MALU PUIPUIA, FEALOFANI MA SAOGĀLEMŪ SAMOA
Tusia: Tusiga Taofiga
O le maopopoga o aiga ma le saogālemū o nu’u ma afio’aga i le fa’atumauina o le nonofo fealofani aemaise le malu puipuia o le atunuu lautele, o le naunauta’iga lea ma le vaaiga lautele (bigger picture) a le Malo na ala ai ona fa’avae le teuteuga o le tulafono tau fa’aofi i le Palemene e fa’atapula’a Matai Sa’o i aiga ta’itasi e pei ona tusia i le Tulafono Tau Fa’aofi o Fa’amasinoga o Fanua ma Suafa o lo’o fa’agasolo fa’atalanoaga ma nu’u ta’itasi i le taimi nei.
O le vaai mamao a le Malo (Vision), ia ‘aua ne’i a’afia fua le Malo i le ono tagofia o fa’ai’uga fai i suafa matai ma fanua o aiga ta’itasi, ona ua so’ona fai ma tafili saunoa fa’ai’uga a ulu o aiga, ma oia ai le fealofani o aiga ta’itasi.
E mafua ai ona mana’omia se fesoasoani ma le fa’ai’uga a le Malo i se fofō talafeagai i le lumana’i.
O le tofā mamao lea a le Malo, o lo’o fa’amauina i le Tulafono Tau Fa’aofi e tolu mo le Fa’amasinoga o Fanua ma Suafa ma e le’o pumo’omo’o le silasila a ta’ita’i o le atunuu, i le vaai maualuga ina ia malu puipuia measina o suafa ma fanua o fa’asinomaga ia o aiga ta’itasi.
I lenei vaitau ua molimauina le fa’ata’aloga i vai, o le faia o suafa matai sa’o, ma ua molimauina fo’i le fa’asoloatoa o le tu’uina atu o suafa matai sa’o i so’o se tasi ma ua o’o ina matai ai ma fanauiti, i le talitonuga ua saili tupe ai nisi o matai.
I le tu’uina ai e le Malo o le lima matai sa’o i le Tulafono o fa’atalanoa nei, o se amataga fou i le vaaiga lautele a le Malo, ia taofiofi le so’ona fai o suafa matai o aiga, e tumau ai le mamalu ma le aloaia o a tatou tu ma agaifanua fa’asamoa moni.
Peita’i ua i ai nisi o afio’aga ua tete’e i nei Tulafono ina ua fa’atalanoaina, i le lē malilie i le na’o le 5 o matai sa’o ua fa’atulagaina.
Ae na saunoa le Palemia, Tuilaepa Sailele Malielegaoi, o le tasi lea o vaega tāua o le Tulafono o le a silasila toto’a i ai Palemene pe a toe talanoaina mo se isi suiga talafeagai e malilie uma i ai Samoa aoao.
Na fautuaina e le Ta’ita’i o le Malo, nu’u uma nei, o lo’o atugalu i le aofa’i fa’atulagaina o matai sa’o, ina ia fa’ailoa ane i le Komiti Fa’apalemene o lo’o latou fe’utana’i pe fia aofa’i o matai sa’o o lo’o latou malilie ai, e fa’atapula’a ai aiaiga o le Tulafono, mo le fealofani o aiga ta’itasi.
O le isi silasila mamao a le Malo, o nisi o suafa tāua o nu’u ma aiga, ua na’o na fa’alupe o suafa tāua ae ua lē toe i ai se mamalu, aisea?, ua fa’amauina i nei ona aso, so’o se tasi lava e fia matai, e tatala lava le avanoa e matai ai, pe a lava le seleni tusa po’o le a le matua o le soifua o i ai.
