O SOU MANATU!
O le tele o afio’aga ua mae’a fa’amalamalama ai Tulafono Tau Fa’aofi e tolu o fa’agasolo nei fa’atalanoaga e le Komiti Fa’apalemene ua o latou talia nei Tulafono Tau Fa’aofi, ma le agaga atoa ua o latou malamalama lelei i le uiga moni o nei Pili e tolu.
Peita’i, i le polokalame a le Radio Samoa i Niu Sila ma La’aulialemalietoa Leuatea Polataivao Schmidt ua fa’aalia ai se manatu e fa’apea o La’auli, ua talia ma le lē malamalama e afio’aga nei Pili nei e tolu ae na toe fa’aopoopo mai ai ma le sa avea ma fofoga o lenei Polokalame ia Savea e fa’apea, o lona uiga o le finagalo o La’auli, ua talia pogisa e afio’aga Pili lava nei e tolu.
Na fesiligia ai Sui o Nuu o nisi o afio’aga ua taliaina Tulafono Tau Fa’aofi nei e tolu i so latou finagalo fa’aālia i lafoga nei ua saunoa i ai La’auli ma Savea, ma o le latou tali mai lea i lenei mataupu;
Siligatusa Paipai Fatialofa
Sui o le Nuu i Tanugamanono
E fa’atolu ona falē le matou nu’u i le talanoaina ma le fa’amalamalamaina o pili nei. E fai atu le fa’asalalauga o aso matou te feiloa’i ai ma le Komiti Fa’apalemene, ua leva ona talanoaina e le matou nu’u pili nei. A o lea foi talanoaina o pili, sa tofu le tagata ma kopi o pili ia, auā sa tufa pili ia i tagata, e saofa’i ai lava le tagata i lona fale ma faitau, ina ia o’o ane i le taimi matou te feiloai ai, ae o lo o malamalama le nu’u. E le gata i lea, afai o i ai ni vaega o tulafono e fia malamalama atili ai le tagata, ona fa’amau lea i lalo, e fesiligia ai le Komiti mo le fa’amalamalama atili.
Na tatala mai e le Komiti le avanoa i le matou nu’u i ni vaega o pili nei e tolu e fia malamalama atili ai, e le’i nofonofo le matou nu’u. O le aia tatau lena a le tagata e fesili i le Komiti i le vaega e fia malamalama atili ai, a o le finagalo o le matou nu’u e le’i pogisa. E le’i fai pogisa foi e le matou nu’u se fa’aiuga e lagolago ai pili ua fa’ataoto. O lea sa fa’aali uma tofā i alii ma faipule o lenei nu’u, ma tasi ai le mana’o, i luga o le fa’amoemoega ua malamalama le matou nu’u.
A lea ua fa’aali le finagalo o le nu’u e ala i le talia o pili e tolu. Ma e ui o nei lafoga, e i ai lo’u talitonuga e lē malulue ai le finagalo o le nu’u lenei.
Aumua Kaisalika Aumua
Sui o le Nu’u i Nafanua ma Sekema fou
E leai se nu’u po’o se afio’aga e talia se mataupu e aunoa ma se malamalama o tagata. Ua mae’a ona feiloa’i le matou nu’u ma le Komiti Fa’apalemene o pili e tolu e pei ona i luma o le Palemene, ma sa auai i ai le matou nu’u ma fa’aālia finagalo i nisi o vaega o tulafono sa fia maua ai se malamalama’aga. O le mae’a o le fa’amalamalamaina o vaega uma o pili e tolu, lea na a’e ai le tofā i ali’i ma faipule fa’apea le matou nu’u, e talia ia pili ona o lea sa latou fa’alaogologo ma le toto’a i le au’ili’iliina e sui o le Komiti o ia tulafono.
E lē sa’o ia ituaiga lafoga fa’apea, o lea ua fesiligia ai e ia ituaiga lafoga, fa’aiuga ma silafia o alii ma faipule o lenei nuu i le tulafono. O manatu e leai ni fa’avae, e fa’afefea ona soona tu’ulafoa’i fa’apea ia ituaiga manatu.
