O SOU MANATU!
Ua fa’amalosia i le Tulafono o Faiga Palota, le tatau ai i so’o se tagata Palota, ona Resitala ma Palota, pe afai ua e ausia lou 21 tausaga aga’i i luga le matua o lou soifua.
O le naunauta’iga atoa o le Malo, ia fa’atāua lou resitala ma lou Palota, o lou lea sao i le filifiliga o Ta’ita’i o Samoa auā lana Fono Aoao Faitulafono, o lo’o taui ai le lumana’i manuia o Samoa ma ona tagata mo nei ma le lumaa’i.
Auā a sa’o ma atoatoa la tatou filifiliga, o le a mautinoa fo’i le tula’i mai o ni Ta’ita’i, e maua’a lo latou manatu, e tautua fa’amaoni ma alolofa mo Samoa ma lona atina’e.
O le a sou finagalo i le finagalo lea o le Malo, ua afua ai ona fa’amalosia le tatau ona tatou resitala ma Palota, pe ausia lo tatou ta’i 21 tausaga aga’i luga?
Sia Toso
Leauvaa
53 tausaga le matua
Fa’afetai i le Malo i le tofā fetala’i mo Samoa ma ona tagata. E ‘ese le tā’ua o le finagalo o le Malo i le resitala o le tagata palota ma le fa’atulafono o le tagata e fai ai lana palota.
Silasila fo’i, o le faiga palota tele a le atunu’u o lo’o loma nei, o le faiga palota lea o le a fili mai ai ni ta’ita’i latou te ta’ita’ia le atunu’u mo le aga’i i le lumana’i seia aulia le isi faiga palota i le alofa ma le agalelei o le Atua.
Afai o le a le finagalo o le Atua i le faiga filifiliga a le atunu’u o lena. Ina ia ‘aua ne’i toe i ai ni si’uleo e fa’alogoina pe a ma’ea le faiga palota o fa’apea mai, e le’o se matou sui lena, matou te le’i palota i ai. Leai, silasila fo’i, o tofiga uma o le tagata e aumai i le Atua. O ai lava o le a mafuli i ai le filifiliga a le atunu’u po’o Itumalo, o lena. O le sui lava lena o le a fai ma fofoga tau molimoli o Itumalo i totonu o upu fai a le Malo. Ae tatou talosia ia, ia taunu’u ma le manuia le fa’amoemoe o le atunu’u i lana faiga filifiliga, auā e le’o toe mamao.
Tamaalelagi Lualima Tamaalelagi
Asau/ Mulifanua
61 tausaga le matua
I so’u manatu i le finagalo o le Malo, o se mea lelei tele lea mo tatou uma. O le fa’atulafonoina fo’i o le resitala o tagata palota ma le fa’atulafonoina o le fai o palota, o le mea e tatau ona fai.
O tagata o tagata Samoa, o tatou e faia le filifiliga o sui e fai ma o tatou ta’ita’i. O sui fo’i e tatau ona tula’i mai e fai ma ta’ita’i o le atunu’u, o tagata e alolofa, ma fa’atāua manaoga o tagata uma. E le fa’apea fo’i o manaoga uma o le tagata o le a fa’atino, ne’i fa’apea ane se isi e tatau lava ona fa’atino e le sui o le a ou palota i ai mea ou te mana’o i ai.
Silasila fo’i, o tatou ua na’o na fuafua, ma tu’u atu i le Atua o tatou fa’amoemoega mo le faiga palota a le atunu’u i le tausaga fou. O le i’uga o le faiga palota, o le mealilo le mea lena. E na’o le Atua lava na te silafia le loto o le tagata ma lana fa’ai’uga o le a fai. Afai o ai lava le sui o le a mafuli i ai le faiga filifiliga a le atunu’u, o le tali lena tatou te fa’atali i ai. O le Atua na te aumaia le tali o le tatou faiga filifiliga. E fai lau palota, fai fo’i la’u palota, a’o le fa’ai’uga, o le fa’ai’uga lena a le Atua.
