FA’AGASOLO TEUTEUGA O LE FA’AVAE I NU’U MA AFIO’AGA
Tusia: Tusiga Taofiga
Ua mae’a fa’atalanoa finagalo o Itumalo Palota uma i Savaii fa’atasi ai ma Itumalo Palota e 15 i Upolu, i Tulafono Tau Fa’aofi e aofia ai ma Teuteuga o le Fa’avae i le fa’atinoina o tiute ma galuega fai a le Fa’amasinoga o Fanua ma Suafa.
O le fa’ataunu’uina o lenei la’asaga ua fa’amalieina ai fo’i Tulafono Tumau o le Maota e tapā ai se finagalo o le atunu’u e avea ma o latou sao i le fausiaina o Tulafono aemaise teuteuga o le Fa’avae auā le nonofo fealofani ma le malu puipuia o Samoa e aofia ai ma ana measina.
I le fa’agasolo o feiloa’iga nei ma ali’i ma faipule o afio’aga ta’itasi, na saunoa ai le Failautusi o le Fono Aoao Faitulafono a Samoa, (Palemene) ia Tiatia Graeme Tuālaulelei e fa’apea na fa’aleoina e nisi o Pulega a ali’i ma faipule o latou atugaluga i teuteuga o lo’o i ai i totonu o nei Tulafono Tau Fa’aofi e aofia ai le fa’atapula’a I le lima matai sa’o o aiga fa’apea ai fo’i le ono a’afia o ‘ele’ele ma fanua fa’aleaganu’u.
Saunoa Tiatia, o nei atuluga o le a folasia i luma o le laulaufono a le Palemene i le taimi e faitau fa’atolu pe fa’ai’u ai nei teuteuga o Tulafono ma le Fa’avae.
Na ia tā’ua fo’i so’o se teuteuga o le Fa’avae, e pei ona i ai Tulafono nei e tolu o lo’o soālaupuleina e le Komiti Fa’apalemene ma le atunuu lautele e lē mafai ona pāsia pe fa’amaonia seia vagana ai ua ausia le 2/3 o Sui Faipule o le Palemene e lagolagoina.
I lalo fo’i o Tulafono Tumau o le Maota o lo’o ta’ita’ia ai taualumaga a le Palemene o teuteuga o le Fa’avae e mana’omia ai le fa’atinoina o le Palota Tauvalaau.
Saunoa Tiatia e fa’apea;
“O le tulaga ua ta’oto ai nei le galuega a le tatou Komiti Fa’apalemene, ua mae’a le fa’atalanoaga sa fa’atino ma le Puleono i Salafai, na o’o lava le fa’atalanoaga a le Komiti i Itumalo Palota uma i Salafai.
“Ae ua amata fa’agasolo lenei lava galuega i Tumua nei, ua mae’a i lenei lua vaiaso, le Itumalo o Vaimauga Sasa’e ma Vaimauga Sisifo lea ua fa’alupe nei o Vaimauga #1, 2, 3 ma le #4 fa’atasi ai ma Faleata #1 e o’o i le #4, lea ua o’o le galuega a le Komiti i le Itumalo o A’ana, e o’o mai la i le Aso 05 o Aukuso, ua o’o mae’a Itumalo Palota e 15 i Tumua nei.
“O le tulaga i le aotelega o le finagalo fa’aālia o le atunuu, e lilifa a o latou taofi i le Tulafono Tau Fa’aofi lea o Fanua ma Suafa, e aga’i lava o latou finagalo i aiaiga o le Tulafono Tau Fa’aofi lea o Fanua ma Suafa, aemaise i le tofia ma le umia o suafa sa’o o aiga, aemaise o le resitala o Matai Sa’o e lima, pei o le vaega lava lea na lilifa i ai finagalo o le atunuu.
“Ae lelei ona manino pea le vaega lea, e pei fo’i ona fa’amalamalama pea e le Ta’ita’i o le Malo, na afua mai lava i le Komisi Su’esu’e na tofia e le Palemene i le 2016, pei o se tasi lea o fautuaga sa fa’ata’oto mai, i le naunauta’iga lava ina ia faigofie galuega a ali’i ma tama’ita’i Fa’amasino.
