AVEA LE FALEPUIPUI TUAI MA FALEAOGA MO LE LUMANA’I O SAMOA
Tusia Taunuuga Toatasi
Ua lē toe avea ma nofoaga o le togisala le nofoaga tuai sa i ai le falepuipui a le atunuu i Tafa’igata, ae ua avea nei ma nofoaga e sa’ili ai le lumana’i o fanau Samoa e ala i a’oa’oga mo le poto salalau.
O le vaiaso ua mavae sa patipatia ai le tatala aloaia o le Aoga Amata ma le Aoga Tulagalua o le St Paul’s Academy i Tafa’igata, e fa’aāoga ai nisi o fale o le falepuipui tuai.
E 341 le aofa’i o tamaiti ua maua avanoa e ao’oga ai, 69 fanauiti mo le Aoga Amata, ae 272 le aofa’i mo le aoga Tulagalua.
E to’aono (6) le aufaigaluega mo le Aoga Tulagalua ma le to’alua (2) o faiaoga mo le Aoga Amata.
I le saunoaga autū a le Palemia, Tuilaepa Dr Sailele Malielegaoi na ia fa’ailoa ai o le fa’aāoga o fale o le falepuipui tuai e fa’avae ai le Aoga Tulagalua fou ma le Aoga Amata, e mo fanau a i latou o lo’o nofoia ‘ele’ele fou o lo’o i Tafa’igata.
“E fa’asaoina ai tupe i le tau malaga mamao i Apia o fanau ma mātua mo le fa’aāo’ogaina o fanau, a’o lea ua i ai le Aoga i o latou lava autafāfale.
“Fai mai upu a le au tulatoa, a fa’alele fulu measina ma au’afa memea a le atunu’u, ona fa’apea lea o le alaga, saō fa’alalelei, ua malie o ua malie mālo. Ae ua le ‘ole lea, tatou ‘ae’ae lea manu ua ulu.”
O lagona ia e pei ona saunoa le Palemia, ua ausia mo le ulua’i taimi, ma o se matāti’a le taunu’u o le miti a le Malo, le fa’avaeina o le ā’oga fou lenei mo nu’u o lo’o i uta.
O nu’u e aofia ai Tafa’igata, Nu’u, Falelauniu, Si’usega ma isi nu’u tulata ane i le nofoaga lenei, ua faigofie ona maua e fanau avanoa tutusa i a’oa’oga i so’o se taimi.
“Ua ‘ese lagona o lenei lotoā, ua le’o toe nofoaga o le sala ma le fa’alumaina, a ua avea o se nofoaga e sa’ili ai mālo ma le fa’aeaina.”
O se miti ua taunu’u e pei ona saunoa le Palemia, le fausia o se aoga e pei ona i ai lenei aoga, ona o se aoga muamua lea fa’ata’ita’i (model school) ua mafai ona tu’ufa’atasia ai le Early Childhood Education (ECE), aoga Tulagalua fa’apea se Kolisi i se taimi oi luma.
“O le a taunu’u i’inei le miti a le Ofisa Sili o pulega ia mua i malae le laumua nei i Tafa’igata i a’oa’oga e fa’aāoga ai auala fa’atekonolosi fa’aneionapo (digital education) ma e amata mai lava i le ECE seia o’o i vasega Tulagalua mo le a’oa’oina o mataupu ‘ese’ese.”
Ae mo le aga’i i le lumana’i, ua fa’ailoa e Tuilaepa, o le a fa’aaoga ai nisi potu tuai o le falepuipui e toe fa’afou e fai ai mataupu fa’amatata eseese (vocational subjects).
E le gata i lea, a’o le a’oa’oina o mataupu ‘ese’ese po’o le learning pathways e pei ona i ai matupu fa’asaienisi, fa’a – Su’etusi (commerce), fa’apea mataupu tau fa’atufugaga (arts).
O le lotoa fo’i i Tafa’igata, ua fa’ailoa e le Palemia, o lo’o i ai le fuafuaga mamao a le Matagaluega o Aoga, Ta’aloga ma Aganu’u e teu mau ai fa’amaumauga (archives) ona o le mausalī ma le malolosi o fa’avae o fale tuai o lo o iai pea.
“Mo fanau uma o le a ulufale i lenei laumua, ia aogā lenei atina’e fou mo a outou sa’ili’iliga i le poto salalau auā aiga, nu’u, ekalesia ma le mālo.
Na ‘ave fo’i le lu’i a le Palemia i mātua o le a fa’aāogaina lea laumua mo a’oa’oga a le fanau.
“Mo mātua, ‘aua le fa’atamala a ia mataala ua i o outou faitoto’a manuia, ia talisapaia ‘aua ne’i melea manū ua maua.”
