TUMAU PEA TAPENAGA A SAMOA MO LE KOVITI – 19
Tusia: Taunuuga Toatasi
O lo’o galulue so’oso’o tauau nei le Matagaluega o le Soifua Maloloina (MOH), Matagaluega o Feso’otaiga ma Fa’amatalaga Vavave Fa’aneionapo (MCIT) ma le Fa’alapotopotoga o Malo Aufa’atasi (UNDP) i le unaia pea o tapenaga e tali atu ai i le Koviti – 19.
Na tauā’ao e le Sui o le Fa’alapotopotoga o Malo Aufa’atasi ia Verena Linneweber le fesoasoani i le Minisita Lagolago o le Matagaluega o le Soifua Maloloina ia Tofa Li’o Foleni.
O lenei fesoasoani o mea faigaluega fa’apitoa (test cartridges) e 2,000 e fa’aāoga mo le fa’atautaia o su’esu’ega o le Koviti – 19 fa’atasi ai ma mea faigaluega fa’apitoa (IT equipment) o lo’o i le MCIT.
O cartridges nei o le a fa’aāogaina e le Matagaluega o le Soifua Maloloina, i le latou masini o lo’o i ai le ituaiga o le GeneXpert mo siaki o le Koviti – 19.
Na saunoa fa’afetai le Minisita Lagolago o le Soifua Maloloina, Tofa Li’o Foleni e avea ma Sui o le Malo o Samoa e fa’afetaia le fesoasoani ua taulimaina.
“E avea a’u e fai ma sui o le Malo o Samoa ma ona tagatanu’u, e momoli aloaia atu le agaga fa’afetai i le Ofisa o Malo Aufa’atasi, e tusa ai ma lenei fesoasoani tele ua tu’uina mai, e lagolagosua ai i le Malo i le fa’atinoga o ana tapenaga ma auaunaga auā le Koviti – 19, fa’apea nisi fa’ama’i pipisi e alia’e mai i le lumana’i.”
O mea faigaluega nei o lo’o mātua mo’omia e atunu’u o le lalolagi i lenei vaitaimi auā su’esu’ega oi latou ua māsalomia ua a’afia i āuga o le Koviti – 19.
Na saunoa Tofa e fa’apea, o se fesoasoani tāua tele ua tauā’aoina e le Fa’alapotopotoga o Malo Aufa’atasi, ona o lo’o feagai Samoa ma le mata’ituina o i latou o faimalaga mai Niu Sila i malaga fa’apitoa, lea sa amata mai i le masina o Aperila o le tausaga nei.
I le foa’i mai o lenei fesoasoani na saunoa ai le Sui o le UNDP e fa’apea, o se tasi lea o vaega o le fesoasoani a le UNDP ia Samoa ma ana tapenaga e tali atu ai i le Koviti – 19.
O lea fesoasoani o lo’o fa’atupeina i lalo o le Vaegātupe a le Malo Aufa’atasi mo Fa’alavelave Fa’afuasei.
O isi fo’i fesoasoani sa tu’uina mai muamua e aofia ai laptops, webcams fa’atasi ai ma isi masini sa tu’uina atu i le MCIT i le masina o Tesema 2019 mo le mata’ituina o fa’amaumauga i falema’i fa’aitumalo, a’o a’afia ai Samoa i le fa’ama’i o le misela.
