MALAGA FAAPITOA MO LE AUFAIGALUEGA RS.E. I NIU SILA
Tusia: Tusiga Taofiga
E ui o lo’o a’afia pea le lalolagi i le Koviti – 19, peita’i e le’o māma i le Malo, le sailia o auala talafeagai e vave aumai ai tamafanau a Samoa ua mae’a konekarate i galuega fa’avaitaimi sa galulue ai i Niu Sila ma Ausetalia.
E silia i le 1,000 tamafanau a Samoa, o lo’o galulue i nei galuega fa’avaitaimi i Ausetalia ma Niu Sila ma ua mae’a a latou konekarate, ae o lo’o malu puipuia pea i latou e kamupani sa faigaluega ai, e tālia ai le taimi e toe taliu mai ai i le atunuu.
O lea fuafuaga a le Malo tauala atu i le Matagaluega o Pisinisi Alamanuia ma Leipa, na fa’ailoa e le Ofisa Sili o Pulega, Pulotu Lyndon Chu Ling, e ui i le tulaga ma’ale’ale o le soifuaga i lenei vaitau ona o le pepesi o le Koviti – 19 peita’i e le’o moemoenoa le silasila mamao a le Malo i auala tatau e toe fa’afo’i mai ai tatou tamafanau ua mae’a konekarate sa galulue ai i galuega fa’avaitaimi.
“O lo’o i ai lava le naunauta’iga ina ia ausia se malaga se tasi mo lenei masina, ma o lo’o ave lava le fa’amuamua ia Niu Sila, ona o Ausetalia, o lo’o tulaga maualuga pea le a’afia ona o le fa’ama’i.
“I le taimi nei, e leai ma se tulaga e fa’apopoleina ai le atunuu aemaise o aiga o nei fanau, auā o le upu moni, e ui ua mae’a galuega ma leai ni totogi o toe maua, ae o le tausiga ma le vaaiga lelei o i latou nei, o lo’o feagai pea ma nai kamupani sa o latou fa’afaigaluegaina i latou nei.
“E i ai lo’u talitonuga e tatau ona i ai se isi faigamalaga mo le masina lenei, ma o lo’o malosi lava fe’utana’iga ma kamupani tetele nei i Ausetalia ma Niu Sila mo nei malaga fa’apitoa, ae e le’o tu’ua fo’i le tu’ualalo ma le fautuaga o lo’o ave pea ia tatou tamafanau ua le’o toe faigaluega.
“O le itu lelei o le toe vave fa’afo’i mai o i latou nei, manatua fo’i tatou te le iloa lava fa’afitauli e ono tutupu mai, ‘ina ne’i avea fo’i le nonofo umi o nisi o fanau e tālia le taimi e toe tatala ai malaga a va’alele ma auala e ono toe fai ane ai se isi amio le talafeagai e lavelavea ai i le Tulafono a’o lea ua mae’a lana konekarate, ma o le isi lena tulaga o lo’o silasila toto’a pea i ai le tatou Malo i le taimi nei.
“Ua fautuaina malosi fo’i e le Malo aiga o nei fanau o lo’o i Niu Sila ma Ausetalia, o lo’o tauanau pea i fanau nei ina ia aga’i ane latou te nonofo fa’atasi, ina ia onosa’i ma ‘aua le fa’alavelaveina i fanau ona o lo’o malu puipuia pea i latou i kamupani sa galulue ai e fa’atali ai le toe fo’i mai, ona o le fa’a’ete’etega o galuega nei sa saini feagaiga i lona tulaga fa’avaomalo.
I le taimi nei, o lo’o fa’aauau pea fe’utana’iga fa’avaomalo i le va o le Matagaluega o Pisinisi Alamanuia ma Leipa (MCIL) ma le Kamupani o lo’o galulue ai tatou tamafanau i galuega fa’avaitaimi nei i Ausetalia ma Niu Sila, mo lenei fa’amoemoe tele.
Fa’ailoa e Pulotu, o le agaga fiafia i le Malo, ona sa i ai nisi o fanau ua mae’a a latou konekarate, ae fetaui tonu ma le Koviti – 19, ona toe ave lea i ai e nei kamupani o masina fa’a’opo’opo e fa’aauau ai a latou konekarate seia mae’a le fa’ama’i, ma o i latou na, o lo’o mautinoa lava le maua o seleni fa’a’opo’opo auā le tausiga o aiga i Samoa nei.
