FAUTUAINA LE OFISA O TIUTE INA IA FA’AMAONI
Tusia: Asenati Taugasolo Semu
E leai se mea e lilo i Samoa, ma e i’u ane lava ua iloa mea uma.
O le faamanatu lea a le Afioga i le Palemia, Tuilaepa Sailele Malielegaoi i le aufaigaluega a le Ofisa o Tiute, faatatau i le faatinoga o latou galuega fai.
Na saunoa Tuilaepa i le Aso Faraile na te’a nei, i le asiasiga a le Komiti o Atina’e a le Kapeneta (CDC) lea na asiasi ai i nisi galuega ma atina’e a le Malo o lo o faagasolo.
Na asia ai ma le nofoaga o le a faatulaga ai le faata mo pusa tetele (container X-ray scanner) a le Matagaluega o Tiute ma Tupe Maua, lea o le a fausia i le Uafu i Matautu.
Na saunoa Tuilaepa, o lenei faata, o le a fesoasoani tele i le iloa lelei ai o uta i totonu o pusa tetele, e taunuu mai i le uafu i Matautu.
O le a puipuia ai le atunuu mai le faaulufale faasolitulafono mai o aupega, fualaau faasaina ma oloa e le o faatagaina le faaulufale mai i Samoa.
Na fautua foi le Palemia i nisi o lu’itau ma le taua o le mata’itu o le siakiina o le ulufale mai o pusa oloa i totonu o le atunuu, faatasi ma le sao o tupe maua mo le tamaoaiga.
“E tele tagata e le ta’u sa’o mai oloa o lo o aumai, ma fai mai o meaafale ma taavale sa faaaoga i fafo, ae leiloa o oloa e fai ai pisinisi,” na saunoa ai Tuilaepa.
“E tele ma isi togafiti eseese ia ua faaaoga.
“O lea ua maitau atu le komiti (CDC), o lea ua faaatoatoa lelei gaioiga a le Matagaluega o Tiute, e ala i le aumaia o le faata mo pusa oloa tetele, ma o le a maua pea le seleni mai tiute o nei oloa ia e tatau ona maua e le tatou Malo.”
O le aufaigaluega lava le tali o le lelei faafoe o nei tulaga uma e pei ona saunoa Tuilaepa.
“O le ki ma le tatala o mea nei, o le aufaigaluega.
“Aua a faaalatua ona fai e le aufaipisinisi, ona sese atu ai lea ma le aufaigaluega ona tula’i mai ai lea ma nisi faafitauli.”
Ua tele tagata ua faamalolo mai le Ofisa o le Tiute ona o le faamaonia o faiga faaalatua i le auina mai o oloa i totonu o le atunuu, e pei ona faailoa e le Palemia.
“E tele ua faamalolo mai le Matagaluega lenei, ona e tele tagata faipisinisi e faia mea ia, e televave tele le ave o le seleni e fai ai se mea piopio.”
Na faailoa ai foi e Tuilaepa nisi o mea faapea na tutupu lata mai nei i totonu o le Palemene.
“Ae tatou ave pea le faatuatuaga i le Pulega ina ia silasila toto’a ma faamanatu i le aufaigaluega ina ia ‘alo ese mai faaosoosoga faapea e ono tupu mai pea i totonu lava o le lotoifale o tagata faipisinisi.”
O le faata o se vaega o le poloketi mo le siitia o le saogalemu, puipuiga ma le faaauau pea ona faaleleia o le Uafu i Matautu.
O lea galuega tele e $62.26 Tala Amerika ua faatupe ai e le Faletupe o Asia faapea ma le $12.77 Tala Amerika e faatupeina e le Malo o Samoa.
