TEUTEUGA O LE FA’AVAE & TULAFONO TAUFA’AOFI 2020 – Matagaluega o Fa’amasinoga
Vaega 4.
O le Vaega Fa lenei o le faatalatalanoaga ma lē sa avea ma Faamasino Sili o le Malo o Samoa, Afioga Tiavaasue Patu Falefatu Sapolu, lea ua faailoa manino ai lona finagalo i Teuteuga o le Faavae ma Tulafono Taufaaofi i le Matagaluega o Faamasinoga ma Mataupu tau Faamasinoga.
O le Vaega Fa lenei ua faamae’a ai le faatalatalanoaga, ua saunoa ai Tiavaasue e matuā leai ma se aafia o fanua faaleaganuu o Samoa pe a pasia Teuteuga o le Faavae.
E i ai le finauga lea e aumai e nisi e faapea, i le taimi nei, afai e i ai se tulaga faapea o tulai mai o le masalomia lea o se Faamasino e i ai sona sootaga faale aiga, po o ni masaniga foi ma se tasi o itu faamasinoga, e mafai la ona e talosaga for judicial review (iloiloga faa-faamasinoga) i le Faamasinoga Maualuga, ona ua aafia le mea lea ua ta’u o le Right to a Fair Trial, po o le Aiā Tatau i se Faamasinoga Amiotonu. O la’u faamatalaga e mafai foi le mea lena i le Faamasinoga fou lea e pei ona faatula’i mai.
O mea nei o judicial review, o se mea lautelē tele, ae o le a ou faapuupuuina atu ina ia mafai ona tali le fesili lea na e saunoa mai ai.
O le itu muamua, o se ground po se mafuaaga muamua e mafai ai ona talosaga se isi mo le judicial review pe afai o lē na faia le faaiuga (po o le tagata na faia le faaiuga) o se mataupu e leai sona malosiaga faaletulafono e faia ai lea faaiuga, ae tago lava fai. E ta’u la i le faaperetania, o le illegality. Mo se faata’ita’iga, o le faia lea o se faaiuga e se itutino po o se faalapotopotoga ae leai se quorum o lona uiga e illegal, e le talafeagai ma le Tulafono le auala na faatino ai le faaiuga. Pei la o se faataitaiga, e mafai ai la iina ona e talosaga for judicial review.
O le lona lua o mafuaaga, le mea tonu lava lea e te fesili mai ai. E ta’u faaperetaniaina, o le procedural fairness. O le uiga o lea faaupuga ia fair ma amiotonu le auala na fai ai se faaiuga. E le faapea la na o le Faavae o lea e aiaia mai ai le mea lea o le Right to a Fair Trial. O le mea lena lea e taoto i le Common Law. O lea la e aumai totonu o le Common Law le mea ta’u o le Procedural Fairness. E ta’u i nisi o taimi, o le Natural Justice.
E le faapea la a aveese mai nei i le Faamasinoga Maualuga, ia le malosiaga lea e iloiloina ai faaiuga a le Faamasinoga o Fanua ma Suafa ua faatino pe afai e i ai se conflict of interest, ona faapea e le mafai ona iloiloina e le Faamasinoga o Fanua ma Suafa i lalo o le Common Law lea e i ai. E i ai le power lea.
O le mea moni na fanau mai le aia tatau lea e ta’u o le Right to a fair trial o lo o i totonu o le Faavae mai le Common Law lea e ta’u o le Natural Justice po o le procedural fairness. Ma o lona talaaga, e fai sina umi ae na ona ou faapuupuu atu faapenei mo le silafia e le tatou atunuu.
O le Faamasinoga muamua lava na fai i le lalolagi e tusa ma le tala a le Tusi Paia, o le Faamasinoga na faia e le Atua i le faatoaga i Etena. O le faamasinoga o Atamu ma Eva o tatou uluai matua. Manatua foi na fai le poloaiga a le Atua ia Atamu ma Eva, e taga oulua i mea uma lava, ae i ai le laau, e sa ona oulua aai i le fua o le laau. A o le a le mea na tupu? Ua soli e Atamu ma Eva le poloaiga a le Atua.
