FA’A’OPO’OPO POTU AOGA FOU MO LE KOLISI O LEIFIFI
Tusia: Taunuuga Toatasi
E $238,407.25 le tau atoa o potu aoga fou e ono (6) ua fa’a’opo’opo i le faleaoga a le Kolisi Maualuga o Leififi.
O lenei galuega tele sa fa’atupeina i le agalelei a le Malo o Iapani fa’atasi ai ma le fesoasoani a le Asosi o Mātua ma Faiaoga (PTA) e fa’apea fo’i i tama ma teine tuai sa a’oa’oina i le Laumua o Leififi.
I le saunoaga autu a le Palemia, Tuilaepa Sailele Malielegaoi e tatala aloaia ai lenei galuega tele e fa’apea;
“O Leififi o le tasi lenei o Kolisi o lo’o tumau pea le fa’atupulā’ia o fanau e autova’a mai mo le a’oa’oina.
“O le ata manino lea o le alualu i luma o taumafaiga a tama ma teine o Leifiifi ona o le lagolago a mātua ma le komiti o aoga.
“Tatou opogi fa’atasi le taumafai mai a le Malo ma le Matagaluega o Aoga, ia unaia fanau e fa’aāoga le tele o polokalame fou ua i totonu o aoga.
Na fa’amamafa fo’i e le Palemia le ‘ave o le fa’amuamua i le fa’aāogaina o auala fa’atekonolosi, auā o le tasi lea o auala vave ua a’oa’oina ai e fanau tomai ma agava’a ‘ese’ese auā lo latou ola tuputupua’e, ma ia mautinoa e le’o oge Samoa i alagāoa e fesoasoani ai mo a’oa’oga a le fanau, a ia mautinoa fo’i o lo’o fa’aāoga ma le tatau, fa’a’ete’ete ma le fa’autauta e fanau nei auala o feso’ota’iga televavave fa’aneionapo.
“O se manaoga na mo’omo’o ina ia tupu, a’o lea ua molimauina i polokalame fa’agasolo a le Matagaluega o Aoga, Ta’aloga ma Aganu’u, i vaiaso ta’itasi a’o i ai Samoa i puipuiga o le fa’ama’i.”
Na momoli le fa’afetai fa’apitoa a le Malo Samoa i ana pa’aga totino mai isi atunuu e i ai le Malo o Iapani, ona o le taliaina o le talosaga a le Kolisi o Leififi e ala i le fa’atupeina o lenei galuega tele.
Na fa’afetaia fo’i e le Palemia le Pule Aoga, Asosi o Mātua ma Faiaoga, Komiti o Aoga ma le Kolisi atoa e ala i lenei galuega tele ua tino mai.
O lenei galuega sa fausia e le Konekarate o le Sa le Fo’i mo le umi e fa masina.
O le tausaga e 2019 sa fa’ataunu’uina ai le sainigalima a le Kolisi o Leifiifi ma le Ofisa o le Amapasa o le Malo o Iapani i Samoa nei, mo le amatalia o lenei galuega.
Na fa’afetaia fo’i e le Peresitene o le Komiti o Aoga a le Laumua, To’alepai Rula Vaai le Ofisa o le Amapasa o Iapani, ona o le fesoasoani ua mafai ai ona fa’ataunu’u le fausia o potu aoga mo fanau a le atunu’u o lo’o a’oa’oina i totonu o le Laumua.
“Fa’afetai foi le Malo o Samoa ma ana faigapa’aga ma Malo mai fafo, lea ua manuia atu ai Aoga, Fa’alapotopotoga ma afio’aga i fesoasoani ua ofoina mai.
