“E LĒ A’AFIA FANUA FA’ALEAGANU’U,” TIATIA
Tusia: Tusiga Taofiga
E leai se pi’itaga, leai se so’otaga po’o se fa’aipoipoga o Teuteuga o le Fa’avae i Tulafono Tau Fa’aofi e tolu mo le fa’atinoina o tiute ma galuega fai a le Fa’amasinoga o Fanua ma Suafa i le Pulega o ‘ele’ele ma fanua fa’aleaganu’u.
O le tali mai a le Failautusi o le Fono Aoao Faitulafono, Tiatia Graeme Tuālaulelei i manatu ua fa’aālia e fa’apea o nei Teuteuga o le Fa’avae o le a aveesea ai le pulea o Fanua Fa’aleaganu’u mai aiga ma sa’o.
Saunoa Tiatia e fa’apea;
“O le tasi lea o vaega na lagalagā i manatu o le atunuu sa autova’a atu, ua taulimaina fo’i e le Komiti nisi o manatu tusitusia aga’i tonu i le vaega lea.
“E pei ona fa’amanino i le folasaga a le Ta’ita’ifono ma le Komiti Fa’apalemene i le tele o fa’atalanoaga, o lea ua mae’a pāsia le teuteuga o le Tulafono o le Fa’amauina o Pule o Fanua i le 2008 lea sa tele ai fo’i finagalo fa’aālia.
“A’o teuteuga ia sa pāsia i le 2019, lea ua i ai loa ma aiaiga fou lea, e fa’atatau i Fanua Fa’aleaganu’u, po’o le lisiina o Fanua Fa’aleaganu’u, lea ua ma’oti lava le vaega lena mo le teuteuga o le Tulafono lenei i le 2008 .
“O Tulafono o lo’o talanoaina nei, e leai se pi’itaga, leai se so’otaga ma Tulafono Tau Fa’aofi nei e tolu o lo’o talanoaina nei, ae na’o le taumafai lava ia fa’aofi i totonu le tatou Tu ma le tatou Aganu’u i totonu o le Fa’avae, e na’o le pau lava lena, fa’atasi ai ma le tu fa’ama’otiina o le Fa’amasinoga o Fanua ma Suafa.
“Na’o le pau lava lena o le vaega o lo’o aga’i i ai Tulafono Tau Fa’aofi nei e tolu”
