O SOU MANATU!
E 60 le aofa’i o pusa la’u oloa (containers) o a’ano o moa lea e auina mai atunu’u i fafo mo le fofoga taumafa o le atunu’u i le masina. Ua tele tupe a le atunu’u e fa’aalu i le fa’atau mai o mea’ai a moa. Peita’i, o lea ua mafai ona gaosi le mea’ai a moa i totonu lava o Samoa e fa’aāogaina ai lava oa fa’alenatura o lo’o i ai.
O le fa’amoemoe o le Malo ina ia tu’u’iti’itia i lalo ifo o le 50% le manaoga e fa’alagolago ai Samoa i meaa’i moa o lo’o auina mai atunu’u i fafo, ma le gaosia lava i Samoa o fuāmoa ma ā’ano o moa mo le fofoga taumafa ina ia le gata e fa’alagolago lava tatou iā tatou mea fafaga, a ia paū maualalo ai fo’i ma le tau e fa’atauina mai ai nei taumafa mo le atunuu atoa.
O le a sou finagalo i lenei vaaiga mamao a le tatou Malo mo le fa’amāmā avega i le atunu’u lautele?
Meipo Tu
50 tausaga o Saleimoa
O a’u e fai la’u lafu moa, a’o le fa’afitauli lea e i ai o meaai. O mea’ai masani lava lea e fafaga ai la’u fagaga o le pegu, a sioki le popo, ua fa’atau mai le alaisa. Ae a tagataga’i i le tupu a le moa, e tolu, fa masina e te vaai atu lava e le’i taitai o’o i se taimi e aogā ai pe fa’aaogā fo’i i se taumafataga.
Ae afai o lea ua mafai ona gaosia i Samoa mea’ai moa, o se fuafuaga ua talafeagai lelei. Atonu o se fesoasoani tele lea mo matou le aufai lafumoa e maua ai le avanoa o matou lea i tua i nu’u e aga’i atu, e aumai mea’ai e fafaga ai matou moa, ina ia aogā mo le fofoga taumafa o aiga, aemaise o fa’alavelave fai. E i ai fo’i lo’u talitonuga, atonu o le a tali mai fo’i lenei fagaga moa i se taimi, aemaise lava matou e lima vaivai, auā a fai nei, ae ou to’aga e fafaga a’u moa ma vave ona tutupu ma lapopo’a, ave lea e fa’atau atu i kamupani o lo’o latou sapalaia faleoloa, o le a maua ai fa’amanuiaga tau seleni e tausi ai aiga.
Tafai Tautua
47 tausaga o Afega
E i ai lo’u manatu o taumafaiga ia a le Malo ua leva ona fuafua, a’o lenei fa’atoa fa’agaioi ina ua maua fesoasoani ma pa’aga e galulue fa’atasi ina ia tino mai.
Atonu o se fuafuaga lelei lea mo le manuia o Samoa, auā o lea ua tatou molimau i le tele o atunu’u o le lalolagi ua a’afia i le Koviti – 19, atonu o atunu’u ia e sapalai mai ai a’ano o moa mo Samoa, e i’u na alualu lē mafai ona toe aumaia ni moa mo meaai a le atunu’u.
Atonu o le fuafuaga lea o le a taunu’u ai tala e masani lava ona fa’alogo o fai mai ai mātua i aso ua mavae, tatou galulue lava tatou ina ia mafai ona fai mea tatou te ā’ai ma feola ai, ina ia ‘aua ne’i ola fa’alagolago i isi.
O a’u e leai ni a’u lafu moa, ae fa’aleo le agaga fa’afetai i le Malo, ona o le mata’ala i atina’e fa’apea. O ai na iloa, e uma ane le fa’ama’i fa’apea mai atunu’u ia o lo’o aumai ai moa a Samoa, ua leai ni latou moa.
Ae a fafaga lelei a tatou moa, atonu o moa ia o le a tua i ai i le lumana’i. Atonu fo’i a manuia taumafaiga a le Malo, o le a tu’u’iti’itia ai le tau o moa ina ia gafatia lelei e aiga.
Petelo Ma’a
49 tausaga o Taufusi
Talu ona ou ola mai, o le pegu lava e fai mai o’u mātua e fafaga ai moa. A’o le fa’afitauli, e uma le masina e tasi o fafaga, ta te tilotilo atu lava, o le telē lava lea o le moa sa i ai o la lava e i ai, e le tupu lona tino. E umi lava se taimi e fa’asao ai le moa, fa’atoa maua se moa lapo’a lelei ma ā’anoa.
E momoli ai le fa’afetai i le Malo, ona o atina’e o lo’o taumafai e fa’atino mo le manuia lautele o le atunu’u. Auā o nei atina’e e le na’o tatou e manuia ai, e uma atu tatou ae fotua’i mai isi augātupulaga e fai mo latou.
Ae talosia ia le fa’amoemoe o le Malo, ina ia tino mai ma aogā mo tatou uma, ina ia ‘aua ne’i fai nei ae tu’u taeao. Ae o le taimi fo’i lenei tatou te toa’aga ai e fai a tatou lafu moa, auā e i ai lo’u taofi, afai e alualu ai pea le fa’ama’i lenei o le Koviti – 19, e i’u ina tatou fa’alogo atu, ua fa’apea mai kamupani tetele nei o lo’o auina mai ai moa mai fafo, ua leai ni lafumoa e fai ai pusa moa, a’o lea e i ai a tatou lafu moa tatou te tua i ai. E lelei lava le tapenapena mamao, ina ia tupu mai ni pefea, ae o lo’o i ai meaai tatou te tua i ai mo le fofoga taumafa o le atunu’u atoa.
