PULEGA O UAFU A SAMOA (SPA)
E $3,040,914 le siaki o tupe fa’asili a le Pulega o Uafu a Samoa (SPA) ua tu’uina atu i le Malo, e fesoasoani i le fa’atupe ai nisi o atina’e mo le manuia lautele o le atunu’u.
O le Sui Ta’ita’ifono o le Pulega, Tuātagaloa Shane Wulf sa ia tauā’ao atu le siaki i le Palemia, Tuilaepa Sailele Malielegaoi.
O le siaki ua taua’aoina, o le 35% o tupe fa’asili a le Pulega mai la latou tupe maua e $8,688,327 i le tausaga fa’aletupe lea na ma’ea i le aso 30 Iuni 2019.
Na momoli le fa’amalo a le Palemia, e tusa ai ma le tautua o lo’o fa’atino e lea fa’alapotopotoga tumaoti a le Malo mo le atunu’u atoa.
Na saunoa Tuilaepa e fa’apea, e i ai nisi o fesili ua tula’i mai, pe aisea e faia ai lea faiga fa’avae?
“O le tali, o fa’alapotoppotoga tumaoti uma a le Malo, e aga’i tasi lava a latou fuafuaga, na’o le latou lava matafaioi o lo’o fa’atino, a’o le Malo o le mea lautele, o lo’o taula’i le va’ai i le atunu’u atoa, o lona uiga, o a tupe maua mai lea fa’alapotopotoga ma lea fa’alapotopotoga, e tatau ona aumai se vaega o tupe maua i totonu o le Malo, mo le fa’atinoina o galuega mo le Malo lautele.”
Ae afai e alualu ua fa’aletonu po’o le a lava le mafua’aga, ona toe tapa mai lea i le Malo, e avatu se fesoasoani, o mea e fa’apea ona fai, e avatu fesoasoani a le Malo e fa’aolaola ai fa’alapotopotoga, ae a ola ona toe fa’ase’e mai lea o se vaega tupe i le punāvai o mea uma, ina ia fa’atino ai galuega fai a le tatou Malo mo le manuia o le atunu’u atoa.
