SOU MANATU!
O le Facebook ua to’atele le mamalu o le atunu’u o lo’o latou fa’aāogaina e feso’ota’i ai i aiga fa’apea a latou fanau o lo’o aumau i atunu’u i fafo aemaise le fa’alauiloaina o auaunaga tau pisinisi i le atunuu.
Peita’i ua avea le facebook ma ala ua to’atele ai tagata ua latou fa’aāoga sese, e ala i le fa’aāogaina o tusitusiga ma fa’amatalaga lē fa’avāea e fa’aleaga ai tamāli’i’aga,
fa’asinomaga ma le ta’uleleia o se tasi, e aofia ai ma le fatu o tala e talepe ai le filemu ma le ta’uleleia o galuega fitā a Ta’ita’i o le Malo o lo’o fa’atinoina mo le lumana’i manuia o Samoa aoao.
O le ala lea ua tonu ai i le finagalo o le Malo, i le ono tapunia ai o le facebook i le taimi o le Faiga Palota Tele a Samoa 2021, i le manatu laualuga o Ta’ita’i o le Atunuu, ia taofiofi le so’ona fa’aāoga fa’alētatau o lea auaunaga e fa’asalalau ai ni tu’ua’iga ogaoga ma matuiā aemaise o ni fa’amatalaga lē fa’avāea e oia ai le nonofo filemu o le atunuu ao feagai ai ma lana Faiga Filifiliga.
O le a sou finagalo i lea fuafuaga a le Malo, ona o le tofā mamao ia tumau pea le filemu o Samoa e aunoa ma le fevaevaea’i ona o fa’asalalauga nei lē fa’avāea?
Ligaliga Toma Ese
Fasito’o – Tai
70 tausaga o le soifua
Ua talafeuga lelei le fuafuaga a le Malo. Silasila fo’i i le vaitaimi lenei, ua tele nu’u ma afio’aga ua a’afia ona o nisi o tagata latou te so’ona lafo fa’amatalaga i isi tagata. O le taimi nei i le matou nu’u ua fai sala, o ai lava le tagata e maua o so’ona fai ni fa’amatalaga e fa’aleaga ai se isi, aemaise o fa’amatalaga e so’ona fai i luga o le facebook, e a’afia ai lagona o tagata aemaise o upu so’ona lafo ua le tautamāli’i i le silasila a le atunu’u, e i ai sala a le matou nu’u e tu’uina atu i lena tagata.
I lo’u manatu na’o a’u, afai e alofa moni le tagata i lona aiga lona nu’u aemaise lona atunu’u, aisea e ala ai ona so’ona fai ia fa’asalalauga taufa’aleaga i luga o le facebook. O le facebook o le auala vave lea tatou te feso’ota’i ai i fanau ma aiga i atunu’u mamao, ona e taugofie, ae lē o se facebook e fa’aleaga ai e le isi tagata le isi tagata.
E le’o se facebook fo’i na fai e tu’u ai luga fa’afitauli o lo’o maua ai se tagata, ina ia iloa mai e le lalolagi le fa’afitauli o lo’o e nofo ma oe. O fa’afitauli lava ia o le tagata, o le mea patino lena ia oe, auā e lē fo’ia e se isi ou fa’afitauli, o oe lava e fo’ia ai fa’afitauli. E o’o lava i fanau aoga, oka! e i ai lo’u taofi e sili atu mea ua iloa e tamaiti aoga nai lo mea ia e iloa e tagata matutua i le fa’aāogaina o le facebook.
