GAOSIA I SAMOA MEAAI MO MOA
Tusia: Taunuuga Toatasi
Ua mafai nei ona gaosia i totonu o Samoa meaai mo lafumoa e fa’aaogaina ai la’au o lo’o maua i laufanua o le atunu’u.
O lea atina’e o lo’o galulue va’ava’alua ai le Matagaluega o Fa’ato’aga ma Faigāfaiva ma le Polokalame Fesoasoani a le Malo Saina le Samoa-China Agricultural Technical Aid Project (SCATAP) ma le Fa’alapotopotoga o Su’esu’ega Fa’asaieni a Samoa (SROS).
I le feiloa’iga a le Savali ma le Ofisa Sili Lagolago o Pulega i le Vaega o Lafumanu a le Matagaluega o Fa’ato’aga ma Faigāfaiva, Aiolupo Tony Aiolupo, ma le Sui o le SCATAP, Jim Liu na fa’amanino ai tulaga ua i ai lea atina’e a le Matagaluega. I lea feiloa’iga na saunoa au’ili’ili ai Aiolupo i le fa’amoemoe e pei ona i ai taumafaiga a le Malo e tauala atu i le Matagaluega i le mafai lea ona gaosia mea’ai e fa’aāoga ai lava lā’au o lo’o maua i laufanua o le atunu’u.
“E i ai su’esu’ega sa fa’atino e le Matagaluega ma le Polokalame Fesoasoani a le Malo o Saina le SCATAP ma le SROS, e saili se itua’iga meaai e mafai ona gaosia i totonu o si o tatou atunu’u e fa’aāoga ai lā’au o lo’o maua ai.
O ia taumafaiga a le Malo e ala atu i le Matagaluega, ina ia mafai ona maua se tatou meaai e tua i ai le au fagamoa ma le aufai fagaga, ina ia mafai ona fafaga ai a tatou moa, i meaai lava e gaosi i lā’u o lo’o maua i totonu o le atunu’u.
“O lea ua i ai le tatou meaai ma ua mafai ona fa’aāoga, ma ua ma’ea foi ona fa’ata’ita’i i tatou manu.”
O se fesoasoani tele lea mo le aufai lafumoa, ina ia fa’aitiitia ai le fa’alagolago i meaai a moa o lo’o auina mai atunu’u i fafo.
Ae o le a fa’aitiitia ai foi tupe alu a le Matagaluega i le auina mai o meaai a manu mai atunu’u i fafo.
I le taimi nei ma le tulaga o moa lea e i ai, e tusa o le 40 – 45 miliona tala le tupe o lo’o fa’aaluina e le Malo e auina mai ai aano o moa mai atunu’u i fafo auā le fofoga taumafai o le atunuu, o le fa’aopoopo lea a Aiolupo.
“A fua i itua’iga moa lea e maua i le tatou atunu’u, o le moa Samoa e tele ina ta’a solo e leai se meaai mautū a aiga ma nu’u e fafaga ai.
I su’esu’ega a le Matagaluega sa fa’atino e pei ona saunoa Aiolupo, o le moa Samoa e o’o lava i le ono masina le matua, ona fa’atoā maua se aano e mafai ona taumafa.
“A fua la i itua’iga moa ia e auina mai fafo, o le umi e tausi ai e na’o le ono vaiaso, ona o le itua’iga moa ia e fa’apitoa lava latou na’o le tupu ma tupu atu ai ma le aano, ona o lo’o lelei ma paleni mea’ai la e aai ai.
O le gaosiga o meaai a moa, e mo’omia uma vaega e tatau ai, aemaise lava i le polōtini (Protein).
“O le Polokalame fesoasoani lenei a Samoa le SCATAP, e tele ina latou totōina le tele o i ai ituaiga lā’au, ma o le polokalame foi lea na latou fa’atāuaina le toe totō o le manioka, lea o lo’o fa’aāoga e gaosi ai le meaai lea.
E i ai ma isi lā’au e pei o le pi ma le lā’au sa auina mai e lea polokalame ua tāua o le ‘mulberry’ lea o lo’o vili fa’atasi ma maua ai le mea’ai e pei ona i ai.
“O le fa’aāogaina o ia lā’au mo le gaosia o meaai, e fa’amago lelei ma fa’ala ona aumai lea vili fa’atasi ma isi lā’au e pei o le manioka. O le isi vaega sa fa’aālia e Aiolupo, o le tulaga lea i le fa’aāogaina o i’a mai falei’a i Amerika Samoa, ina mafai ona fai ai le fish mill e fa’apaleni lelei ai le meaai e pei ona i ai.
O lo’o fa’agasolo pea le polokalame a le Matagaluega mo le si’itia atili o le faitau aofa’i o moa i totonu o le atunu’u, ina ia mafai ona tali atu i nisi vaega e fesoasoani e tu’uitiitia ai le auina mai o moa mai fafo.
Tanumapua Farm
O le Tanumapua Farm o se tasi lea o pisinisi o lo’o fai a latou lafumoa ma sa fa’aālia le lagolagosua o lea kamupani i fuafuaga a le Malo i le gaosia lea o meaai a moa i totonu lava o le atunu’u.
Na fa’aālia e Leota Laumata Pelesa, e fa’apea, o le taimi lenei o le matua’i tele lava o le fuamoa.
O le vaiaso ua mavae sa auina atu ai pusa fuamoa i Rarotonga ma o lo’o i ai le fa’amoemoe o le vaiaso o lumana’i nei, o le a toe auina atu ai le isi uta.
Na tā’ua e Leota e le’o i ai se fa’amoemoe o le Tanumapua Farm e fefa’ataua’i le aano o moa, e na’o le fuamoa lea o lo’o fa’atau atu e le kamupani.
“E na’o moa ua uma ona tautu’ufua e fasi (slaughter) ona ave lea i le Farmer Joe.
“Na amata le lockdown ma tapunia ai faletalimalo ma falea’iga, lea na fasi ai le tolu fale moa e tusa lea ma le 20,000 moa ma ave i le Farmer Joe.
E o’o mai i le taimi nei, ua amata ona toe sologa lelei, o le fa’aopoopo lea a Leota.
E 350 le aofai o pusa fuamoa e mafai ona fai i le aso ma e 15 taseni fuamoa i le pusa e tasi.
O le itu lea matou te tilotilo aga’i i ai, afai e talia atoatoa e Rarotoga le tatou fuamoa, atonu o le a tele ina mo’omia le fuamoa, ona taumafai loa lea e fa’atelē le tatou atina’e ina ia ausia vaega mo’omia mo le auina atu i fafo.
“E i ai lo’u taofi, ailoga o le a tatou toe fa’amoemoe i atunuu i fafo mo le fuamoa.
O le fa’atoaga i Tanumapua e tusa ma le lima eka o lo’o fausia ai le atina’e ae 17 falemoa o lo’o i ai.
O le Kamupani a Frankie e tasi lea falemoa o lo’o i ai ma ua latou fa’aālia foi le tele o fuamoa o lo’o mafai ona latou sapalaia, tusa ma le 1,500 taseni ma o lo’o fa’atauina lava i totonu o Samoa.