Afio mai loa le Atua ua silafia lava e le Atua le mea lea ua tupu, ae le i afio mai le Atua faasala loa Atamu ma Eva. Na tuu lava e le Atua le avanoa ia Atamu ma Eva e tali atu ai, ae le i faia lana faaiuga. Fai mai le Atua ia Atamu, ‘Atamu, o le a le mea ua e ‘aia ai le fua o le laau? Na ou fai atu foi ia te oe e aua e te ‘aia? Ae fai mai Atamu, o Eva na fai mai ia te a’u.’
O le mea taua, e le i afio mai loa le Atua faasala Atamu. Na muamua lava tuu e le Atua le avanoa ia Atamu sei fai ai sana tali.
E le i afio atu loa foi le Atua faasala loa Eva, na tuu foi le avanoa e le Atua ia Eva e fai ai sana tali ae le i faia se faaiuga. Fai mai le Atua ia Eva, ‘Eva aisea ua e aia ai le fua o le laau na ou fai atu e aua nei e aia?’ Ae fai mai Eva, ‘o le gata na faaosoa a’u.’
A o le itu taua lava lea, na muamua lava ave i ai e le Atua le avanoa. Ona faatoa fai loa lea o le faaiuga a le Atua e faasala Atamu, ia faasala foi ma Eva. Ua silafia uma e tatou le faasalaga.
O le faamasinoga lona lua i le Talafaasolopito, lea foi ei totonu o le Tusi Paia. A o le Atua foi na faia le faamasinoga, o le faamasinoga o Kaino ma lona uso o Apelu. O lea na fesili le Atua, ‘Kaino o fea lou uso o Apelu?’ Ae pepelo Kaino i le Atua na te leiloa po o fea. A o lea na fetalai le Atua, ‘ae faafefea le toto o lou uso lea e tagi mai le eleele?’
Na silafia e le Atua mea uma, ae o le point taua, na muamua tuu le avanoa e tali mai ai.
O le mea la lea e ta’u o le Natural Justice. O lona lālā muamua lava, ia aua nei e faia se faasalaga, pe faia se faaiuga o se mataupu, ae e te le i tuua muamua le avanoa i itu faamasinoga e tali mai ai. That’s Procedural fairness- right to a fair trial.
O le mea la lena i soo se faamasinoga lava, e muamua tuu le avanoa e aumai ai faamatalaga a itu faamasinoga faatoa fai ai lea o se faaiuga. A i ai se faamasino na o le alu atu lava fai le iuga ae le i faafofoga i tala a tagata, o itu faamasinoga, o lona uiga, e unfair le trial lea. E mafai loa ona talosaga for review.
Tau faamanino atu le itu lea, e ese le Right to a fair trial lea e aumai i le Faavae, a o lena right, na fanau atu i totonu o le Common Law. O le Common Law la lena o lea e apply i le Faamasinoga Lona 3 lea o le Faamasinoga o Fanua ma Suafa. E le o lusi la le right lena. O le mea foi la lea i se tagata e i ai se conflict of interest ae alala i totonu o se Faamasinoga e aofia uma ai lava i lalo o le mea lea o le Natural Justice.
Ona ou o’o ifo lea i le vaega lona tolu, po o le ground lona tolu e mafai ona talosaga ai for judicial review. O le faia lea o se faaiuga ua matua maoa’e lava le sese. Ua matua maoa’e tele le sese e le mafaia e se tagata e mafaufau lelei ona faia se faaiuga faapea. O grounds la ia e tolu ua ou faapuupuu atua ae matua lautetele lava toe loloto ia Tulafono e aafia ai. Lea la ua matala nei le faitotoa ua mafai ai ona talosaga soo se isi i soo se ground lenei of judicial review.
E le pei o le mea lea i ai i le taimi nei, seiloga lava e aafia se aiā tatau o lo o i totonu o le Faavae faato’a mafai lea ona talosaga for judicial review i le Faamasinoga Maualuga. A o lea la ua tatala le faitotoa.
O le isi la itu, o le itu mulimuli lea, o le Faamasinoga Maualuga, e ta’ito’atasi lava Faamasino e faafoea. A o le Faamasinoga Lona 3 o le Faamasinoga o Fanua ma Suafa, e pei ona fuafuaina, e to’afa Faamasino.