Edwina Matautia
Vaimoso
40 tausaga o le soifua
O se fuafuaga talafeagai lea ua fa’ailoa mai e le Malo. I le taimi nei, a tatou tilotilo i le tupulaga talavou i le malosi o le facebook, e mata’utia. E i ai le taimi tatou te fiu ai e taumafai a tatou fanau, ona o le tulaga lea ua i ai, ua alualu i luma le olaga, ma ua televave fo’i le iloa e tamaiti i le fa’aāogaina o telefoni nai lo tatou le au matutua. Tatou te fiu fo’i e ave’ese telefoni ma fanau, e lē taitai uma ai, ona o le taimi nei ua tele ina taugofie telefoni, ua mafai lava e le tamaititi ona alu fa’atau le telefoni, ua le ano i se mea’ai e ai i le aoga, ae fa’aputu le tupe e fa’atau ai le telefoni e fai ai le facebook. E pei o le tulaga lena, ua talafeagai lelei le fuafuaga a le Malo ua fa’ata’atia.
A tatou alolofa i tatou fanau ma o latou lumana’i, o le mea lena e tatau ona fai. O le a malosi tamaiti i le telefoni e fai ai facebook, ae ua le toa’aga e fai meaaoga, ma fai tiute i totonu o aiga. Auā o le tulaga lea e i ai, e fiu e valaau se tamaititi i se feau, a la lava e ano i le faiga o le facebook, na pei lea a sasa atu, ae fa’apea mai o le fa’asaunoa ma le so’ona fai o tamaiti, ae leiloa o lea e taumafai e foia le tulaga lea, ona o le isi lea fa’afitauli tele e tula’i mai nisi o tupulaga, o le facebook e ala ai ona leiloa e le isi tama po’o le teine le va tapuia ma matua.
Sandra Laufili
Saleimoa
40 tausaga o le soifua
I totonu o so’o se afio’aga o lea ua mamalu pulega a ali’i ma faipule, ma o lo’o i ai fo’i sui o le Malo i totonu o nu’u ma afio’aga, ina ia galulue fa’atasi e mata’itu le tulaga lea o tagata o lo’o latou fa’aāoga sese le facebook. E matua’i ave lava le fa’amamafa i le tulaga lea, e tatau fo’i ona matuā tu’u i ai fa’asalaga ina ia tu’uitiitia ai le ‘ave o lapisi ma fa’aleaga ai fua manatu o isi tagata.
Na’o le maua lava, ona aami lea ma ‘ave i ai se fa’asalaga, ina ia fai ma a’oa’iga le so’ona ‘ave o fa’amatalaga sesē ma lē fa’avāea i luga o le facebook, ae o lo’o tilotilo le lalolagi, ma avea ma ala e tigā ai fua loto ma finagalo o nai isi tagata. E leai ma se tasi e lē lagona le feau tāua o lo’o momoli mai i le faiga lea, pe afai e lē fa’atinoa. E fa’atino loa le fuafuaga lea, e i ai lo’u talitonuga e leai ma se isi e toe avea ni fa’amatalaga sesē, a’o ni fa’amatalaga fo’i e fa’aleagaina ai se isi i le lumana’i, ona ua iloa ma mautinoa, e maua loa, o lona uiga e le gata e a’afia le tagata lea, ae a’afia fo’i ma lona aiga.
Afai o le finagalo lea o le Malo ina ia foia ai lea fa’afitauli, ou te iloa ua talafeagai fo’i. A silasila fo’i i le vaitaimi lenei, ua to’atele tagata ua ma’imau o latou soifua, o ulugali’i ua tete’a ona o lenei lava uiga o le ‘ave o fa’amatalaga e a’afia ai mafutaga, ae i lo’u lava talitonuga, e leai ma se pisinisi a le isi i le ulugali’i a isi.
Siaosi Malili
Falefa
76 tausaga o le soifua
E moni lava le fuafuaga a le Malo, auā a silasila fo’i i le tulaga ua i ai le fa’aāogaina o le facebook, tele fanau ua latou leiloa le vā fealoa’i. Ua sopoia fa’amatalaga e fai ma ua tele ina a’afia ai aiga, nu’u ma le atunu’u. Ua i ai fo’i afio’aga ua amata ona fai a latou fa’asalaga e āfua mai i mataupu nei o le fa’aāoga lē tatau o le facebook. Ua ‘ave ai luga o le facebook tala lē manuia ma tala e lē talafeagai i le vaai atu o tagata. O le matou nu’u e $3,000 le fa’asalaga e tu’u atu i le tagata pe afai e maua o lo’o ia fa’aāoga sesē le facebook.
