TEUTEUGA O LE FA’AVAE & TULAFONO TAUFA’AOFI 2020 – MATAGALUEGA O FAAMASINOGA
Vaega 3.
O le Vaega Tolu lenei o le faatalatalanoaga ma lē sa avea ma Faamasino Sili o le Malo o Samoa, Afioga Tiavaasue Patu Falefatu Sapolu, lea ua faailoa manino ai lona finagalo i Teuteuga o le Faavae ma Tulafono Taufaaofi i le Matagaluega o Faamasinoga ma Mataupu tau Faamasinoga.
O le Vaega Tolu lenei o le fa’aauauina o le faatalatalanoaga, ua saunoa ai Tiavaasue i le telē o le faamāmā avega mo aiga malaga mai mo Faamasinoga o Fanua ma Suafa pe a pasia Teuteuga o le Faavae.
O le taimi nei, o ituaiga faaiuga faapea e fai aloaia i ai le Faaiuga a le Supreme Court (Faamasinoga Maualuga), e lē mafai ona toe apili, ae o le teuteuga lea ua faagasolo nei, o le a i ai se avanoa o le Faamasinoga o Fanua ma Suafa 3 e mafai ona silasila ai i mataupu faapea.
E mafai ona toe apili i le taimi nei i le Faamasinoga Maualuga lea e apili i le Court of Appeal po o Faamasinoga o Talosaga lea e masani omai ai faamasino ua litaea mai Niu Sila, latou la na e fofogaina. Ae e i ai le suiga lea o le a i ai.
Atonu e faigofie ona ou faamaninoa le mataupu …o le a ou agai i itu e faaono lelei ai fuafuaga fou ia ua i ai nei…O itu nei e lelei ai le system fou lea ua faatula’i.
Muamua, o le vave.
I le taimi nei, afai e i ai se mataupu e tulai mai e lē malie ai se finagalo o se itu faamasino, ona ave lea e fai le Faamasinoga o le Uluai Suesuega. A maea lena, ona apili lea i le Faamasinoga o Talosaga pe afai e lē faamalieina se finagalo o se itu faamasinoga. Afai ae lē malie lava se finagalo o se itu faamasinoga, i faaiuga o Faamasinoga o Talosaga, a o lea faaiuga e aafia ai se aiā tatau i lalo o le Faavae, e mafai ona toe talosaga la le tagata lea, for judicial review i le Faamasinoga Maualuga. A lē malie ai lava lona finagalo, i le Faamasinoga Maualuga, ona mafai loa lea ona apili i le Faamasinoga o Talosaga, le Court of Appeal. Silasila la, e faafā ona fai le faamasinoga o le mataupu lava lea e tasi. O le Faamasinoga o Uluai Suesuega, Apili i le Faamasinoga o Talosaga. Talosaga for review i le Supreme Court po o le Faamasinoga Maualuga, a lē malie, toe apili i le Court of Appeal po o le Faamasinoga o Talosaga. E fai lava si umi o faagasolo nei mataupu.
Ou te molimau atu. E faitau tausagā. E tausagā o fai le process (faagasologa) lea.
O le mea lea ua i ai nei i lalo o le Tulafono fou lea pe a talia, a fai se faamasinoga, i le Faamasinoga o Suesuega ae lē faamalieina ai se finagalo o se tagata i le auala na faafoe ai lea faamasinoga, po o le process na faafoe ai faamasinoga ma taunuu ai i se faaiuga, e mafai i lalo o Tulafono Taufaaofi o lo o i ai nei, ona talosaga sa’o lava for review, i le Faamasinoga Lona 3.
Lona uiga e na o le faalua lava ona fai le faamasinoga.
Na o le Faamasinoga o Suesuega, ia ma le Faamasinoga Lona 3 lea.
Aua o le Faamasinoga lea ua aiaia nei i lalo o le Tulafono Taufaaofi. E vave tele la le taimi.
O itu e lelei ai le system fou, e taugofie, pe a faatusatusa i le mea o lo o i ai nei. E pei ona ou fai atu, o le mea lea e i ai nei, e amata i le Faamasinoga o Ulua’i Suesuega, Talosaga o Apili, toe talosaga for review i le Supreme Court, manaomia ai loia e tapena ma tulai i luma o le Supreme Court mo se itu faamasinoga, a lē faamalieina ai iina se itu faamasinoga, lona uiga e toe apili i luga i le Faamasinoga o Talosaga, o lona uiga e toe totogi foi loia.
A o le fuafuaga fou lea ua faatula’i mai nei, afai e lē malie se tagata i se faaiuga a le Faamasinoga o Suesuega, e talosaga (apply) sa’o lava for review (mo le iloiloga) i le Faamasinoga o Talosaga ma Iloiloga. Afai e finagalo e fai sana loia, na o le faatasi na totogi le loia, ae le faamalosia foi ia e fai se loia, e mafai lava ona alu ia e pei ona i ai i le taimi nei i le Faamasinoga o Fanua ma Suafa, e tauave lona taofi.