“Tulou lava i nisi o aiga, ua silia ma le 20, ua ova atu lava ma le 50 suafa sa’o, ma ua faigata ai lava i le Fa’amasinoga ona fai a latou fa’ai’uga, ma o le tasi lea o atugaluga tele o lo’o sa’ili fesoasoani ai pea le tele o nisi o aiga i le Ta’ita’i o le Malo ma Minisita o le Kapeneta, ona e aiā tutusa uma sa’o o aiga, o le vaega lea na lilifa tele i ai le finagalo o ali’i ma faipule o nu’u ta’itasi.
“O le isi vaega sa lagalagā ai fo’i finagalo o nisi o afio’aga, ona o fa’aseā ma tala’iga lē fa’avāea, i ni manatu e fa’apea, po’o le a ea le mea e ma’imau ai manatu ma taimi o le atunuu, a’o lea ua pasia le tulafono.
“Fa’amanino pea mo le silafia e le tatou atunuu, o Faiga Fa’avae lava ia Fa’apalemene, e alu loa le faitauga muamua, faitauga fa’alua, lafo loam o fa’aliga manatu a Sui Usufono, ona fa’ase’e loa lea i Komiti Fa’apalemene, o le galuega lea e feagai ma le tatou Komiti Fa’apalemene, o le sailia lea o finagalo o le tatou atunuu, e le fa’amaoni lea mau, e fa’apea e na’o na o o le Komiti e fa’atino, a’o la ua pasi lea Tulafono, e leai, o le ao ao manogi mai o le Komiti i finagalo o le tatou atunuu lea ua fa’aālia, ona aga’i loa lea i ai o le Komiti e tapena sa fautuaga e tu’uina atu i le Palemene mo se teuteuga talafeagai e fua i luga o finagalo o le atunuu lea ua mae’a folasia.
“A’o le tulaga o le process e pei ona fesiligia, e mae’a loa iloiloga a le Komiti, fa’ata’oto le latou lipoti, fa’ata’oto le latou teuteuga ma le latou fautuaga, ona fa’ase’e loa lea i le iloiloga au’ili’ili, peita’i o lo’o mau ‘ese’ese fo’i nisi o le atunuu e fa’apea toe tasi le faitauga lea e totoe, e leai.
“O la’asaga a ia, e mae’a loa faitauga fa’alua fa’ase’e i le Komiti, ona alu loa lea i le iloiloga au’ili’ili, o le iloiloga au’ili’ili e iloilo uma ai lava vaega ta’itasi o le Tulafono i mataupu ma fuaiupu ta’itasi, o iina la e saofagā atu ai loa teuteuga ua mae’a tapena e le Komiti e aga’i aiaiga nei o le Tulafono, ina ia mafai ona fa’aofi atu loa e le Komiti Teuteuga ma faitau fa’atolu ma pāsia ai loa.
“I aiaiga o Tulafono Tumau, so’o se Teuteuga o le Fa’avae, e ao lava ona sa’ili le 2/3 o le Maota Fono, o iina fo’i e fa’afofoga mai ai le mamalu o le atunuu, e fa’ase’e loa le Fa’avae i luga o le tulaga o le au’ili’ili, ma le sa’ili o finagalo o Sui Usufono, ona fai loa lea o le Palota tau valaau, o iina la e tutula’i atu lava Sui Usufono o i latou e lagolagoina teuteuga o le Fa’avae, fa’ailoa fo’i o latou suafa, e fa’apena fo’i i ‘ai latou e te’ena lea suiga.
“A mae’a ane la le Palota tauvalaau, ona tu’uina atu lea o le fa’ai’uga po’o ua mafuli le 2/3 o Sui Usufono e saofagā ai le ioeina o le faia o teuteuga o le Fa’avae, afai fo’i e leai, o lona uiga e lē mafai ona aloaia lea suiga ona ua le ausia le 2/3 e pei ona aiaia i Tulafono Tumau o le Maota.
