KIRIKITI FA’AVĀOMALŌ MA LONA LUMANA’I MO FANAU SAMOA
Tusia: Tusiga Taofiga
O lo’o unaia malosi pea e le Malo, le fa’atāua e ‘ave i ta’aloga Fa’avaōmalō, ona ua to’atele fanau Samoa ua maua ai galuega konekarate, ma ae ae ai i le tele o tupe maua mai ta’aloga nei e aofia ai le Kirikiti, Lakapi, Soka ma isi.
Na molimau le Palemia, Tuilaepa Dr Sailele Malielegaoi e fa’apea, ina ua fesiligia se tasi o tamafanau a le atunuu o lo’o ta’alo fa’apolofesa i le kirikiti palagi ia Ross Taylor, i lana tupe maua mai lana konekarate, na ia fa’ailoa ai e 2 miliona tala Amerika, tusa lena ma le 5 miliona tala Samoa lona totogi i totonu o le 3 masina.
O le fa’atumutumuga lea o le naunauta’iga o le Malo o lo’o i ai nei, ia to’atele a tatou tamafanau e fa’amanuiaina i nei avanoa konekarate mo ta’aloga Fa’avaōmalō i atunuu i fafo, aemaise o le si’itia maualuga o nei fa’agatama i totonu o Samoa lava ia.
O le ala lea o lo’o taumafai ai pea le Asosi Kirikiti Palagi Fa’avaōmalō a Samoa, ina ia fa’atupulaia le fiafia o tagata Samoa i lenei ta’aloga, ma o le mafua’aga lena o lo’o amata mai ai le a’oa’oina o lenei ta’aloga i aoga tulaga lua, kolisi seia o’o mai tagata matutua.
Saunoa Tuilaepa e fa’apea;
“O le taimi nei o lo’o tulaga valu (8) Samoa i le fa’asologa o atunuu e iva sefulu ma le fa (94) o le lalolagi ua tā’ua o Associate Members i lalo o le fa’amalu a le Kirikiti a le Lalolagi.”
O le pine fa’amau o le naunauta’iga lenei a le Malo, lea ua tatala aloaia ai i le vaiaso ua mavae, le Ofisa Autu o le Kirikiti Palagi Fa’avaōmalō i le atunuu.
“O lenei galuega sa fa’atupeina e le Kirikiti a le Lalolagi (International Cricket Council). Sa fa’atinoina lenei galuega e le Kamupanī fau Fale a le RPA Design and Build (Paepae Aiono) i lona tau atoa e $288,000 tala.
E i ai le fa’anaunauga o le Malo, ia tatou ausia le tulaga muamua o au e 94 o lo’o i le Vaega Lua o le fa’atulagaina o ta’aloga kirikiti, ona mafai loa lena ona maua so tatou avanoa i au e 11 pito i luga i le kirikiti a le lalolagi, ona mautinoa lea, o le a telē se avanoa e fa’amanuiaina ai Samoa i taui tau seleni, auā fanau mo lo latou lumana’i.
I le fiafiaga sili o le Malo, ona o lo’o tumatila pea taumafaiga a le au kirikiti a Samoa i le taimi nei aemaise lava tama’ita’i, ma o lo’o fa’amauina fo’i, i ta’aloga a le Pasefika ua mavae atu sa talimalo ai Samoa, na siamupini ai le au kirikiti a tama’ita’i Samoa ma o latou maua ai le pine auro.
“I le tausaga e 2015 na manumalō ai fo’i le au a Tamaita’i i le pine auro. O le fa’atulagaina o au a Tamaita’i i le lalolagi (World Ranking) i le T20 Format o lo’o tulaga sefuluvalu (18) ai Samoa mai au a atunuu e selau ma le lima (105) o lo’o i lalo o le fa’amalu a le Kirkiti a le lalolagi.”