Silasila fo’i, o le facebook e pei o se telefoni, tau tala tu’u mai le telefoni ona e tele tupe ma telē ai pili telefoni i le fa’aāogaina pe afai e fia feso’ota’i i fanau ma aiga i atunu’u i fafo. A’o le facebook, e pei o se auala lea ua tatou fa’aaogaina e feso’ota’i ma talatalanoa ai po’o le a lava le umi, a’o la lava e talanoa. E le’i fa’apea na tatou nonofo nonofo fai e papalagi nei mea, na fai ona o tulaga tau feso’otaiga i lona tulaga āoga, a’o lenei fo’i ua fa’aāoga sees e o tatou tagata e fa’aali ai lona malosi ma fa’atigā ai finagalo o nisi o le atunu’u.
Ae afai e silafia e le Malo o le fa’amuta ona toe fa’aāoga e o tatou tagata o le facebook e foia ai fa’afitauli e pei ona tula’i ai, aisea e tu’u ai, ona tatou tilotilo loa laia lea, i le faitio lea la’a i ai pe a toe fa’aāoga lava telefoni e feso’ota’i ai e aunoa ma le fa’aāoga o ia auala faigofie toe taugofie sa maua. O mea ia sa tatau ona manatunatu i ai le to’atele o lo’o latou fa’aāoga sesē le facebook, auā e fai e latou, ae o le a a’afia uma ai le atunu’u atoa o lo’o latou fa’aāoga tatau le facebook mo feso’ota’iga.
Sealina Ome
Nu’u
74 tausaga o le soifua
Ou te matuā ioe ma talitonu i le fuafuaga a le Malo ua i ai. O le tulaga lea o lo’o i ai nei, matua’i leiloa lava e le isi tagata le isi tagata i luga o le facebook. E o’o fo’i la’u fanau, oka! pei lava o le mea fua le alu o lima i luga o le telefoni, ae a fai atu nei se feau, toeititi atoa le itula o alu e fai.
E i ai lo’u taofi o le mea lea ua leaga ai tupulaga, ma ua tutupu mai ai fa’afitauli i le va o aoga i totonu o le atunu’u. Silasila fo’i i aso ua tuna’i, e seāseā ni aoga omai fufusu i totonu o le taulaga, ua laki nei ua mafai ona fo’ia e le Malo fusuaga ia e masani ona tutupu. E mafua ona tutupu nei mea, ona o lea e tu’u atu e mātua, e fa’aāoga le initaneti e fai ai meāaoga, ae le’o iloa atu e ‘ese fo’i le mea la e fai mai le isi itu.
O tamaiti ua televave le malamalama i nei mea, e lē pei o le matou vaitaimi, e fa’aāoga lava tamatama’ilima e fai ai le tō’ese ma le fa’aopoopo, fa’aāoga tala tu’u taliga mai tuaā e fai ai lata aoga. A’o le taimi nei, e alualu i luma le olaga, ua fa’aāoga auala fa’aneionapo e fai ai aoga, a’o lenei fo’i ua ‘ese le lalolagi ua fa’asaga i ai tagata ma le fa’aāogaina fa’aletatau o le facebook.
I lo’u la manatu i ai, e sili ai le fa’amuta. ‘Aua ne’i toe fa’aāoga e nisi le facebook, ae toe fo’i le mea sa i ai, fai le tusi ma lafo i le fale meli e feso’ota’i ai aiga. Sa fai fo’i nei mea tatou te feso’ota’i atu ai i fanau ma aiga, i le atia’eina o aiga, a’o lenei fo’i ua sesē ona fa’aāoga. E sa’o ai le isi toeaina, na aumai fo’i le se’evae e se’e ai vae ae tago fo’i ū i nifo. Ua leiloa e le Malo fa’avasega ituāiga tagata e i ai tagata ia, o le mea la e tatau ona fai, fa’amuta loa, ona uma lea o le pisa.
