TAUNU’U LE VA’A LA’UOLOA O PUSAMOA I SAMOA
Tusia: Taunuuga Toatasi
E le’o fa’atamala le Malo i le auina mai o oloa o lo’o mo’omia mo le fofoga taumafa o le atunu’u.
O le aso ananafi lea na taunu’u ai i le Uafu Fa’avaomalo a Samoa i Matautu le va’a la’uoloa sa auina mai ai pusa la’uoloa (containers) o taumafa tu’uaisa e aofia ai ma pusamoa, a nisi o pisinisi ma kamupani o lo’o latou fa’ataua atua ia taumafa i le atunu’u.
Na fa’ailoa mai e Pitovaomanaia Mayday Laung Hing, Pule Sili o le Kamupani a Frankie, e tasi le vaiaso na le maua ai se moa mo le fofoga taumafa a le atunuu i lāla uma o le pisinisi a Frankie o lo’o i Samoa nei.
Peitai, e le’i avea le leai o se aano o le moa ma ala e fulitua ai tagata i fa’atauga masani mo aano o manu fasi auā taumafataga, peita’i o se avanoa lelei fo’i lea na fa’ailoa e Pitovaomanaia ua alumia ai isi oloa a le kamupani.
“Sa tele ina la’u e le mamalu o le atunu’u isi oloa tu’u a’isa e pei o mamoe, fa’apea foi mea’ai tu’u’apa e pei o le eleni.”
E ui i le leai o se moa, ae na fa’aālia e Pitovaomanaia, sa mafai lava ona fa’atau e nisi o le atunu’u isi oloa ‘ese mai le moa.
Saunoa le tama’ita’i Pule o le Kamupani a Frankie, o lo’o fa’agasolo fe’utana’iga masani mo le auina mai tua o oloa, e ala i pepa mo’omia e tu’uina atu i le Ofisa o Tiute ma Tupe Maua, ma o le vave lava e mafai ai ona auina mai tua nei pusa oloa o pusa moa, o le vave fo’i lena ona fa’atau atu mo le fofoga taumafa o le atunuu atoa.
“E maua lava moa taeao i le taeao po’o le aoauli fo’i, e fuafua lava i le maua uma o pepa mana’omia auā le auina mai i tua, ma tu’uina atu loa mo le fa’atauina i tagata.”
Ua i ai fo’i le fa’amoemoe o lea Kamupani, o le aso 11 o le masina fou, ua fuafua e maua ai isi moa tu’uina mai lava i nei va’a la’uoloa.
Ina ia ‘aua ne’i toe taligā le atunu’u i aano o manu fasi o lo’o mo’omia mo le fofoga taumafa i le lumana’i, o le mafua’aga lea ua fuafua ai le Kamupani e amata fa’agaioi loa se tasi o atina’e tele ua leva ona fuafuaina, e tali atu i fa’afitauli fa’apea e ono toe tula’i mai i le lumana’i.
O le fa’agaioi o le atina’e moa, o se fuafuaga ua leva ona fa’ata’atia e lenei kamupani, o se fuafuaga ina ia o’o atu i nisi aso o i luma ua tuai ona sapalai mai oka mai atunu’u i mamao, ae o lo’o i ai se mea e tua i ai le pisinisi ma le atunuu atoa.
“O lea fuafuaga ua leva ona fa’ata’atia mai, peita’i o le tau fa’asoasoaina o taimi talafeagai e fa’atino ai, o le ala lea ua tuai ai.
“O le fa’amoemoe o le atina’e ina ia fa’a’iti’itia le fa’alagolago o Samoa i mea’ai o lo’o auina mai fafo.
O lea fo’i atina’e, e mo’omia ai tagata e i ai tomai fa’apitoa ma fale e fa’atino ai le fa’amamāina lelei ia mautinoa le mamā lelei i lona tulaga e tatau ai mo le soifua maloloina ma le fofoga taumafa o le atunu’u.
