e maua le seleni e fa’agaioi ai le pisinisi ma maua ai seleni e tausi ai aiga aemaise o mea fai a nuu ma ekalesia fa’apea le tamaoaiga o Samoa.
E telē le tamaoa’iga o lo’o i totonu o le tatou atunu’u, ae ona o tatou lava tagata i le lē toa’aga e galulue. Fa’afetai i le Atua o lea e malutia Samoa i ona aao alofa ona o le fa’ama’i o lo’o pisapisō ai le lalolagi, o lea foi e tele taumafa, a’o lea fo’i e fa’aauau pea ona fesoasoani mai le tatou Malo i fa’amanui’aga tau seleni e fesoasoani ai i le tausiga o aiga. O lea ua tatou o’o mai i le vaitau tatou te fa’alagolago ai lava tatou iā tatou, auā o lea ua tapunia malae va’alele fa’avaomalo, ma ua leai foi ni tagata malaga asiasi mai i Samoa, ma o le taimi lenei o tatou, tatou te opogi fa’atasi le atina’eina o si o tatou atunu’u.
Nila Feu
Lotopa
Ou te manatu o le atina’e tau turisi lea sa tele ina manuia ai matou le aufai pisinisi. Peita’i le taimi nei ua a’afia le lalolagi i le Koviti 19 ma tapunia ai le toe feoa’i o va’alele ma tagata asiasi mai i totonu o le atunu’u, matua’i tulaga fa’aletonu ai lava matou oloa fa’atau atu.
Ae fa’afetai i le Pulega ma le latou fuafuaga, auā o le taimi lenei tatou te tutū fa’atasi e atia’e le tatou atunu’u i so’o se faiva lava, ina ia tumau pea le fa’agaioiga o pisinisi, auā atonu se masina oi luma tafiesea le fa’ama’i, leiloa po’o le tatou atunu’u o le a fa’atumulia i turisi, auā o la e iloa e turisi e le’i a’afia Samoa i le fa’ama’i. Ia tatou galulue fa’atasi, auā o le taimi nei ia matou ia e fa’atau a matou oloa i le maketi, ua le tutusa aso, auā o matou isi tagata sa manuia i le atina’e lea o turisi ona sa to’atele i ai e asiasi mai ma fa’atau a matou oloa. Ae atonu foi o lea fuafuaga a le Pulega, o le a toe sologa lelei ai le taulia o matou oloa i le mamalu o le atunuu o lo’o autova’a mai iinei mo fa’atauga.
Tina Laki
Vaivase- Tai
E leai se mea e faigata pe afai tatou te galulue fa’atasi. O le taimi lenei tatou te galulue fa’atasi ai e atia’e le Samoa i so’o se vaega. O lea ua fa’ata’atitia fuafuaga a le Pulega, ma o se fuafuaga ua tatau ona fa’atino. I so’u lava manatu i ai i le tulaga lea, atonu e manatu ‘ese’ese le atunu’u i le atina’e lea tau turisi, auā o lea tatou te iloa uma, o auaunaga lava ia sa fa’atino e patino lava i tagata asiasi maimoa mai fafo.
Peita’i, ia te a’u ia, o tatou uma lava o turisi. E moni o tatou o tagata Samoa, tatou te aga’i i le vao, e galulue ma fai fa’ato’aga, aga’i i le sami e fai faiva, ae e mafai foi ona tatou aga’i i faletalimalo, falea’iga, mata’aga ma auaunaga tau turisi, e tafafao ma malōlo mai ai feau ma galuega sa tatou faia i totonu o tatou aiga. O lea e tele ina fai fa’atasiga a aiga, o avanoa ia e tāua e fa’aāoga ai auaunaga ia, ina ia maua ai seleni e atia’e atili ai pisinisi, ina ia mae’a ane le Koviti 19, ae o lo’o mafai pea e o tatou tagata ona talimalo i tagata asiasi mai i Samoa. O fuafuaga tatou te va’ava’ai mam