O le isi itu e faataugofieina ai le faamasinoga, ona o nai tatou tagata malaga mai fafo. I la’u maitau i le Faamasinoga o Fanua ma Suafa, a i ai ni mataupu e aofia ai nisi o lo o alala i fafo o lo tatou atunuu, e malaga mai lava mai Niu Sila i faamasinoga uma lava o lea mataupu, ona o le pele ia latou o measina a o latou aiga.
I le taimi nei, e malaga mai i le Faamasinoga o Ulua’i Suesuega, ae afai e oo le mataupu i le Faamasinoga o Talosaga, ona toe malaga mai foi lea mo le apili. Afai e oo atu i le Supreme Court e toe malaga mai foi lea, ma faapena ona toe malaga mai foi pe a oo i le Court of Appeal.
E le gata i pasese e malaga mai ai, ae o le toatele o isi e tu’ua latou aiga ma galuega i atunuu mamao, ua le maua le totogi i galuega, ae le ta’ua ai totogi o fale e alala ma afifio ai i Samoa nei e pei o faletalimalo. E taugata pe a malaga faafā mai, pe a fuafua la ma faatusatusa i le malaga faalua mai,
Ae a tolopo foi (se faamasinoga), tasi lena lave o lo o i ai nei, aua o tupe uma lava e malaga mai ai nai tagata malaga mai fafo.
E lē taugofie, ta te alofa atu i ai i le mafatia. Ae omai lava ona o le pele ia latou o suafa matai ma fanua faaleaganuu o o latou aiga.
O lesi itu e lelei ai le Faamasinoga fou, ona o le Faamasinoga lea e i ai i le taimi nei, na o le tasi le avanoa e mafai ona apili ai. Afai e fai se faaiuga a le Faamasinoga o Uluai Suesuega ae lē faamalieina se finagalo o se tagata, e mafai ona apili i le Faamasinoga o Talosaga, ona uma ai lea iina. Se i vagana o se mataupu e aafia ai se aiā tatau i lalo o le Faavae. O le system fou lea ua aumai nei i le toe Teuteuga o le Faavae, e lua avanoa e mafai ai ona e apili ai i le Faamasinoga o Talosaga. Afai e te lē malie i le faaiuga a le Faamasinoga o Uluai Suesuega, e mafai ona e apili i le Faamasinoga o Talosaga, a e lē malie ai lava i le Faamasinoga o Talosaga, e mafai ona e apili i le Faamasinoga Lona 3 lea ua taua o le Court of Appeal and Review. Po o le Faamasinoga o Talosaga ma Iloiloga. O fea la e sili? E sili le mea lea i ai nei na o le tasi le avanoa e apili ai pe sili le mea fou lea o le a i ai, e lua avanoa? E tofu le tagata ma lana tali i ai.
O le isi la itu lea e lelei ai le Faamasinoga fou lea o le a i ai. I le taimi nei, a fai se faaiuga a le Faamasinoga o Fanua ma Suafa, e aafia ai se aiā tatau o lo o aiaia i lalo o le Faavae, e mafai la ona e talosaga for review i le Faamasinoga Maualuga.
A o isi uma lava faaiuga a le Faamasinoga o Fanua ma Suafa, e le o aafia ai ni aiā tatau a tagata taitoatasi i lalo o le Faavae, e lē mafai e lē mafai lava ona e talosaga for review i le Faamasinoga Maualuga e pei ona i ai i le taimi o Niu Sila. E le mafai ona e talosaga mo se review (iloiloga) o se Faamasinoga o Fanua ma Suafa i le Faamasinoga Maualuga, ma o le mea lena na sau ai Samoa seia oo mai i le Constitution po o le Faavae, lea la na i ai le suiga lea, le suiga lea ua i ai le avanoa lea e mafai ai ona talosaga for review (mo se iloiloga) mai le Faamasinoga o Fanua ma Suafa i le Faamasinoga Maualuga. Pe afai ua aafia se aiā tatau. Ae pei ona ou fai atu, o le anoanoai o faaiuga a le Faamasinoga o Fanua ma Suafa, e le o aafia ai se aiā tatau pei ona aiaia i lalo o le Faavae. E laitiiti lava si pasene o faaiuga a le Faamasinoga o Fanua ma Suafa e aafia ai aiā tatau ia ei lalo o le Faavae ma mafai ai ona talosaga i le Faamasinoga Maualuga for review. A o le mea la lea ua i ai nei i le Faamasinoga lea Lona 3 o Talosaga ma Iloiloga, ua matua tatala le faitotoa. O le mea lenei o le Judicial Review, o se mea telē telē lava. E le gata i ni aiā tatau o lo o aiaia i lalo o le Faavae. E telē naua le mea lenei o le Judicial Review. A o lea ua fai mai le suiga fou lea o le a i ai, ua mafai ona e talosaga for judicial review mo soo se faaiuga a le Faamasinoga o Fanua ma Suafa i le Faamasinoga Lona 3. Lona uiga o faaiuga lea ua i ai i le taimi nei e lē o aafia ai le aiā tatau, a o lo o aafia ai le procedure na faatino ai se faaiuga ua mafai nei la i lalo o le Tulafono fou pe a pasia ona talosaga ai se itu faamasinoga for judicial review i le Faamasinoga lea Lona 3.
