MAU LE TO’OVAE MA IA LAVA LE ONOSA’I
Tusia: Taunuuga Toatasi
E sili le puipuia nai lo le tau togafitia.
O se fa’amanatu mai lea a se tasi o tamāli’i a le atunu’u ia Malagamali’i Lavea Levi, mo tagatanu’u o Samoa o lo’o aumau i atunuu i fafo o lo’o naunau lava ina ia malaga mai Samoa mo a latou fuafuaga o lo’o fia fa’atino i Samoa nei.
O Malagamali’i o ia e atoa ai le to’avalu (8) o i latou sa nofo va’ava’aia i le faletalimalo o le Aniva’s Place i Moto’otua mo le 14 Aso mai le aso na taunu’u mai ai Samoa.
Peita’i na ia lagona le leo o tagatanu’u Samoa o lo’o alala i atunu’u i fafo i lo latou naunauta’iga ina ia toe tatala fa’asoloatoa faigāmalaga fa’avaomalo i le vā o Samoa ma isi atunu’u o le lalolagi ona o lo’o fia malaga mai fo’i latou i tuatuagia fa’aleaiga ma nisi o fa’alavelave i Samoa nei.
Ma i le taimi nei o lo’o tumau pea Ta’ita’i o le atunu’u i le fa’amalosia ona tapu faigamalaga i tuāoi fa’avaomalo i le vā o Samoa ma isi atunu’u, se’i vagana ai le toe fa’afo’i mai o ō tatou tagata mai Niu Sila i Samoa nei, o i latou o lo’o nofomau i totonu o le atunuu ma o le ala lena o lo’o tumau ai pea Samoa i luga mo Poloaiga o Fa’alavelave Tutupu Fa’afuase’i (S.O.E.) ona o le Koviti – 19.
I le feiloa’iga a le Savali ma Malagamali’i, i le aso tonu na mae’a ai le 14 aso na nofo va’ava’aia talu ona taunu’u mai Samoa, na ia fa’ailoa ai le tulaga maualuga o le silasila mamao a le Malo, i le puipuiga malu o le atunu’u mai le ono ofi mai ai o lenei fa’ama’i oti.
Na fa’ailoa ai e lea tamāli’i o le atunuu, lona agaga fa’afetai i le Atua, i lana puipuiga ia Samoa, lea o lo’o tumau ai lona agalelei, e ala i le leai o se tasi e a’afia i lenei fa’ama’i, sa ia fa’afetaia fo’i le Malo i le tofā mamao, ma le fa’autaga loloto, ua fa’ata’oto ai lenei fuafuaga ina ia tapunia tuāoi fa’avaomalo, auā o le mea mautinoa o le auala lea o le fa’ama’i e ono o’o mai ai i totonu o Samoa.
O le fautuaga e pei ona saunoa Malagamali’i, ona o le fa’ama’i o lo’o sasao fa’aafi i le lalolagi, e leai se tagata e mafai ona o’o i ai sona silafia.
“O le fa’ama’i lenei e le’o se fa’ama’i e fia fa’aāli ai le malamalama o se tagata, o se fa’ama’i ua fa’aigoaina e le lalolagi o le fa’ama’i oti.
“E na’o na ou fautua atu, i nai o tatou tagata o lo’o fia malaga mai i Samoa, ina ia mau le to’ovae ma lava pea le onosa’i, ona o lea e va’ava’ai atu, e o’o lava i atunu’u e pito sili ona tetelē tamaoaiga i le lalolagi ua a’afia lava.
“E lē faia i ni tupe pe fai i se atamai o se tagata, ae fa’atino i le fa’autaga o’oo’o ma le tofā liuliu e silafia ai ma iloa lelei ai le tagata e alofa fa’amaoni i ona tagata ma lona atunu’u.
O le molimau a Malagamali’i i lona talitonuga i lenei fa’ama’i, o se a’oa’oga tāua lenei mo le au kerisiano uma i le lalolagi ina ia tumau ma pipi’i ma le fa’amaoni i le Atua Silisiliese.
“Ia tatou malamalama i lona finagalo ma tatou savavali ai i mea o lo’o finagalo ai le Tamā i le Lagi.”
Na saunoa Malagamalii e leai se tulaga fa’aletonu i le taimi sa nonofo va’ava’aia ai i le tulaga o taumafa ma auaunaga masani i totonu o faletalimalo.
O lea ua ma’ea aso e 14, ae ua pei matou o se aiga e tasi, e ui e ‘ese’ese nu’u e omai ai, ‘ese’ese tapua’iga aemaise galuega o lo’o galulue ai.
Sa fa’aleoina e Malagamalii lo latou agaga fa’afetai i le Malo, ona o le saunia lelei o auaunaga tau le puipuiga, fa’apea nofoaga sa latou nonofo ai.
“E momoli atu le agaga fa’afetai i le tatou faigāmalo, e amata mai lava i le tatou Palemia se’ia o’o lava ia te outou o lo’o vae ma lima i le tamā o le atunuu mo le tapenaina o lenei fa’amoemoe, o se tapenaga e aogā tele, i le taofiofia o le o’o mai o lenei fa’ama’i mata’utia i Samoa.
E o’o mai i le asō e 896 le aofa’i o tagatanu’u a Samoa ua taunu’u mai Niu Sila..
• le malaga i le aso 22 Me 2020 e to’afa (4)
• Aso 29 Me e 146
• Aso 12 Iuni e 152
• Aso 27 o Iuni e 300
• ma o le malaga lata mai lea na taunu’u mai le vaiaso na se’i mavae, aso 10 Iulai 2020 e 294 le aofa’i o i latou na malaga mai ai.
O i latou uma foi ia, sa nonofo va’ava’aia i nofoaga na saunia e le Malo, e taofia ma nonofo va’ava’aia ai mo le 14 aso e afua mai le aso na taunuu mai ai i Samoa.
O i latou ia e to’avalu, sa nonofo va’ava’aia fa’atasi ma Malagamali’i i le Aniva’s Place mo le 14 Aso ona o le Koviti – 19.
1. Malagamali’i Nu’ufau Lavea Levi
2. Tautaiauli Maselino Tovia
3. Usufonoimanu Hana Tovia
4. Su’a Tupuola
5. Sipaea Tupuola
6. Leiataualesa Peseta Siliga Leiataua-Lavea
7. Anna Toleafoa
8. Tutuimau-Le-Malo-i-Faimata N. Schuster