O le Faamasino muamua, o se Faamasino ua retire o le Faamasinoga Maualuga; o le Faamasino lona lua, o se Faamasino o lo o galue i le taimi nei; lona tolu o se Sui Peresetene o le Faamasinoga o Fanua ma Suafa ua ritaea malolo, ma le lona fa, atonu o se loia lea ua agavaa e avea ma Faamasino o le Faamasinoga Maualuga.
O le fesili la. O fea e sili? Pe afai o ita e fai sata faamasinoga, o le ave o lata mataupu e faamasino e le Faamasino e toatasi ma fai le faaiuga, e pei ona i ai le Supreme Court, pe ave ii i le mea lea e toafa Faamasino, e aafia ai ma se faamasino o le Faamasinoga Maualuga? Ia e i ai lava le upu foi lea faasamoa, o le tele o sulu e tele ai foi figota.
Ae pule lava le tagata ia i lona finagalo po o fea e sili. Pe sili le fai e le toatasi le faamasino pe sili le fai e faamasino e toafa o le faamasinoga o sana mataupu.
Fesili: Nanai Laveitiga Tuiletufuga
I nei teuteuga uma, ua i ai foi nisi o manatu e faapea, e ono faalafi mai ai i tua o teuteuga ia, faaupuga ia i tulaga o fanua faaleaganuu. O le mau lea ua sau nei, ona o lo o manino lava i le Faavae le malupuipui o fanua faaleaganuu i lalo o Vaega 102 i le 106, ae o lo o faapea mai foi nisi, e i ai se vaega i totonu o le Vaega 101 o le Faavae e faapea o le a sao atu ai le pule lea e pulepule tutū ai le Malo i le faatauina lea o eleele faaleaganuu. E faamaonia nei taofi?
Tali: Tiavaasue
O lea ou te tilotilo nei i Teuteuga o le Faavae, aemaise lava le fuaiupu lea e 101, e matua leai ma se vaega o nei aiaiga o le Faavae 100, 101, 102, 103, 104, e matua leai ma se vaega o nei fuaiupu i la’u lea vaai faaletulafono e faaono mafai ai ona faatau ese atu fanua faaleaganuu o si o tatou atunuu.
Ou te lē ioeina ni taofi ua faapea mai, e mafai ona faataueseina atu i lalo o le fuaiupu 101 po o se isi lava fuaiupu o Tulafono Toe Teuteu nei ia fanua faaleaganuu o Samoa.
O lea e agai Tulafono nei i Fanua ma Suafa. E le o agai i ni fanua faaleaganuu. O le Faamasinoga le mea lea e agai i ai Tulafono nei. O lea la, e matua leai ma se aafia o fanua faaleaganuu o Samoa i Tulafono nei.
Fesili: Nanai Laveitiga Tuiletufuga
I fanua ua lisi e fai ai mortgage (nonogatupe) ae le mafai ona totogi le nonogatupe, e mafai ona aveese pulega o fanua faaleaganuu e mafua mai i le lē mafai ona totogi nonogatupe? Po o le fai o le loan i le faletupe e faaaoga ai fanua faaleaganuu ae le mafai ona totogi. E mafai ona ave faamalosi ai le pulega o fanua faaleaganuu ona o le lē totogia o le loan (nonogatupe)?
Tali: Tiavaasue
E lē mafai. Afai o se lisi ua talia e se faletupe e mokesi ai se nonogatupe, ae te’i la ua le mafai ona toe totogi le nonogatupe, e faaono mafai la e le faletupe ona latou takeover le lisi mo le paleni o le taimi lea e totoe o le lisi.
Mo se faataitaiga, afai o se lisi e 20 tausaga, ua le mafai ona totogi le loan, ae toe 10 tausaga o le lisi la e totoe, e mafai la ona ave e le bank le taimi lea e totoe o le lisi, pe afai o lo o faataga i totonu o le lisi. E ave la le lisi i le taimi e 10 tausaga lea e totoe e faaaoga e le faletupe i se auala e toe mafai ona maua mai ai lana tupe. Ae a uma a le 10 tausaga lena, ona aveese a lea o le faletupe, ae taatia lava le fanua o le tagata Samoa ia. E lē mafai i lalo o le Faavae ona ave e le Faletupe se fanua faaleaganuu i se tulaga faapea o se nonogatupe po o se mokesi i se lisi ua lē mafai ona totogi. E lē mafai ona avea fanua faaleaganuu.
