$6.5 MILIONA LE OFISA AUTŪ FOU MO FA’ALAVELAVE TUTUPU FA’AFUASE’I (NEOC)
Tusia: Tusiga Taofiga
O le ulua’i Ofisa Autū fou lenei i totonu o le Pasefika, ua mafai ona fausia fa’apitoa e fa’atino ai auaunaga e tali atu ai i fa’alavelave tutupu fa’afuase’i e fa’aaogā ai feso’ota’iga tekonolosi fa’aneionapo.
O lenei fale, o lo’o fausia fa’apitoa lona malosi fuafua i le mafai ona tali atu i taimi o mala fa’alenatura (afā ma mafui’e malolosi), e mulimulitu’i i ta’iala a le Matagaluega o Galuega ma Atina’e Tetele (MWTI) a le Malo.
O le tasi vaega tāua o lenei fale fou, o le a mafai e so’o se tasi e i ai a’afiaga tumau o le soifua (persons with disabilities) ona ulufale e fa’aāogaina lenei fale i le lumana’i. Saunoa le Ofisa Sili o le Matagaluega o Punaoa Fa’alenatura ma le Si’osi’omaga, Ulu Bismarck Crawley i le feso’ota’iga ma le Savali e fa’apea;
“O le mafua’aga o le fausia o lenei ofisa o le naunauta’iga a le Malo, ia i ai se Ofisa Tutotonu e fa’afoe uma ai galuega i le tali atu i taimi o fa’alavelave fa’afuase’i.
“O le taimi nei e la’ititi le ofisa o lo’o i ai, ma e lē mafai ona ofi uma i ai tagata e mo’omia i galuega i taimi o fa’alavelave fa’afuase’i. O lenei ofisa fou e fa’amoemoe e mafai ona i ai Matagaluega mo’omia po’o Vaega Tuma’oti e 14 e mafai ona galulue ai i totonu o lenei fale.
“E 14 masina o lo’o fausia ai lenei fale e le Zheng Construction i lona tau aofa’i e $6.5miliona tala Samoa. Talu ai ona o le Koviti – 19 ua toe fa’aopoopo ai nai masina e tālia ai nisi o lo’o i ai le poto fa’apitoa i le fa’apipi’iina o lifi ma tane fuimu e tatau ona faia ona mae’a atoatoa ai lea o le galuega.
“O le tau aofa’i o le galuega e 6.5miliona tala, e aofia ai le fausia ma le tusia o le ata o le galuega fa’apea le mata’ituina o lenei fa’amoemoe tele ma o lo’o fa’atupeina mai e le Faletupe o le Lalolagi.”
Na fa’amanino fo’i e le Ofisa Sili o Pulega e fa’apea;
“O lona uiga o isi auaunaga uma aga’i i le galuega lenei, o le a tapu vae tasi uma i le ofisa autū lenei, pe a mae’a ona fausia ma tatala aloaia mo le fa’aāogaina. “O le fa’amoemoe ia mafai ona fa’aāoga i taimi o fa’alavelave fa’afuase’i, ina ia taunuu uma i ai fa’amaumauga ma talosaga o mea o lo’o tutupu i taimi o fa’alavelave.
“E le gata i taimi o fa’alavelave fa’afuase’i ae o le a mafai fo’i ona faaāogaina i fonotaga ma a’oa’oga e Ofisa ma Matagaluega fa’apea Fa’alopotopotoga o lo’o fai pa’aga ma le Malo.
“I le taimi nei o lo’o i ai lava le Ofisa Autū o le NEOC i luga o le o le Ofisa o le Samoa Post, peita’i o lenei Ofisa e le’o gafatia ai le tele o nisi o auaunaga e tatau ona fa’atino e le Malo i taimi o fa’alavelave fa’afuase’i.
“I le itu o feso’ota’iga o lo’o mafai ona maua le Digicel fa’apea le Bluesky. I le itu tau eletise o lo’o i ai fo’i le afi fa’aleoleo pe a fa’aletonu le eletise autū. O lo’o i ai fo’i tane vai tetele e fa’aāgoina e le fale pe a motusia fa’afuase’i le suāvai. “Sa taumafai e fausia lava lenei fale i se tualaga i lona atoaga o vaega mo’omia i taimi o fa’alavelave ma le louloua.”
