MAUA LE FALE’APA MAI LE FA’ATO’AGA ‘AVA
Tusia: Asenati Taugasolo Semu
E ui ina mau ‘ese’ese o le atunuu i le mafuaaga o le maua o le ava i totonu o Samoa, ae ua iloga le aoga o lea laau mo le atina’e o aiga ma afioaga.
O le molimau lea a le Sui o le Nuu o le afioaga o Uafato Fagaloa, Manoa Vaasaumamao, ona o lona fale’apa ua nonofo ai nei ma lona aiga, na maua mai i tupe o lana faatoaga ava.
E le gata i lea, ae ua aoga foi nei tupe e totogi ai aoga a lana fanau, tautua ai lona aiga, nuu ma le Ekalesia.
“O lo’u fale palagi (fale’apa), e tasi lea mea aoga na maua mai le faatoaga ava,” na saunoa ai Manoa.
“Na auina atu ava i Tutuila faatasi ma meataulima, ma e silia ma le $40,000.00 le tau atoa o le galuega o lo’u fale, ma o se tulaga ua matua siitia ai le tulaga o lo’u aiga.”
O le galueaina o le eleele, ma le toto ai o laau ma fua o faaeleeleaga, o le mau lea a Manoa e fesoasoani tele mo le tupe maua ma le tausiga o aiga.
“E tele alagatupe, e ta meataulima, ma tupe mai le ava, aua o le tupe lea o lo o i le palapala.
“Pe fai tusitupe pe leai, e mautinoa lava e maua le tupe. Aua a manaomia loa le tupe, na o le oso atu lava fafai mai le ava, ma pau lava le mea ia maua le la e faalā ai.”
O le matua lelei o le ava, o le lelei foi lea o le tofo mo le taumafa.
“Masalo o le ava iinei i Uafato, po o le lima tausaga faatoa mafai ona sali (faaaoga), fua i lona matua ma lona lelei. Ae ua mananao vave foi isi i le tupe, ae e iloa lava pe a tofo i le sua o le ava.”
Na pau lea o le tupe maua mo le aiga o Manoa, o le faatoaga ava.
“E leai se isi suegatupe i tua atu. A misi ma le ava lona uiga ua le ‘ai i le vaiaso, ma totogi ai aoga a tamaiti ma fai ai mea faalenuu ma faale lotu.
E silia ma le tasi le eka ua opo i le faatoaga ava o Manoa i totonu o lona fanua e lima eka, ma na ia saunoa, o le a faasolo lava lenei faatoaga aua le tausiga o lona aiga.
“Ua silia ma le 30 tausaga o o’u faia lenei faiva o le faatoaga ava, ma ua leva ona ola ai lou aiga.
“Sa ave i fafo a’u uta ava, na faamomoli i Ausetalia, Niu Sila ma Amerika Samoa. Na ona avatu lava o pusa ava ae sau le tupe latou.
“O le ava lava e ola ai lo matou nuu, faatasi ma seleni e lafo mai aiga mai fafo.”
I le taimi lenei o le faama’i e pei ona ogotia ai le lalolagi, na saunoa Manoa, ua tau le maua foi avanoa e auina atu ai le ava i fafo, ae o lo o maua pea seleni lafo mai nai ona aiga.
Na oo lava saunoaga a Manoa i le afuaga o le ava i Samoa, ma o se tulaga na ia taua le mitamita ai o lona afioaga ma le itumalo o Fagaloa.
“E mau eseese le atunuu. A o le talitonuga o le nuu lenei, o le nuu lenei na mua i ai le ava.
“O le ava iinei ia matou, e ese le tofo lelei pe a taumafa ai, e ese mai isi ava e maua i totonu o Samoa. O Uafato lava le ulua’i ava.”
