FOA’I A SAINA MO SAMOA AUĀ TAPENAGA MO LE KOVITI – 19
Tusia: Taunuuga Toatasi
Ua toe agalelei fo’i le Malo o Saina mo le Matagaluega o le Soifua Maloloina, e ala i se foa’i o meafaigaluega e fesoasoani ai i tapenaga a le Soifua Maloloina mo le tali atu i puipuiga mai le Koviti – 19 pe a a’afia ai Samoa.
O lea fesoasoani e aofia ai tali fofoga (masks) ofu mo puipuiga (fluid-resistant isolation gowns), vailā’au mo togafitiga, mea faigaluega mo su’esu’ega (testing kits) ma isi ituaiga mea faigaluega e fa’aaoga mo togafitiga i le falema’i.
O lenei foa’i e lē na’o le Koviti – 19 o lo’o fa’apitoa ai, peita’i i ai fo’i ma nisi o meafaigaluega e fa’aaoga mo le auaunaga lautele i le Matagaluega o le Soifua Maloloina.
O lea fesoasoani sa fo’ai atu e le Amapasa o le Malo Saina i Samoa – Chao Xiaoliang i le Minisita o le Matagaluega o le Soifua Maloloina, Faimalotoa Kika Iemaima Stowers ma le agaga atoa o lea Malo, ia lava tapena Samoa, i ana gaioiga fa’alesoifua maloloina, e tali atu ai i le ma’emae’a o lea fa’ama’i oti pe a ofi mai totonu o le atunuu.
E ui e le’i fa’ailoa se aofa’i o le seleni sa fa’atupeina ai lea fesoasoani, ae na saunoa le Minisita i lana saunoaga autu e fa’apea, o le faigapa’aga lava lenei a Malo e lua, ua savalia le 45 tausaga talu ona fa’avaeina.
Ma o le fesoasoani lenei ua tu’uina mai e le Malo o Saina mo le Matagaluega o le Soifua Maloloina, o le ata vaaia lea o le maua’a pea o lenei faigapa’aga fa’aleuo i le va o Malo e lua.
“Matou te taliaina ma le agaga fa’afetai tele ma le fa’agae’etia, nei masini mo le fa’aaogaina i tulaga tau togafitiga, fa’apea foi ma mea faigaluega mo le malu puipuia o le aufaigaluega.
“Ua talafeuga lava ma lenei vaitau o le utiuti ma le maua gatā o vaega nei, ona e lē’o toe po malaē i le tulaga pagātia ua iai le lalolagi i le Koviti 19,” na saunoa i ai le Minisita.
O se fesoasoani tāua tele lea ua taulimaina e le Matagaluega e pei ona saunoa Faimalotoa, ona taimi lenei o lo o fa’amamaluina le Poloaiga o Fa’alavelave Tutupu Fa’afuase’i (S.O.E) ae o le agaga fa’agae’etia, o le mautinoa lea o lo o lava masini ma mea faigaluega mo tapenaga e tali atu ai le Koviti 19, fa’apea ma isi fa’ama’i pepesi.
“E avea ai a’u e fai ma sui o le Malo o Samoa ma ona tagatanu’u, e momoli atu le agaga fa’afetai tele, i le Amapasa ma le Malo o Saina, fa’apea ona tagatanu’u, e tusa o le fesoasoani ua taulimaina, e fesoasoani ai i le Malo o Samoa ma ana tapenaga, e tali atu ai i le fa’ama’i o le Koviti 19, fa’apea nisi o fa’ama’i pipisi o foufou mai.”
E uo i aso uma ae uso i aso vale, o le maua’a lea o le faigapa’aga a Samoa ma Saina e pei ona saunoa le Amapasa o Saina i Samoa, talu mai lona amataga.