Mapu Timu
Lotopa
69 tausaga o le soifua
O le facebook e lelei mo feso’ota’iga ma fanau ma aiga i atunu’u i fafo fa’apea fo’i ma Samoa nei. Peita’i o le fa’aāogaina sesē e nisi o tagata, o le ala lea ua ta’uleagaina ai lenei auala o feso’ota’iga.
Ae afai o le fuafuaga lea a le Malo ona o uiga nei o tagata, ua alagatatau loa le taofi, mo le puipuiga o le saogalemu, filemu ma le fa’atupuina o le fealofani i totonu o le atunuu, auā o isi tagata ua latou fa’atupu le fe’itana’i i le va o tagata e ala i fa’asalalauga fa’atupu toe lē fa’avāea o lo’o latou fa’asalalauina i lea taimi i lea taimi.
Auā a silasila i ai i le fa’aāogaina e nisi o tagata o le facebook, ou te le’o malamalama pe aisea e ala ai ona fa’aleaga fua e le isi le isi, ‘ave ai fa’amatalaga taufa’asesē e fa’asesēina ai le atunu’u atoa, ma ua i’u ina talitonu ai ni nai tagata i nei fa’amatalaga ma tusitusiga tau fa’aleaga tagata.
E i ai nisi ua latou fa’aleaga tagata ta’ito’atasi ma o latou aiga, a’o le fesili, o le ā le mea a le atunu’u e fai atu i ai i lena tagata ma lona aiga? E tofu lava le tagata po’o aiga fo’i ma fa’afitauli. E tasi lava le tagata na te fa’amasinoa tatou, ua na’o le Atua. O tagata fo’i ia e faia ia amioga, tatou leiloa fo’i po’o a latou fa’afitauli, o lea ua momoli mai i isi tagata, ae le tago ia e tu’u i luga lona tagata ma lona aiga.
E pau la’u fautuaga i ituaiga tagata nei, ‘aua tatou te fa’amasino atu i isi tagata, fai pea lau oe tautua mo le atunu’u ona o lo’o sisila Fofoga o le Alii, e tauia e le Alii le tagata lē fa’amaoni. A fa’amuta nei e le Malo le fa’aāogaina o le facebook, e omai la tagata nei e aumai se isi ala o feso’ota’iga e feso’ota’i atu ai i fanau ma aiga.
E tatau ona tatou fiafia o lea ua maua lea auala tatou te feso’ota’i ai ma feasiasia’i ai i aiga, a ua le mafai ona malaga e asi aiga ona o le pepesi o le fa’ama’i Koviti – 19, a’o lea e i ai auala tatou te feasiasia’i ai, ona pei lava lea o lo’o tatou talatalanoa fa’atasi, ae leiloa e ‘ese’ese nofoaga o lo’o aumau ai.
O le mea lea e le’o iloa e tagata ia e fa’aāoga sesē le facebook. Afai ua tigā lou loto, po’o ai lava o lo’o e mana’o e fa’atasina, o la e avanoa televise fa’asalalau e te alu lelei ai e fai mai ai au fa’asalalauga, ona maimoa atu lea o le atunu’u i ou foliga ma lou tagata, avatu ma ni fa’amaoniga o fa’amatalaga o lo’o e mana’o e iloa e le atunu’u.
Ae ‘aua le fa’aāogaina sesē le facebook, o auala ia o feso’ota’iga o lea matou te feso’ota’i ai ma aiga o lo’o aumau i atunu’u i fafo, po’o a mai latou i lenei vaitau aemaise le tulaga a’afia o le lalolagi ona o le Koviti – 19.
