SAO O FRANKIE I LE ATINA’E O SAMOA
Tusia: Taunuuga Toatasi
E silia i le 400 tagatanu’u Samoa, o lo’o galulue i lāla uma a le Kamupani a Frankie i Upolu ma Savai’i i le taimi nei, e aofia ai ma le 30 o i latou ua fa’afaigaluegaina i le lāla fou a lea Kamupani i Lelata e pei ona umusaina i le vaiaso ua mavae.
E pei ona masani ai, o se tasi lea o manulauti a le Malo o le tula’i mai o pisinisi e maua ai galuega a le atunuu auā le tausiga o nu’u, aiga ma ekalesia.
O le tula’i mai fo’i o atina’e fa’apea o pisinisi e pei o Frankie e tele fo’i lo latou sao i le tupe fa’aagaga a le Malo, (Foreign Reserves) lea e mafai ona a’apa i ai le Malo e fa’atau ai taumafa mai atunuu i fafo i taimi e a’afia ai le tamaoaiga o le atunu’u ona o mafu’aga e lē ma’alofia e pei ona KOVITI – 19.
I le Taimi nei e silia i le $600 miliona tala le Tupe Fa’aagaga, (Foreign Reserves) a le Malo o lo’o i ai nei pe tusa lea ma le ova atu i le ono masina le tau o oloa e mafai ona fa’atauina mai e le Malo auā le fofoga taumafa o le atunu’u.
I se lipoti fa’atatau i le tamaoa’iga o Samoa e pei ona tu’ufa’atasia e le Faletupe Tutotonu o Samoa ma fa’alauiloa i le masina o Mati 2020, o le Tupe Fa’aagaga (Foreign Reserve) a Samoa o lo’o i ai e pei ona i ai le lipoti lava lea a le Faletupe Tutotonu a Samoa, e 14.70 pasene.
O lenei lāla fou ua tatala sa fausia i le umi e valu masina e le Konekarate a Frankie, ma e $2.5 miliona le tau atoa o lenei galuega tele, tusa lea ma le 1,500sq lona telē, ma ua atoa ai fo’i ii le 13 o lāla/faleoloa a lea pisinisi ua fa’atuina i totonu o Samoa.
O le ala lea o le auai ai o le Ta’ita’i o le Malo, Tuilaepa Dr Sailele Malielegaoi, e fa’afetaia le galuega fitā ua tino mai, aemaise o le fesoasoani malosi a lenei kamupani i le atina’ega o le tamaoa’iga o le atunuu.
O le fa’atupulaia o le tele o faleoloa ma kamupani i totonu o le atunu’u, o le telē fo’i lea o le avanoa o le a taugofie ai oloa mo tagata fa’atau, ae fa’apea fo’i ona maua ai galuega mo fanau a Samoa.
“O se avanoa lelei lea mo pisinisi i le tauvaga a faleoloa, auā o le a maua ai oloa taugofie ma lelei.”
Saunoa le Palemia e faapea, a lelei vaega e paka (car parking) ai ta’avale, o le tosina gofie fo’i lena o le aufa’atau e afe a latou ta’avale, auā o ituaiga tagata fa’atau e afea lea pisinisi, o tagata e fai a latou ta’avale.
“O le 95% o tagata o le atunu’u, o tagata fa’atau, a’o le i si 5% o tagata faipisinisi.”
Peita’i, o le a i ai fo’i nisi o tagata faipisinisi e pei ona saunoa le Palemia o le a iai o latou manatu e fa’apea, o le a fa’atu fo’i lea faleoloa i lea itu, ae fa’apefea lana faleoloa?
O le vaaiga lena a i latou lea e fai le tauvaga, a’o le va’aiga o le 95% o le atunu’u, o le aufa’atau e ese fo’i.
“Ua ola le matou teritori, auā o lea o le a i ai le fa’atauvaga e lelei mo aiga.”
O le lu’itau fo’i lea mo tagata uma, auā tusa lava pe tele lāla o faleoloa a Frankie, fai pea lou faleoloa, o le fa’aopoopo lea a Tuilaepa.
“A taugofie ma lelei oloa, tasi lena pese e pepese ai le aufai fa’atau, o le lelei ma le taugofie o oloa e gafatia e aiga.”
Ae mo le Kamupani a Frankie e pei ona saunoa le Pule o le Kamupani, Pitovaomanaia Mayday Laung Hing, o lea ua taunu’u le miti a le Kamupani, o le fa’atu lea o se lāla i le atu Vaimauga.
Fa’ailoa e Pitovaomanaia, o se avanoa lelei fo’i lea, e maua ai galuega mo tupulaga talavou o lo’o nonofo i lea itu o le atunu’u.
Na fa’afetaia e le tama’ita’i Pule le Malo fa’apea Fa’alapotopotoga ma Pa’aga uma a le Kamupani o Frankie, ona o le lagolagosua, a’o fa’agasolo lenei galuega tele.
