AVANOA FAIGALUEGA FA’AVAOMALO MO MALU O LE MALO
Tusia: Tusiga Taofiga
O le tasi lea o vaai mamao a le Malo o Samoa, i le lumana’i, ia maua avanoa faigaluega mo ali’i ma tama’ita’i leoleo e galulue ai i galuega tau leoleo fa’avaomalo i atunuu i fafo.
O le fa’amoemoe maualuga lea i le Malo, ua fausia ai le Kolisi fou mo le Matagaluega o Leoleo, e a’oa’oina ai agava’a ma toma’i fa’aleoleo e aofia ai le puipuiga o le saogalemu, tausia o le tulafono ma le puipuiga o le soifua manuia o Samoa aoao, e aofia ai ma ona tuaoi fa’avaomalo ma atunuu o le Pasefika.
O le vaaiga lautele a le Malo i lenei fa’amoemoe, ia toe maua nisi avanoa faigaluega mo a tatou tamafanau, e le gata o leoleo a’o le auaunaga tau tineimu, auā galuega i atunuu i fafo, ma saili ai o latou lumana’i manuia auā le tausiga o aiga, nu’u, ekalesia ma le tautuaina o Samoa atoa.
I le taimi nei, o lo’o tu’uina atu nisi o tatou leoleo mo le puipuiga o le filemu i nisi o atunuu o le lalolagi, i le fa’amalu a le Fa’alapotopotoga o Malo Aufa’atasi.
O le 2017 na tapunia ai faitotoa o le Vaega Au o Fitafita ma Leoleo a le Pasefika (RAMSI), e pei ona fa’atuina i le tausaga e 2003 ona o le puipuiga o le filemu i atunuu o le Pasefika, e aofia ai le vevesi na tula’i mai i Papua Niu Kini i le tausaga e 2000 ma le foumālo o le ta’ita’iga a le Malo o Fiti e lana Vaega Au Fa’afitafita e pei ona ta’ita’ia e Speight ma tagatavaleina ai nisi o ta’ita’i o lea atunuu i lena vaitau.
Fa’amanino e le Komesina o Leoleo, Fuiavailiili Egon Keil i lana folasaga i le asiasiga a le Komiti o Atina’e a le Kapeneta (CDC), e 16 eka ua fa’amatu’u atu e le Malo i lalo o le vaaiga a le Fa’alapotopotoga o ‘Ele’ele Tuma’oti a le Malo (SLC), e fausia ai lenei galuega tele, ma e $16,652,494 tala lona tau atoa ma o lo’o fa’atupeina e le Malo o Saina fa’atasi ai ma le fesoasoani a le Malo o Samoa.
“E 120 fanau a le atunuu o le a mafai ona a’oa’oina i lenei Kolisi Fa’aleoleo pe a mae’a ona fausiaina, o lo’o mautu uma vaega mo koleniga ma a’oa’oga i agava’a ‘ese’ese patino i le galuega tau Leoleo.”
Fa’ailoa e le Komesina o Leoleo, o le si’itia maualuga o le tomai e maua e fanau o le a avea ma leoleo, o le naunauta’iga lea i le Malo aemaise o le a’oa’oina lelei o le aveina o ta’avale, ina ia tu’uitiitia ai le tele o ta’avale lavevea a le Matagaluega.
O lo’o taofia lenei galuega tele i le taimi nei, ona o le Koviti – 19, o lo’o a’afia ai le lalolagi atoa.
