MAFUA’AGA NA O’O AI LE MATAUPU I LE PALEMIA
Tusia: Tusiga Taofiga
O le tu’uina atu o le tusi a le Fa’alapotopotoga o Fa’aputugatupe mo le Lumana’i Manuia o Samoa (SNPF), i le Kamupani a le Local Partners and Associates (LPN) e fa’ailoa ai o le a fa’atau ‘ese le fanua o lo’o fa’amau ai le nonōgātupe a lea Kamupani i le SNPF, o le mafua’aga lena na o’o ai le mataupu i luma o le laulau a le Palemia, mo se fesoasoani ona o ia o le Minisita o le SNPF i lena taimi.
Na te’ena e Peseta Vaifou Tevaga’ena, o le Minisita Lagolago o le Matagaluega a le Palemia ma le Kapeneta, tu’ua’iga a le sa avea ma Faipule o Gagaifomauga #3, ia La’auli e fa’apea o le Palemia o lo’o i tua o lenei mataupu.
Saunoa Peseta, o pine fa’amau nei e iloa ai le sesē o saunoaga ua fa’alele e La’auli i le ea, ma ua talitonu ai le to’atele.
“O lea ua aumai le tusi a le NPF, o le a fa’atau le fanua, e na’o le fanua lava o a’u lea la fa’atau, o i ai se aseta a tagata nei e totogi ai le aitalafu lea, e leai, o le popolega lena na mafua ai ona tupu le vevesi lea e tula’i mai, ma i’u ai loa i le matou o e vaai le Palemia, leaga o ia o le Minisita o le NPF i lena taimi mo se fesoasoani i le matou mataupu ma sana fo’i fautuaga.”
“E matuā o’u te’ena a tu’ua’iga ia ua faia e La’auli fa’asaga i le Palemia, e le moni tu’ua’iga nei, e sesē, afua mai i le amataga o le mataupu lenei, a’o Minisita le Palemia i le NPF, na amata mai iina ona taumafai le Palemia e soālaupule ma teuteu le mataupu, i se tulaga e ta’oto i ai le mataupu lenei i se tulaga lelei, leaga o le nonu o se atina’e e aogā mo tagata uma, e tua i ai lo tatou atunuu, e le gata i lea a’o tupe a le NPF lea na matou nonō ai, e lē ni matou tupe, e le’o ni tupe a le matou Kamupani.”
O le isi tulaga na taumafai malosi ai le Ta’ita’i o le Malo, ina ia fofō alamea le mataupu lenei i tua, ona o La’auli o le Minisita o le Kapeneta i lena taimi, sa Fofoga Fetalai fo’i a’o Peseta Vaifou o le Minisita Lagolago a le Palemia, aemaise ai o i lāua uma o Sui Faipule o le Vaega Fa’aupufai e Puipuia Aiā Tatau a Tagata (HRPP).
“Afua la i le auali’i ia e leai ma ni latou tupe, ae ua o ma tupe, ae fa’afefea ona totogi le aitalafu lea, o māua mai la i le fa’afofoga mai a le atunuu, pe ana se’i totogi le aitalafu, pe aumai fo’i sina ata mea, pe tāla, se ua lava lena, a’o le o uma ma le 3 miliona, ae nofonofo a’u pei o le vale fo’i lea, e sa’o ai le upu a si o’u nu’u i Salelologa e mo’i e valea ae le valea uma.”
“E tele fono sa fai ma matou o ai e vaai le Palemia mo se fesoasoani i le mataupu lenei, ma sa ou tāua ai se fa’ai’uga e tu’uina atu ia latou, aea pe a malilie La’auli totogi mai se tupe se’i totogi ai la’u loia, a’o lea o le a ou alu e tapena mai se feagaiga, ona o lea ua ou mafatia i le pili a le loia, ua fai si telē tele.”
“$300,000 le pili a le Loia, ae fa’atoa uma lava ona lau le i’uga o le fa’amasinoga fa’asaga ia te a’u, le tagi a La’auli ma le auali’i ia, ou te ta’utino atu tasi lena mea mata’utia, o lea ua tagi le auali’i ia ua manana’o e ‘ave a’u i le Tulafono, ua ou nofo ma saini sesē ma fa’amalosia le saini a le isi Director, ma ou faia pepa e fa’amaonia ai o a’u o le Shareholder a le kamupani, ma e tasi lea mataupu ogaoga.”
“O i fo’i e pine ai la’u tala lea e faiatu e sesē mea ia e fa’apea, o lea ei tua le Palemia i mea ia, silasila la tatou, i le taimi na tupu ai le mataupu lea, a’o le Palemia o ia o le Minisita o Leoleo, a’o a’u fo’i o le Minisita Lagolago o Leoleo, ae tusi La’auli i Leoleo ma Directors ia, ua tatau ona fai moliaga fa’asaga ia te a’u, o le latou tagi lea ua fai ua ou saini fa’amalosia, o le a le mea na tupu, o le matuā matagā le mea na tupu ia te a’u.”
“O la e fai le aso fanau a le HRPP i tai, ae valaau atu leoleo ou te sau, o a’u lea o le a loka e leoleo, ona o lea ua i ai moliaga fa’asaga ia te a’u, ona o le tagi a La’auli ma le auali’i ia fa’asaga ia te a’u, sa ou usita’i lava ona o le Tulafono, e le’i fa’apea fo’i la na ou sulu i le Palemia mo se fesoasoani, ina ia mafai ai ona toe fa’ata’atia i tua le mataupu, e leai, e leai lava.”
Na fa’ailoa fo’i e Peseta, na sainia e La’auli le maliega na o latou ioeina mo le fofōina o lenei mataupu, o le a totogiina atu le $300,000 auā le pili a lana loia, fa’atasi ai ma le toe fa’afo’i atu o nisi o meatotino a le Kamupani i totonu o lona Ofisa Tutotonu sa i ai muamua le Pure Pasefika, e aofia ai ma le faia o se fa’ato’esega fa’alaua’itele i le atunuu, peita’i e o’o mai i le taimi nei, e le’i taunu’u lea feagaiga e pei ona saini aao ai La’auli i fe’utana’iga ma Peseta.
Peita’i na manino fo’i i le saunoaga a Peseta, e ui e le’i toe totogi atu le 3 miliona o oka o le kamupani nonu sa fa’atau atu i nisi o le aufai pisinisi na talosaga a latou oka, peita’i o lea fo’i ua toe su e La’auli ma i latou nei Peseta Vaifou mo le totogiina atu o le 10 miliona (Civil Case).