Nu’umaali’i Fialelei Petelo
51 tausaga o Luatuanu’u
E tusa ma le 50 le aofa’i o moa i la’u lafu moa o lo’o i ai i le taimi nei. O fagaga matou te tua i ai taimi mo fa’alavelave a aiga ma mea fai a ekalesia ma le nu’u. O galuega lava ia e fa’atino e matou i totonu o nu’u, o le faiga o ma’umaga, o lafu moa ma lafu pua’a, auā o mea ia e tua i ai aiga i mea fai.
O le fa’amoemoe o le Malo e pei ona i ai le gaosia o meaai a moa, o se fa’amoemoe ua leva ona tatau ona fa’atino pe a fua le taimi lenei o le fa’ama’i. Ua tatau ona tatou tua ia tatou fagagamoa, ae fa’atuatuana’i ia le tatou fa’alagolago i ā’ano o moa o lo’o auina mai fafo.
Afai e manuia le fa’amoemoe o le Malo, ou te talitonu o le a manuia Samoa atoa. O le a tele a tatou moa e sapalaia pisinisi mo le fa’atauina atu mo le fofoga taumafa o le atunu’u i se tau maualalo. O le a manuia fo’i aiga, aemaise lava i latou o lo’o fai fagaga moa, e fafaga lelei ai a latou moa, a fai ua le fa’aaogaina i se fa’alavelave pe taumamafa ai fo’i, ona ‘ave lea e fa’atau e maua ai se seleni e fai ai se isi mea o le aiga o lo’o mo’omia ai.
O se fa’amoemoe tāua tele, ma e momoli ai le fa’afetai i le Malo, ona o le tofā mamao, e fa’atino ia ituāiga atina’e, auā e i ai lo’u talitonuga na’o atunu’u i fafo e mafai ona fa’atino ai lea faiga, ona o lo’o i ai masini fa’apitoa e fa’aāoga, a’o lenei ua taumafai i ai le tatou atunu’u, Malo faafetai! Fa’afetai i lo outou silasila mamao i le lumana’i o alo ma fanau o Samoa, auā e lē mo tatou nei, ae mo tatou fanau i le lumana’i.
Menima Ioane
59 tausaga o Letogo
O se fa’amāmā avega tele lea mo tatou mo le aga’i atu i le lumanai. O atina’e fa’apea o lo’o mo’omia tele e o tatou tagata, o atina’e tatou te tua i ai i le taimi lenei i le feagai ai o le lalolagi ma fa’afitauli o le Koviti – 19.
O le taimi nei tatou te a’apa lava i galuega a tatou lima tatou te fa’aāoga, lea fo’i ua a’apa mai le Malo e fa’agaioi lea atina’e, e lagona ai lava le fiafia ma le fa’afetai. O lea e va’ava’ai atu e le’o ni atina’e e manuia ai isi tagata, a’o atina’e e manuia ai o tatou lava tagata ma nai a tatou fanau i le lumana’i.
O le taimi nei ia tatou toa’aga e fai lafumoa, ia mae’a mai ona gaosi mea’ai moa, a la ua i ai lafumoa e fafaga i meaai ia, ina ia vave ona tali mai mo tatou. E leai lava nisi tatou te fa’alagolago i ai, tatou te fa’alagolago lava tatou ia tatou ma le atina’e o tatou aiga, nu’u, ekalesia ma le atunu’u.
O taumafaiga fo’i o lo’o fa’atino i le taimi nei, o le lumana’i na mo tatou fanau o lo’o fai mai, auā e amata e tatou ae fa’aauau e latou taeao aemaise isi augātupulaga o lo’o fai mai.
Gustava Va’asili
50 tausaga o Faleula
O le gaosiga o mea’ai a moa i totonu o le atunu’u o se mea ua leva ona tatau ona fai. A tatou taga’i i le taimi nei i vaemoa ia e auina mai fafo, o isi taimi ua aumai le pusa moa oka! e le taitai lava se aiga i se vaemoa se tasi.
O isi taimi e aumai vaemoa, oka! ua pei lava gi alaga pua’a (tulou) le lapopo’a. Ae afai pea i totonu o Samoa mea’ai e fafaga ai a tatou moa, e le taitai toe māsalosalo, auā o lea fo’i ua tatou fa’aāogaina vailaau mai atunu’u i fafo e gaosi ai tatou mea’ai moa.
O isi taimi e tau masalosalo ai le loto pe sa’o pusamoa ua aumai, ona o le tulaga i le ‘ese’ese o le lapopo’a o moa.
E i ai lo’u mafaufau o se fa’amoemoe lelei lea mo matou le aufai lafumoa, auā o le taimi nei, ua masani tatou i le lapopo’a o tatou fagaga o lo’o i ai, ona o mea’ai o lo’o fafaga ai.
O la’u lafumoa e fa’aāoga lava le pegu, e i ai aso ua leai ai ni popo, ona fa’atau mai lea o le alaisa e fafaga ai. Ae fa’afetai lava i le Malo, ona o lea o le a i ai lava le mea’ai e patino mo le fafagaina o moa.
Atonu a manuia ia taumafaiga, o le a maua e tatou ni mea’ai moa taugofie, e fafaga ai lafumoa ina ia lelei ā’ano auā le fofoga taumafa, aemaise o fa’alavelave fai a aiga.
