FESOASOANI A LE MALO MA VAEGA FA’AUPUFAI UA ALOAIA I LE PALEMENE
Tusia: Tusiga Taofiga
I tausaga ta’itasi e tu’u atu lava e le Malo vaega tupe ua fa’amaonia i Vaega Fa’aupufai ua aloaia le ausia o le to’avalu o ona Sui Faipule i totonu o le Fono Aoao Faitulafono a Samoa (Palemene).
O lea seleni e fa’ailoa manino i totonu o le Tala o le Tupe a le Malo i tausaga ta’itasi lona aofa’i, ma e folasia fa’alaua’itele i totonu o le Palemene, mo le silafia e le atunuu atoa.
Saunoa le Palemia, Tuilaepa Dr Sailele Malielegaoi, o lenei fa’amanuiaga na amata fa’atuina mai le taimi a’o avea Tofilau Eti Alesana ma Palemia o le Malo o Samoa, i le naunauta’iga atoa o le Faigamalo i lena vaitau, ia atia’e so’o se Vaega Fa’aupufai aloaia, ina ia malosi le tula’i mai e agaia pe ta’ita’ia fo’i le Malo mai nofoa’iga ta’itasi.
O lea fesoasoani, ia mautinoa le tuto’atasi o so’o se Vaega Fa’aupufai e aunoa ma le fa’alagolago i ni pisinisi ma kamupani tuma’oti, auā a tula’i mai e ta’ita’ia le Malo, e ono fesiligia ai fo’i le amiotonu i ana fa’ai’uga fai, auā e tatau ona toe fesoaosani atu i pisinisi sa agalelei atu i le amataga o le tau atina’eina o le Patī.
Fa’ailoa e Tuilaepa, o lenei fa’amanuiaga sa mafai ona maua e le Vaega Fa’aupufai a le SNDP fa’atasi ai ma le Tautua Samoa peita’i na’o le Vaega Fa’aupufai e Puipuia Aiā Tatau a Tagata (HRPP) o lo’o fa’aauau pea ona maua lenei seleni ona o lo’o ausia le 8 o Sui Faipule e aloaia ai so’o se Patī i totonu o le atunuu.
E ao fo’i i nei Vaega Fa’aupufai aloaia, ona tu’ufa’atasia lipoti atoatoa, o le tala o le tupe i lona fa’aāogaina mo le silafia e le Palemene.
Peita’i fa’ailoa e le Palemia, e o’o mai i le taimi nei, e le’i o’o atu se tala o le tupe a le Tautua Samoa sa aloaia i le Palemene, e fa’amanino ai vaega uma na fa’aāogaina ai lea seleni.
Mo le HRPP lava ia, ua mautu ana Faiga Fa’avae e lima ta’ita’iina ai ona Sui Auai, fa’atasi ai ma le i ai o lona Ofisa Autu i Petesa, o tagata faigaluega fa’atasi ai ma le tele o ana fesoasoani e ofoina atu mo e mana’omia, e i ai le Nofoaga o Tagata Mātutua i Mapuifagalele aemaise le Manu Samoa 15 ma le Ta’ito’afitu.
“E tatau i Vaega Fa’aupufai, ona saili seleni fo’i latou, e atia’e ai le Patī, auā o le Aso Fanau o le HRPP o le taimi tonu fo’i lena e fa’atino ai la matou sailiga seleni, o tupe e maua mai i lena fa’amoemoe e teu e fa’asoasoa e fa’atino ai a matou fuafuaga, fa’atasi ai ma le totogiina o pili eletise, suāvai ma le aufaigaluega.”
