TOE TOFIA TUILAEPA E TA’ITA’IA LE HRPP MO LE PALOTA 2021
Tusia: Tusiga Taofiga
I le mae’a ai o le feiloa’iga a le Vaega Fa’aupufai e Puipuia Aiā Tatau a Tagata le HRPP, ua toe autasi ai Sui Faipule uma o le Vaega Fa’aupufai, ina ia fa’aauau Tuilaepa Sailele Malielegaoi, ma Ta’ita’i o le HRPP mo le iva masina auā tapenaga a le Fa’afaletui mo le Faiga Palota tele a le atunuu i le tausaga fou.
Na fa’ailoa e le Palemia, e 43 Sui Faipule o le HRPP na auai i lenei fonotaga ae na’o le to’alua sa le’i auai atu ona o lo’o gasegase le tasi ae o lo’o i Savai’i le tasi.
Na manino i le feiloa’iga a le Palemia ma le Au Tusitala, o le Palota a le HRPP sa tu’ufa’asolo le avanoa e saunoa ma fa’ailoa ai le finagalo o le Faipule latou, e fa’ailoa se tasi ua ia finagalo e ta’ita’ia tapenaga a le HRPP ma le Faigamalo mo le Palota o lumana’i nei.
Peita’i na ia saunoa manino, e leai se tasi na au ‘ese lona finagalo, i le toe fa’aauau ai pea o ia mo le tofi o le Ta’ita’i o le Malo.
Na talosagaina fo’i e le Palemia, Sui Faipule o le HRPP, ina ia fa’aauau pea Fiame Naomi Mataafa ma Sui Ta’ita’i, o le Sui Palemia foi mo lenei taimi seia mae’a le Palota o le tausaga fou ma na talia ma le fiafia e le Vaega atoa le talosaga ua fa’atuina.
Mo le Fa’afaletui a le HRPP, e mae’a le aso ananafi (Aso Lua, 14/07/2020), ua 49 Sui Tauva fou ua resitala o latou suafa e tamomo’e mo le tagāvai o le Vaega Fa’aupufai e Puipuia Aiā Tatau a Tagata (HRPP).
I lea 49 Sui Tauva fou, ae 45 Sui Faipule o le Palemene, ona atoa ai lea o le 94 o Sui Tamomo’e mo le HRPP i le taimi nei, peita’i na fa’ailoa e Tuilaepa e i ai le talitonuga e mae’a ane le resitala i nai masina o lumana’i, ua silia i le 100 Sui Tauva e fia tauva mo le tagāvai a le Vaega Fa’aupufai a le HRPP.
O lo’o fa’agasolo pea i le taimi nei, resitala mo Sui Tauva fou e fia tamomo’e mo le Vaega Fa’aupufai a le HRPP, auā le Faiga Palota o le tausaga 2021.
Peita’i o le Aso 12 o Oketopa lea ua mautinoa o le a tatala ai le avanoa mo le fa’auluina atu o Sui Tauva uma o le a tausinio mo le Filifiliga tele a le atunuu i le tausaga fou mo le umi e lua vaiaso seia tapunia i le aso 23 o Oketopa 2021.
Na fa’ailoa e le Palemia, na ia nofo sauni lava po’o le a le i’uga o le faiga filifiliga ma le tofā sasa’a a le latou Fa’afaletui, pe tumau pe suia fo’i se tasi, e fa’alogo lava ma usita’i i le finagalo autasi a Ta’ita’i o le HRPP, peita’i na autasi lava le tofā i le Fa’afaletui atoa, ma ua toe tula’i ai Tuilaepa e fa’aauauina le tofi Palemia, ma le Ta’ita’i o le HRPP i lenei taimi seia mae’a le Palota tele i le tausaga fou, ona toe fono lea o le Vaega Fa’aupufai pe a toe tula’i mai i le foe mo le ta’ita’iga o le Malo, mo le filifilia o se Palemia fou o Samoa mo le isi lima tausaga.