A silasila i ai, o lea na manino lava le fa’amalamalamaina mai e le Komiti o le tulafono. Lea foi na fa’aalia nisi o finagalo o tamā matutua o lenei nu’u, i le taua o le malamalama lelei i tulafono, auā a malamalama lelei se tulafono, e faigofie fo’i i le mamalu o le atunu’u ona talia. Lea la e i ai tulafono nei e tolu na talanoaina, ma a va’ava’ai lava i ai, e leai ma se vaega o le tulafono o fa’apea mai e pulea e le Malo tulaga tau fanua o aiga. Auā o le isi vaega lena sa fesiligia e le matou nu’u, lea na fa’amalamalama mai e le Komiti, ma a tagataga’i foi i ai i pili e tolu o lo o fa’atalanoaina, e mo le manuia o tagata lautele. O tulafono e aia tutusa uma ai tagata o aiga i latou aseta ma latou meatotino, e aunoa ma le pulea atu fua e isi. O le ala lena e fa’apea atu ai se fa’amatalaga, po o ai lava o lo o tu’ufesili le mafaufau i nei pili, e lelei lava lou aga’i sa’o i le Komiti e te iloa ai, ae aua le soona faia ni fa’amatalaga ma ni lafoga fa’apea, ona e le tutusa uma nu’u.
Puaaefu John Thornton
Sui o Nuu i Vailima ma Avele
E le toe suia se finagalo o Vailima ma Avele. O lea ua ma’ea ona fa’ailoa le finagalo o le matou nu’u, ma ua maea foi ona feiloai ma le Komiti. Sa matou fa’afesaga’i lelei ma le Komiti Faapalemene o pili e tolu o lo o talanoaina, ma sa toe fa’amalamalama mai foi mo le silafia atili e le matou nu’u, ma sa talia lelei e le matou nu’u vaega uma e pei ona toe auiliili mai e le Komiti e tusa o pili o lo o talanoaina.
O ituaiga lafoga nei, lea o lo o fa’aseseina ai manatu ma finagalo o le mamalu o le atunu’u. A silasila i ai i ituaiga lafoga nei, o lea ua fesiligia finagalo o alii ma faipule o lenei nu’u, ma o se tulaga e lagona ai le fa’anoanoa. E i ai lo’u taofi e le o ni lafoga lea e sau mai se fofoga o se tagata ua a’oa’oina lelei, ma e telē le tofā o lo o i ai. E leai se nu’u e nofo fua talia se mataupu e aunoa ma se mafuaaga. E mafua ona talia e lenei nu’u pili e tolu sa fa’atalanoaina, ona ua malamalama lelei ma iloa lelei le finagalo o le Malo, na afua ai nei tulafono.
A tagataga’i la i ai Samoa i le ituaiga manatunatuga lea e i loto o nei tagata. I lou taofi i ai, e leai se aia a le isi matai e fesiligia ai fua le aia a isi matai. A fai ua e le talia pili o lo o talanoa, o lau oe na aia tatau, ae tu’u fa’ai’uga a i si tagata, faitalia latou ma fai. O lea la ua fesilia le fa’autaga loloto a alii ma faipule a lenei nu’u, oute ofo pe a fai o se lafoga lea e sau mai se tagata e fia avea ma ta’ita’i o se atunu’u.
Taliulu Lupo Fruean
Sui o le Nuu o Papauta
A o le’i feiloai le matou nu’u ma le Komiti Faapalemene mo le iloiloina o pili e tolu o lo o fa’atalanoaina, sa talo le matou fono, matou te feiloa’i ai ma talanoaina pili e tolu o lo o taoto i luma o le Palemene. E le’i mama i le matou nu’u le talanoaina o pili nei, sa fa’aalia finagalo o nisi o tamali’i o le afioaga e uiga i le pili. I le maea ai ona fa’atalanoa pili e tolu ua taoto, ma ua fa’aalia ai finagalo o tamali’i o le matou nu’u i le taua o ia pili, lea na tasi ai loa le finagalo, o le a matou ō e momoli le finagalo o le nu’u, ma o a’u o le Sui o le Nuu sa avea ma sui e momolia le tofā a alii ma faipule o le nu’u nei.
