TAGATA FAIGALUEGA A LE MALO MA LE PALOTA
Tusia: Tusiga Taofiga
So’o se tagata faigaluega a le Malo (public servants), ua i ai lona manatu e tausinio i le Palota, o lo’o manino i totonu o le Tulafono o Faiga Palota, le tatau ai ona fa’amavae mai lona tofiga faigaluega, a’o le’i o’o i le aso e fa’auluina ai suafa o Sui Tauva mo le Palota.
Na fa’amaonia mai e le Komesina o Faiga Palota, Faimalomatumua Mathew Lemisio, so’o se tofiga lava i le Malo, e aofia ai Ofisa Sili o Pulega, Fa’amasino, Sui o Komiti Fa’atonu i Fa’alapotopoptoga Tuma’oti a le Malo, ma so’o se tulaga faigaluega, e tatau ona fa’amavae mai lana galuega pe afai ua mautinoa o le a tausinio i le Faiga Filifiliga a le atunuu.
Na fa’ailoa fo’i e le Komesina, afai e o’o atu i le aso e fa’aulu ai Sui Tauva o le Palota, e te le’i fa’amavae i lau galuega o lo’o e galue ai, o lona uiga o le aso lava e aloaia ai lou suafa ua resitala o se Sui Tauva mo le Faiga Palota, o le aso fo’i lena e faamaonia ai ona lē toe avea oe ma tagata faigaluega a le Malo, ma ua e fa’amavae ai lava mai lau galuega sa e galue ai.
O lenei faiga na fa’ailoa e Faimalomatumua, ina ia tumau ai le mamalu ma le aloaia o le tuto’atasi o tulaga tau tagata faigaluega a le Malo, pe afai ua manatu se tasi ua fia tauva mo le sailia o le Tofi Faipule o lona Itumalo.
I le taimi nei o lo’o i ai nisi o Ofisa Sili o Pulega ua fa’aulu o latou suafa i se tasi o Vaega Fa’aupufai e fia tausino mo le Palota 2021, o lona uiga o i latou nei, e tatau ona fa’amavae aloaia mai o latou tofiga peita’i afai e o’o atu i le aso e fa’auluina suafa o Sui Tauva, ae le’i fa’amavae, e fa’afuase’i lava ona le toe avea ma Ofisa Sili o Pulega e tusa ai ma le Tulafono o Faiga Palota.
