FAUSIA LE MOLĪ O LE AVA I LE MAUGA O VAEA
Tusia: Taunuuga Toatasi
O le saogālemū o ē folau mai i Samoa e ala i va’a a lalo i luga o sami, o se tasi lea o manulauti o lo’o ave i ai le fa’amuamua a le Pulega o Uafu a Samoa (SPA).
I le saogālemū o va’a ma i latou e folau mai i le vasa ma afea o tatou laufanua, o le ala lea ua fa’ata’oto ai le fuafuaga mamao a le SPA ina ia toe fausia le molī o le ava i luga o le Mauga o Vaea.
Saunoa manino le Palemia, Tuilaepa Sailele Malielegaoi fa’atatau i lenei atina’e e fa’apea, ua leva na tatau ona fa’ataunu’u lenei fuafuaga.
O le molī o le ava e le’o toe lelei, sa fausia i aso ua tuana’i, i le vaitau a o fealua’i le va’a karasini.
“O le taimi lenei ua tu tu fale maualuluga, ua tau leiloa atu le emoemo o le molī o le ava.”
Saunoa le Palemia, ua mae’a fa’agasolo talanoaga mo le saogālemū ma le malu puipuia o va’a e ofi mai totonu o le taulaga, ua mae’a fo’i ona fai le fa’ai’uga, ina ia toe si’i i luga le vaega e tu ai le molī o le ava, ina ia ta’oto mai le mālaelae, e ta’ita’iina mai va’a uma e omai totonu o le taulaga i le saogālemū.
O le ata o le molī o le ava e pei ona saunoa i ai Tuilaepa, o le Satauro, e fau i u’amea ma simā ona fa’aemoemo mai ai lea o le molī.
“O le fa’ailo lava lea o le tatou atunu’u, e Fa’avae i le Atua, o le a fa’aāoga ai le Satauro e tu matilatila mai luga o Vaea, e fa’ailo ai i tagata o le molī lea e ta’iala mo le saogālemū o e folau mai i totonu o le taulaga o Apia, Samoa.”
Ae o se ata fo’i lea e pei ona saunoa Tuilaepa, o le Satauro o le folau o agaga uma o Samoa i le saogālemū i le ola e fa’avavau.
“O se ata lea o le a malaga atu fo’i latou e folau ‘ese atu ma Samoa ma tala’i atu, o Samoa e Fa’avae i le Atua Soifua, o le Satauro o le fa’aolataga,” o le fa’aopo’opo lea a le Palemia.
“O le satauro fo’i lea e fa’ailoa atu ai i le lalolagi atoa ma e malaga mai Samoa o le atunu’u lenei, o le atunu’u kerisiano ma o le molī o le ava o le molimau lava lea, o le susulu o le fa’aolataga.
E ui e le’i fa’ailoa e le Palemia le masina po’o le aso e amatalia ai le galuega, ae na ia saunoa, o le tausaga lenei e amata fa’agasolo ai le galuega, ina ia o’o atu i le tausaga fou ua mae’a.
Ua mae’a ona fa’atau e le Malo le fanua e fausia ai luga le molī o le ava, ma ua toe lava o le amata fa’agasolo o le galuega.