O le matou taofi i nei tulafono, o lea e fa’asino tonu i le Faamasinoga o Fanua ma Suafa ma o se fuafuaga tatau mo le aga’i i luma. O se itu sa tagataga’i i ai, auā o lea ua fa’atino le vaega tonu lea, e aga’i iai le mamalu o le atunu’u, i le taumafaiga o mataupu tau i fa’amasinoga o Fanua ma Suafa.
Silasila fo’i, i le fa’amalamalamaina mai o nei tulafono, e leai ma se vaipanoa o le tulafono o lavelavea mai ai le Malo e fa’apea, e pulea e le Malo fanua o aiga, pulea e le Malo matai a aiga, pulea e le Malo sa’o o aiga. Sa tapā foi e le Komiti sa fa’atalanoaina ia pili se finagalo o alii ma faipule, po o i ai nisi vaega o le tulafono e fia fesiligia, ma sa tali atu lava i ai toeaiina ma tagata o le matou nu’u ma auai. Oute leiloa la po o fea e sau ai ia ituaiga lafoga fa’apea, ona o lea ua fesiligia le fa’aiuga a alii ma faipule o le matou nu’u. e le’i ō pogisa le nu’u lenei e ave se finagalo ua autasi i ai. Leai, o lea sa manino lava i saunoaga a nisi o le afioaga, le latou agaga fa’afetai ona o le mafai ona fa’amalamalama atili e le Komiti ia pili, mo le silafia atili e le afioaga.
E leai la se tulaga fa’apea na pogisa le matou nu’u i le taliaina o nei pili. O lea ua malamalama lelei le matou nu’u, ma e le avea foi ia ituaiga lafoga e suia ai finagalo o alii ma faipule o lenei nu’u, e tumau pea le lagolagosua a lenei nuu i pili ua taoto mai e le Malo.
Nuu Patea Raymond Taefu
Se tasi o Sa’o o le afio’aga i Vailoa Faleata
Ina ua poloaiga le nu’u nei e le Malo, pe tusa o le lua i le tolu vaiaso talu ai, ina ia matou o’o mai i le Komiti Faapalemene i le Aso Lua 28 Iulai 2020. E le’i nofoa’i le nu’u nei, ma sa feiloai le matou nu’u e talanoaina Pili nei e tolu.
E le’i faigofie, ma e talitonu le manatu e le’i faia pogisa e le nu’u nei lana faaiuga i le taliaina o tulafono e pei sa tu’uina mai. Sa sua le aulapauta sua le aulapatai e tau saili se tofā ma se finagalo o lenei nuu, e uiga i le mataupu e pei ona taua, ona e tele ni finagalo fa’alia e tete’e atu i nisi o vaega o tulafono na tuuina mai, e tele foi ni finagalo e lagolagoina nisi o vaega o tulafono, I le aotelega i le tofa ma se finagalo o le nuu nei, na autasi ai ina ia talia le tulafono i lona aoaotetele, sa tu’uina atu foi le tuualalo a lenei nuu i nisi o vaega e ao ona toe silasila i ai le Komiti e aofia ai nisi o vaega o le tulafono e pei ona i ai atugaluga i finagalo o nisi.
E tusa ai ma le finagalo fa’alia o nisi e uiga i le tali pogisa e le afioaga nei i pili e pei ona taua, oute tautala lava ma le fa’aitete ma le fa’aaloalo tele, o lo latou lava lea finagalo, ma e sā i le nu’u nei ona tautala fua i le tofā ma finagalo o nisi o afioaga ona e tonu lava le tagata ia i lona manatu.
