PA’Ū LE TAU O LE TELE O AUAUNAGA TAU TURISI
Tusia: Asenati Taugasolo Semu
O le feagai ai o le lalolagi ma aafiaga tau tamaoaiga ona o le KOVITI 19, ua faapea foi ona aafia ai se tasi o poutu o le tamaoaiga o Samoa, le auaunaga tau turisi.
O se auaunaga na oo atu i le silia ma le $500 miliona tala le tupe maua a le atunuu na faamauina ai i le tausaga ua mavae, ae peitai, ua pagatia tele lenei alamanuia e pei ona molimauina e faletalimalo ma mataaga na asiasi atu i ai le autusitala/aufaasalalau i le vaiaso ua mavae.
O le vaitau lenei, talu le tapunia o femalagaiga faavaomalo, ma ua le toe malaga mai ai turisi, ua leai ni tupe maua a le tele o faletalimalo ma mataaga, ma ua tele foi lu’itau o feagai ma i latou.
Na tuualalo foi le afioga i le Palemia, Tuilaepa Sailele Malielegaoi i luga o ana poloakalame ma ofisa faasalalau, i faletalimalo ma mataaga, ina ia faapa’ū tau o potu talimalo faapea ma totogi ulufale i latou mataaga, ina ia gafatia e tatou lava tagata, ona agai atu ma tafafao ai.
Na saunoa le sui o le Ofisa o Turisi, Sua Hesed Ieremia, ua tele auaunaga ua pa’ū a latou tau, ma ua tatalo mai foi i le atunuu, ina ia faaaoga avanoa e tafafao ai ma malolo atu i faletalimalo ma mataaga.
“O le tagi a le pumate, i lenei vaitau o le pagatia, ma e moni ua aafia tatou uma, ae mo i tatou e avanoa ma mapu mai galuega, faaaoga o tatou livi (aso malolo) ma agai atu e asiasi i mataaga i tua ma Savaii, tatou feasiasia’i mai le isi itu o le motu/atunuu agai atu i le isi itu,” saunoa ai Sua.
“O lea ua pa’ū maualalo le tau o auaunaga tau turisi, ma e faailoa atu ai i lo tatou atunuu, tatou agai e malolo ma tofafā ai.”
O nei taumafaiga uma a le Ofisa o Turisi e pei ona saunoa Sua, e le gata mo aiga, fanau ae faapea le atunuu atoa.
“O le tatalo a le Pulega o Tagata Tafafao Maimoa mai Fafo, omai tatou opogi faatasi lenei faamoemoe Samoa, aua o tatou e masani i le talimalo. Oa mea tatou te maua lenei vaitau, tatou faafetai pea i le Atua o lea e faasaoina tatou mai le faama’i.”