E fa’aleo le agaga fa’afetai i le Malo i la latou silasila mamao ia Samoa ma ona tagata. Atonu o nei fuafuaga ua fa’atino e le Malo, e mo le manuia o tagata lautele. Afai fo’i o ai le sui o le a manumalo mai lea Itumalo ma lea Itumalo, e i ai lo’u taofi o tagata filifilia ia mai le Atua, ua silafia e le Atua manaoga o latou loto mo Samoa ma ona tagata,
Pula Natu Moe
Sama-i-uta /Moata’a
61 tausaga le matua
E tāua tele le finagalo o le Malo e pei ona i ai. A tatou va’ava’ai fo’i ia Samoa ma le tulaga ua i ai nei, o lea ua amata ona mata’itu e tagata ni sui lelei ma fa’amaoni i le tauaveina o le tofi. O le filifiliga o se sui mai Itumalo, o le Atua na te filifilia. Afai lava e silafia e le Atua, o le tagata lea e alofa moni i le Itumalo ma ona tagata, o le tali lena. E tāua fo’i i tagata palota le resitala, ma ia fai sana palota, auā o lona leo lea i totonu o upu fai a Samoa. O le Malo o le Malo a tatou uma, o tagata fo’i tatou te filifilia, o tagata mai lava i totonu o si o tatou atunu’u. E leai ma se tagatanu’u ‘ese ou te iloa e tauva, ona o le faiga filifiliga a Samoa, o le filiga o tatou ta’ita’i, e fa’atinoina atina’e mo le manuia o tatou ma a tatou fanau i le lumanai.
O ai lava o le a mafuli i ai le atunu’u i lana faiga filifiliga, o le tali lena. O tatou ua nā ona fuafua, ae na’o le Atua na te fa’ataunu’uina o tatou mana’o. O ai fo’i o le a filifilia e fai ma o tatou ta’ita’i i totonu o le Malo, o lena, fa’atasi i ai ma le tatou lagolago ma le nofo tatalo, ia sao ma uli o latou fa’amoemoe i fuafuaga mo le manuia o Samoa atoa.
Foaipaia Savai’inaea
Solosolo/Saleimoa
58 tausaga le matua
E i ai lo’u taofi e leai ma se Itumalo e nonofo nonofo o’o se latou sui i totonu o le Maota Fono a Samoa. E i ai lo’u talitonuga o le sao lea o tagata e fa’aali ai lo latou amanaia o ali’i ma faipule o le Itumalo, e ala i le latou palota. O le fa’atulafonoina o le resitala o tagata palota, ma le fa’atulafonoina o le fai o lau palota, o le mea lea e tatau ona fai.
O lea ua fa’ailoa le finagalo o le Malo, a gaseā le Malo e taulogologo mai. E tatau ona tatou fa’atāua le finagalo o le Malo, auā o tatou e palotaina sui o Itumalo e aga’i i totonu o le Palemene o Samoa. O tatou e palotaina sui e mafai ona sau e fa’alogologo i manaoga o le Itumalo. O tatou e palotaina le sui e mafai ona sau e tautua le Itumalo. O le filifiliga o le mea lilo, auā o tofiga e aumai i le Atua. A’o le fa’atinoga o le fingalo o le Atua, e fa’atino e tatou.
E i ai lo’u talitonuga e leai ma se Itumalo i totonu o Samoa, e lē manana’o i se sui tauva alofa ma le fa’amaoni i le Itumalo. E o’o lava i ai tatou ta’ito’atasi, tatou te manana’o i le sui tauva e alofa fa’amaoni ia tatou. A tatou sulu atu mo se fesoasoani, ae o lo’o mafai ona tali mai. O se sui e mafai ona galue mo atina’e e manuia ai le Itumalo, o aiga fa’apea le atunu’u atoa. O se tagata lea o le a fa’aleoina mana’oga o le Itumalo atoa. O se tagata e lē fefe, ia toa e pei o le palemia o lo’o i ai nei. O se tagata e lē fefe e fa’atino le atina’e e iloa e manuia ai ona tagata. O se tagata e malamalama lelei i tupulaga e o’o lava i le itupa o tama’ita’i ma tinā.
O lea ua tatou va’ava’ai i le matagofie o Samoa i lenei vaitau, auā o aso anamua, sa leai ni fale tetele fa’apea, e na’o Eveni, o Pipi, Amau fale tetele sa i ai, a’o le taimi nei, ua muliga fo’i Niu Sila ia Samoa. O le tāua lena o le sao o so o se sui e filifili mo le Maota Fono a Samoa. O tagata latou te ‘ave manatu lelei, o fautuaga lelei, auā po’o ai lava le Malo e tula’i mai, o latou lena e fa’ailoa i ai manatu, e ave i ai tu’ualalo, ina ia fa’atino ai a latou fa’ai’uga fai mo le ta’ita’iina o Samoa.
