NATIONAL ID, TUSIGĀIGOA MA LE FA’AMANUIAGA $50 MO TAGATA UMA
Tusia: Tusiga Taofiga
O Aukuso 2020, e amatalia ai le polokalame a le Malo mo le National ID, fa’atasi ai ma le fa’amauina o fa’afanua o nu’u ta’itasi ma le aofa’i o auaiga uma i Samoa, aemaise o le tufatufa atu o le $50 o le Fa’amāma avega a le Malo, mo le atunuu atoa.
I le Vaega Lua o le fa’amāma avega a le Malo mo le Koviti – 19, na fofogaina ai e le Minisita o Tupe, Sili Epa Tuioti i totonu o le Palemene o Samoa le fa’amatu’u atu lea o le $12,125,300 mo lenei fa’amoemoe tele, o le fesoasoani a le Malo mo le pagātia o le atunuu ona o le tulaga ma’ale’ale o le pepesi ai o le Koviti – 19 i le lalolagi atoa.
Fa’ailoa e Ali’imuamua Malaefono Tāua, Ofisa Sili o le Ofisa o Fuainumera Fa’amauina, e ono vaiaso e fa’agasolo ai lenei galuega tele, ma e 20 vaega (teams) ua fuafua e fa’atinoina lenei galuega.
Na ia fa’ailoa fo’i, mai lenei 20 vaega e lima vaega (teams) o le a faimalaga atu i Savai’i ae 15 Upolu.
O le fa’amoemoe i le Ofisa o Fuainumera Fa’amauina e pei ona fa’ailoa e le Ofisa Sili, ia mae’a le fa vaiaso o lenei fa’amoemoe, ua ausia le 80% o le aofa’i o tagata Samoa.
O lenei galuega tele o se tapenaga amata a le Malo, ina ia mautinoa ai le tulaga maualuga o tapenaga mo le fa’ataunu’uina o le National ID, auā le fa’afaigofieina ona tamau fa’amaumauga sa’o atoatoa ma le moni o so’o se tasi i se ID se tasi, e fa’aāogaina mo fa’amaoniga i so’o se auaunaga e i ai faletupe, falema’i, a’oa’oga, faigamalaga ma isi.
Aemaise ai o lenei galuega o le a amatalia, e tapena mamao ai le Malo, mo le tusigaigoa tele a le atunuu i le tausaga fou ia Novema 2021.
Fa’ailoa e Ali’imuamua, e silia i le 400 le aufaigaluega mai le Ofisa o Fuainumera Fa’amauina, o le a vaevaeina i vaega e 20 mo lenei fa’amoemoe, o lona uiga o le taimi ma le aso e o’o atu ai le Ofisa mo le fa’amauina o le aofa’i ma igoa o lou auaiga aemaise afio’aga ta’itasi, o le a tu’uina atu ai fo’i ma le $50 a tagata uma, mai tagata mātutua seia o’o lava i fanauiti.
O lo’o i ai fo’i le Komiti Fa’apitoa mo le National ID o lo’o mata’ituina le aoina mai o fa’amaumauga sa’o ma le moni mo le fuafuaga mamao a le Malo, ma o lo’o galulue ai le Matagaluega o le Soifua Maloloina, Matagaluega o Aoga, Ta’aloga ma Aganu’u, Ofisa o Faiga Palota, Matagaluega o Tinā ma Tama’ita’i, Atina’e o Nu’u ma Agafeso’ota’i, Matagaluega a le Palemia ma le Kapeneta, Matagaluega o Tiute ma Tupe Maua, Faletupe Tutotonu a Samoa, Matagaluega o Tupe, SUNGO, Chamber of Commerce, Matagaluega o Feso’ota’iga Televavave Fa’aneionapo ma le Ofisa o Fuainumera Fa’amauina ma o lo’o Ta’ita’ifono ai le Palemia.
