FA’AMANINO LE FA’ASOAINA O OVATAIMI A FOMAI I LE VAITAIMI O LE MISELA
Tusia: Joshua Lafoa’i
O ovataimi o foma’i na galulue i le vaitaimi o le pepesi o le faama’i o le misela, ua maea ona fa’agaioi ma o lo’o iai le naunautaiga e tatau ona maua i le aso totogi o lumanai.
O le tali lea a le Matagaluega o le Soifua Maloloina e auala mai i se Pepa o Faamatalaga i ripoti a nisi o nusipepa faatatau i totogi ovataimi ma alauni o foma’i i vaitaimi o le faama’i o le misela.
O lea faasaalalauga na lomia e le Nusipepa o le Samoa Observer i le aso Sa, 2 o Aukuso ma le aso Gafua, 3 o Aukuso 2020.
I le lomiga o le 2 o Aukuso, ua tusia ai e faapea o lo’o aitalafu le Malo i ovataimi o foma’i na galulue i le vaitau o le pepesi o le misela i Samoa.
Peitai, ua tali le Matagaluega,.
“O lenei feseetaiga ua mafua ona o le taimi muamua lenei ua tu’ufa’atasia ai le paketi talu mai le tuufaatasia o auaunaga e lua.
“O le fuafuaga o lo’o i ai i le taimi nei mo le Matagaluega, ina ia atoatoa ma mae’ae’a le totogiina o ovataimi na tuai ona faataunuu atu ona o le nei paketi fou talu mai le tuufaatasiga.”
I lea pepa o faamatalaga, na tali ai le matagaluega e faasaga i se isi foi tusitusiga e faapea e le’i totogiina alauni o nisi na galulue i le vaitaimi o le misela e ese mai i foma’i.
“Sa totogi fa’atasi lava o latou ovataimi ma a latou totogi fa’ale vaiaso pei ona masani ai. “Ua maea ona totogi uma ovataimi o le misela.”
Na faamanino mai e le matagaluega, o nei alauni na faamatuu atu e ala i se faatonuga faapitoa mai le Kapeneta e totogi atu ia i latou na tautua i le vaitau o le misela.
