E LĒ 30,000 E 4,000 MAI I UPOLU E PALOTA I SAVAI’I
Tusia: Tusiga Taofiga
Ua fa’alauiloa e le Ofisa o le Komesina o Faiga Palota, e silia i le 4,000 le aofa’i o tagatanu’u Samoa o lo’o nonofo ma faigaluega i Upolu nei, e tatau ona malaga i Savai’i mo le Palota tele a le atunuu i le tausaga fou 2021.
O lenei fa’asa’oga o lo’o fa’avaeina i fa’amaumauga aloaia a le Ofisa o le Komesina o Faiga Palota mai le lesitala oi latou sa palota i le sailiga tofi tele a le atunu’u i le tausaga e 2016 fa’atasi ma sui ua fa’amalieina tu’utu’uga o le Tulafono e mafai ai ona palota talu mai le 2016.
E pei ona silafia, ua i ai ni tusitusiga ma lomiga o lo’o fa’apea mai e silia i le 30,000 tagatanu’u Samoa o le a malaga atu i Salafai, mo le fa’ataunu’uina o a latou Palota i le tausaga fou.
Peita’i i le feiloa’iga a Faimalomatumua ma le Savali, na ia saunoa ai e fa’apea, e na’o le 4,000 lava i latou o lo’o i Upolu nei, e tatau ona malaga i Savaii e aofia ai ma le lata i le 200 o tagatanu’u o le Itumalo o Gagaifomauga #3, e tatau ona malaga i Savaii mo le Palota La’ititi, lea e fa’ataunu’uina i le Aso 28 o Aukuso 2020.
Fa’ailoa e le Komesina, i lea aofa’i e 4,000, e mautinoa le fa’aitiitia o lea fuainumera pe afai e to’ese le aofa’i o tagata e i ai a’afiaga tumau o le soifua, tagata matutua ua silia i le 65 tausaga fa’atasi ai ma i latou e malaga i fafo a’o le’i faia le palota, ma e o lo’o galulue i auaunaga fa’apitoa e i ai le Soifua Maloloina, Malu o le Malo ma isi.
Saunoa le Komesina;
“A tatou fua i aso fa’amanatu, e tumutumu lava le mamalu o le atunuu i le uafu, e malaga ai i Savaii mo aso fa’apitoa.
“O le popolega lena i le Ofisa nei, auā e le talafeagai ai ma le Tulafono o Faiga Palota, pe afai ae totogi le malaga o tagata i Savaii e palota ai, a’o lea o lo’o gafatia lava e latou le malaga i so’o se aso fa’apitoa i tausaga ta’itasi.
“I le taimi nei afai e 4,000 e malaga i Savaii mo le fa’ai’uga o le vaiaso auā le faiga palota, e gafatia lelei e va’a la’upasese e tolu o lo’o femalagaa’i i le va o Upolu ma Savaii, o lona uiga e leai ma se tulaga e ‘ese’ese ai le Palota tele o loma nei, ma le fa’amanatuina o Aso Fa’apitoa i tausaga uma.