Tafaomalo Taiuta Petersen
Satalo
58 tausaga le matua
Fa’afetai lava i le Malo ua latou toe fa’amamafa mai le vaega lea. O le resitala o le tagata palota ma le fa’atino o lana palota, o le mea e tatau ona fai. O lea ua taoto le finagalo o le Malo, ma o le fa’amoemoe fo’i lea o lo o i ai so’o se Itumalo lava. E i ai lo’u talitonuga, so’o se sui tauva lava, e momo’o ina ia malo ma avea ma sui faipule o se Itumalo i totonu o le Palemene o Samoa. E le gata i lea, ae e i ai le manaoga e fia tautua mo le Itumalo ma le atunu’u. O ai lava le sui e tauva, pe o se tulafale po o se ali’i, o le filifiliga lava e fai e le Atua. Pe e te taualoa pe leai, o le filifiliga o le mea lilo lena, tatou te le’o iloa.
Ae afai o ai le sui e mafuli i ai le finagalo o se Itumalo, o le tali lena, sa nofo tatalo i ai aiga, ma le itumalo atoa. Auā a silasila fo’i, e leai ma se isi o tatou e silafia lelei uiga o tagata o le a tauva i le faiga palota. E na’o le Atua lava na te silafia le mea o lo’o i totonu o le loto o le sui tauva. O le Atua fo’i, e galue i le loto o le tagata palota, e fa’atino ai lana filifiliga i le sui e tatau ona manumalo e na te tautuaina le Itumalo aemaise o le atunu’u atoa. O le nofo fealofani ma le feoeoea’i o le atunu’u o le vaega pito sili lea ona tāua, auā po’o ai lava e filifilia e fai ma o tatou ta’ita’i, o le agaga atoa ina ia maua ai le fealofani ma le nofo lelei o tatou tagata.
Gasio Tapuaī
Lepea
53 tausaga le matua
E pei ona tatou fa’alogologo i luga o televise fa’asalalau ma leitio, i le tāua o lau palota ma le tāua o le resitala o le sui palota. O lea ua va’ava’ai atu fo’i, e i ai fa’asalaga e tu’u i le tagata e lē fa’atinoa vaega ia, o le mea e tatau ona fai, e sili le usita’i. E sa’o ai le upu, ‘E sili le usita’i nai lo le ga’o o le mamoe po’a.” O lea ua fa’ailo le finagalo o le Malo, ma e lagona le fa’afetai i le Malo, ona o lo’o fai lava ma taulogologo le mamalu o le atunu’u i le tāua o lea mea ma lea mea. E leai fo’i se isi e tio i le Malo, ona o lana lea matāfaioi o le mata’itu o vaega e ao ona silafia lelei e le atunu’u atoa.
O le faiga palota o lo’o loma nei, o lea fo’i ua amata ona tatou va’aia le to’atele o i latou e fia tausinio mo le faiga palota a le atunu’u. Ae i ai lo’u taofi, pe to’afia lava Sui Tauva i le palota tele a le atunu’u i le tausaga fou, e tasi lava le tagata e filifilia. Ma o lena tagata, o le tali lea ua aumai e le Atua mo so’o se Itumalo. A tatou va’ava’ai i le to’atele o sui o le a tausinio, e tasi lava le latou naunautaiga, e fia tautua i le Itumalo.
E tasi fo’i le tagata na te silafia le mea o lo’o i totonu o loto o ia tagata, na’o le Atua. Afai e sau nei fai mai, o lona naunautaiga ina ia tautua i le Itumalo, ina ia maua atina’e e manuia ai tagata o le Itumalo. E na’o le Atua lava na te silafia mea uma. O le Atua fo’i na te fa’ataunu’uina so’o se fa’amoemoega o lo’o tatou naunau i ai.
Ae tatou talosia ia i le alofa ma le agalelei o le Atua ia fa’ataunu’u le fa’amoemoe o le atunu’u, auā e le’o toe mamao fo’i ae fa’atino. O ai lava o le a filifilia e fai ma fofoga taumolimoli o Itumalo i totonu o le Maota Fono a Samoa, o ia lena, ae ia tatou fa’anōnōmanū i le Atua mo se manuia o Samoa, aemaise o ona ta’ita’i o le a tula’i mai.
