$64.5 MILIONA TULUI FAAMEAALOFA MO SUI FAI SAOFAGA O LE NPF
Tusia: Asenati Taugasolo Semu
O le asō ua talaina ai i tua le tului faameaalofa e 9.1% mo sui fai saofaga a le Faalapotopotoga o Faaputugatupe mo le Lumanai Manuia o Tagata (SNPF), lea e $64.5 miliona le faatupeina.
Na ulua’i tuuina atu i sui faisaofaga le tului faameaalofa e le $7.8 miliona ia Tesema o le tausaga ua mavae.
E $43.2 miliona lea o le a totogi tupe i sui faisaofaga i le asō, 1 Iulai 2020, lea na faamaonia e le Minisita o Tupe, ia Sili Epa Tuioti faapea le Komiti Faatonu ma le Pulega o le NPF.
Na saunoa ai Sili, o se tinoitupe faameaalofa pito i maualuga lea i le tala faasolopito o le Faalapotopotoga.
“A fua i le tausaga na te’a nei, sa $54 miliona na faasafua, ma a fua i le $64.5 miliona lea ua faasafua i le taimi nei, o se tupe matua tele lava,” na saunoa ai Sili.
“Talitonu ua maualuga lea siitaga ua talafeagai foi mo le tatou feagai ai ma le faama’i o le Korona virus. Atonu o le alofa lea o le Atua ua aumai lea tupe e toe faasoa atu io tatou aiga ma o tatou nuu aua le atinaeina o le tamaoaiga o aiga ma nuu ae faapea foi le tamaoaiga o lo tatou atunuu.”
Na faailoa foi e Sili le fesoasoani o le NPF mo pisinisi i totonu o le atunuu, ona o tulaga faigata o le tamaoaiga o i ai nei, aemaise o le faafaigaluegaina o tupe, e pei ona fai sao ai i le Faletupe o le BSP ma le faamoemoe e maua mai ai isi tupe mo le atunuu.
“O tupe faaopoopo ia e toe faafoi atu mo le sui faisaofaga.”
O lo o mata’itu lelei e le Faalapotopotoga o le NPF le tulaga pagatia o lo o i ai le lalolagi ona o le faamai o le KOVIT 19, ma o lo o mautinoa foi le aafia o le faasoa tau tupe a le tele o aiga ma sui faisaofaga ona o le aafia o Samoa i le tulaga faaletonu o le tamaoaiga o le lalolagi. O le mafuaaga tonu lea ua a’e ai le tofa i le Pulega ma le Komiti Faatonu e alagatatau ona maualuga ia se meaalofa mo le aufai saofaga i lenei tausaga. O le tulaga lea ua totogi tupe ai le $43.2 miliona mo le aufai saofaga e tusa ma le $6.1% o le tului faameaalofa ua faamaonia nei.
O le faamatu’uina o lenei meaalofa fuafuaina e faapea;
• $7.8 miliona (1.1%) na totogi tupe i le au faisaofaga i le Aso 2 Tesema 2019
• $21.3 miliona (3%) o le a tuuina sa’o i saofaga a le au faisaofaga i le Aso 1 Iulai 2020
• $14.2 miliona (2%) o le a totogi tupe i le au faisaofaga i le Aso 1 Iulai 2020
• $10.6 miliona (1.5%) o le a totogi tupe i le au faisaofaga i le Aso 30 Novema 2020
• $10.6 miliona (1.5%) o le a totogi tupe i le au faisaofaga i le Aso 22 Mati 2021
• Tau aofai o le meaalofa: $64.5 miliona
