FESOASOANI MO LE AUFAIGALUEGA RSE A SAMOA I NIU SILA
Tusia: Tusiga Taofiga
O lo’o maua pea e sitiseni Samoa ua mae’a konekarate i galuega fa’avaitaimi (RSE) i Niu Sila, fesoasoani mai lea Malo a’o fa’atali ai taumafaiga a Malo e lua mo le toe fa’afo’i mai ai i Samoa nei.
O lea fesoasoani na fa’alauiloa mai e le Minisita mo Tagata Pasefika a le Malo o Niu Sila, Aupito Tofae Su’a William Sio, i le fa’atalanoaga ma le Leitio a le Radio Samoa i Aukilani.
Saunoa Aupito e fa’apea, ua fetaui tonu le mae’a o konekarate a i latou nei, ma le o’o i le tau malūlū, peita’i na fa’ailoa e le Minisita o Femalaga’iga a Niu Sila, o le a taumafai e toe fa’aopoopo aso o pemita faigaluega a i latou nei, fa’atasi ai ma le ofoina ai o nisi galuega fa’aopoopo e ‘ese mai galuega sa galulue ai, i le naunauta’iga atoa o le Malo o Niu Sila i le faigapa’aga ma le Malo o Samoa, ia i ai se tupe maua mo i latou auā le feagai ai ma le tulaga ma’ale’ale ona o le Koviti – 19 o a’afia ai le lalolagi atoa.
Ma o le ala lena o lo’o fa’agasolo ai pea fa’atalanoaga ma kamupani e maua ai galuega a i latou nei, mo le fa’atanaga e fa’afaigaluega ai i latou nei, mo se taimi lē tumau.
Saunoa Aupito e fa’apea;
I fa’atalanoaga ma le Malo Samoa, o lo’o manino ai le aiaiga ua tu’uina atu e Samoa ina ‘aua ne’i silia i le 300 le aofa’i o tagata e malaga mai i se va’alele, ina ia o gatasi lea fuafuaga ma tapenaga o fale apitaga e nofo va’ava’aia ai i latou nei mo le 14 pe a taunu’u mai i Samoa.
Na manino fo’i i le saunoaga a le Minisita, o lo’o taumafai malosi le Malo Niu Sila ma Samoa ina ia i ai se isi malaga fa’aopoopo e lua i ai va’alele mo le vave tu’uina mai o tatou tagata sa galulue i galuega fa’avaitaimi ua mae’a konekarate, ma ua tatau ona toe fo’i mai i le atunuu.
Na fa’ailoa fo’i e Aupito, o le va’alele sa na’o uta e ave ai, lea ua fuafua o le a malaga fa’apitoa mai mo le aumaia o nisi o Samoa sa i galuega fa’avaitaimi, e lua i ai malaga fa’apitoa i le taimi e tasi.
I le taimi nei, e na’o le tasi le malaga ua taunu’u mai Samoa, sa auina mai ai nisi o tamafanau a le atunuu sa galulue i nei galuega fa’avaitaimi i Niu Sila.
I le saunoaga a le Ofisa Sili o Pulega a le Matagaluega o Pisinisi Alamanuia ma Leipa, ia Pulotu Lyndon Chu Ling, o lo’o fa’amuamua pea Niu Sila i le taimi nei, ona ua amata fa’a’iti’itia tagata a’afia mai lenei fa’ama’i mata’utia, peita’i o Ausetalia o lo’o fa’aauau pea ona fa’atupulaia le numera o tagata a’afia i le Koviti – 19 i aso ta’itasi.
E le’o moemoenoa le Malo Samoa tauala atu i le Matagaluega i auala talafeagai e aumai ai a tatou tagatanu’u ua mae’a galuega fa’avaitaimi sa galulue i totonu o Niu Sila e fa’apea fo’i i Ausetalia.
