SILASILA LE KAPENETA I FAIGAMALAGA MAI NIU SILA
Tusia: Asenati Taugasolo Semu
E fa’aauau pea le maualuga o le fa’atāua a le Malo mo le puipuiga o le soifua manuia ma le soifua maloloina o le atunuu aemaise ai ina ne’i ono lepetia le malu puipuia o Samoa mai le fa’amai oti o le Koviti – 19.
O lea tulaga na saunoa ai le Palemia, Tuilaepa Dr Sailele Malielegaoi i le polokalame ma le TV3 i le Aso Lulu ua mavae.
Na āfua le finagalo o le Ta’ita’i o le Malo, ona o le leai o se fa’atāua i nisi o ō tatou tagata malaga mai Niu Sila i le vaitau lenei o le pepesi o le Koviti – 19, e ui ina taumafai le Malo e tali atu i le latou talosaga mai e fia fo’i mai i Samoa.
O lo’o fa’agasolo pea faigamalaga i le taimi nei, ma fa’amalosia ai le utagia ma fa’ataunuu tulaga uma o le puipuiga, e ala lea i le fa’anofoesea o tagata pe a taunuu mai mo le 14 aso.
E leai fo’i se tagata o le atunuu ua a’afia i le fa’ama’i i le taimi nei.
Ae na saunoa Tuilaepa, ua tula’i mai fo’i nisi o uiga e lē talafeagai i ‘ai latou nei, ona e uma ona talosaga mai i le Malo e fia omai, ae o’o i le taimi e sau ai le va’alele ua lē omai ai.
“Pau a le agaga tāua i le Malo o le puipuiga, ia 100% le malu puipuia o le atunuu lenei e āfua i luga o le mātua taofi lava o faigamalaga,” na saunoa ai le Palemia.
“Sa toe tilotilo le Kapeneta i faigamalaga lea ua sau, ma mātauina ai le lē tumu o va’a.
Ua le o ane tagata na manana’o e omai. Ma ua amata ai ona manatunatu le Kapeneta e toe tilotilo i le vaiaso lea (vaiaso nei pe a fono le Kapeneta) mo le ono taofia loa o faigamalaga mo le masina atoa, i luga lava o le puipuiga.”
O le tu’u avanoa o le Malo e pei ona saunoa Tuilaepa, e lē faigofie, ma e tele fo’i feuia’iga e faia ai.
“E le’o se mea lelei le tu’u avanoa atu, e viga mai e omai, ae o’o ane i taimi e malaga mai ai ua toe sui mafaufau.
“Pau a le agaga tāua i le Malo o le puipuiga e 100% o le atunuu lenei, e āfua i luga o le mātua taofi lava o faigamalaga.
“O le tatala o malaga, e tatala ai a le avanoa e ono sao mai ai ma se isi e ma’i (Koviti – 19.”
E laualuga lava i le Malo le puipuiga o le soifua o tagata, fa’apea ma le soifua maloloina o Samoa atoa.
“Sa tele le valaau mai ua fia omai, a’o lea foi ua faaali mai uiga ia, ma ua lē tumu le vaa.”
Ua tilotilo fo’i le Malo i nisi o tulaga ua faia e Niu Sila ma Ausetalia, e totogi ai e le tagata malaga i totonu o ia atunuu i le taimi lenei le faletalimalo ma ana mea taumafa.
“O le tulaga lena e ono toe tilotilo i ai le Kapeneta i le mea lea ua fai uma e Malo, lea foi ua fai e Niu Sila ma Ausetalia, e sau lava le tagata ia ua manatu le Malo e fa’anofoesea, e totogi lava e ia lana faletalimalo ma ana meaai.
“E tele le seleni lea e fa’avagavaga e le Malo ona o tulaga ia, a o lea pei e le’o faatāua e tagata.”
Ua toe fa’aauau le Poloa’iga mo Fa’alavelave Tutupu Fa’afuase’i (SOE), lea faato’a mae’a i le fa’ai’uga o le masina nei.
“Sei mata’itu pea, auā e le’o tu’uitiitia le fa’ama’i. O le tulaga lena o lo’o mata’itu pea e lo tatou Malo.
“E le’o se mea faigofie fo’i i foma’i le tele o le taimi o latou e alu i le galulue i le ao ma le po i taumafaiga ‘ese’ese o lo’o alofaiva i ai le falema’i, i mea nei o puipuga ma togafitiga o le faama’i.
“Pau le mea o lea lava e manuia latou na malaga mai. Ae tatou nofo tapena pea ma sauniuni auā e lē mafai ona tatou iloa se mea e ono tupu.
“O le mea fo’i lena e tāua tele ai le nofo tatalo o le atunuu. Ia maua pea fa’amanuiaga mai le Matai Sili auā tatou manaoga faivavale.”
