80% I LE 100% LEAI SE FESO’OTA’IGA MA LE KOVITI – 19
Tusia: Joshua Lafoai
O le maliu o se taule’ale’a i le fa’ai’uga o le vaiaso, ua fa’ailoa ai e le Matagaluega o le Soifua Maloloina, o le 80% i le vaai fa’afoma’i i mafua’aga o le maliu o lea ali’i, e leai se feso’ota’iga ma āuga o le Koviti – 19.
Fa’ailoa e le Fa’atonu Sili o le Soifua Maloloina, Leausa Dr Take Naseri, o lo’o tālia le ta’otoga fa’apitoa o lenei ali’i, ma fa’amautinoa ai loa le mafua’aga tonu o lona maliu.
Peita’i na fa’ailoa e Leausa o le su’esu’ega fa’apitoa fa’afoma’i i lenei taule’ale’a sa faia i totonu o le 24 itula talu ona maliu, fua i musele o lona tino o lo’o ola pea, o lo’o masalomia ai e i ai feso’ota’iga ma āuga o le gasegase o le fatu, atonu o le mafuaga lea o le maliu o lea taule’ale’a.
O lenei alii na nofo va’ava’aia i Poutasi, Falealili mo le 14 aso, a’o le’i aga’i atu i lona aiga.
Fa’ailoa e le Fa’atonu Sili, sa fa’agasolo lava galuega mata’itu a le Soifua Maloloina, amata mai i fafo atu o Samoa i le atunuu sa malaga mai ai lenei ali’i, e ala i aiaiga fa’avaomalo fa’alesoifua maloloina e tatau ona uia e tagata uma, fa’atasi ai ma le faia o tui e saili ai pe le’o a’afia i āuga o le Koviti -19.
Aemaise fo’i o ta’iala e mata’ituina ai so’o se tasi e malaga mai fafo, e afea o tatou laufanua, ma o lo’o i ai fo’i ma le aiaiga malosi, afai e lē faia ni siaki fa’apitoa a’o le’i malaga mai, e toe fa’afo’i lava oe i le atunuu na e malaga mai ai, e lē taliaina oe i totonu o le atunuu.
“Ua mae’a lelei ona faia ana siaki fa’apitoa i atunuu i fafo, ma e leai ni āuga e mautinoa ai o lo’o maua i le fa’ama’i, fa’atasi ai ma le uma o le 14 aso o nofo va’ava’aia i Poutasi, ma toe siaki ai i le aso mulimuli ma mautinoa ai e leai ni foliga vaaia, po’o ni fa’ailoga fo’i ua maua i se fa’ama’i.”
“Ina ua ta’u mai i ‘ai matou le maliu o lea ali’i, na galulue loa le Matagaluega e fa’atino la’asaga sa fa’ata’oto mo le mautinoa e leai se isi o a’afia i se ma’i tugā.”
Na fautuaina fo’i e le Fa’atonu Sili o le Matagaluega o le Soifua Maloloina, i latou o lo’o faia pea tusitusiga sesē ma fa’asesēina ai le atunuu atoa, aemaise i lipoti e a’afia ai se soifua o se tagata, ina ia taofi nei loa, auā o le ola ua ma’imau e le’o se mea tatou te faifai i ai, a ia tatou tula’i fa’atasi, e opogi mafatiaga o le lalolagi ma talosia le agalelei o le Ali’i e malutia ai Samoa mai lenei fa’ama’i oti mata’utia.
“O le vaega e maua mai ai fa’amatalaga sa’o atoatoa, o le Matagaluega nei ma le Ofisa o Fa’alavelave Fa’afuase’i (NEOC) e maua ai fa’amatalaga sa’o ma moni fa’atatau i le fa’ama’i.”
I le taimi nei, e ui i le saogalemu pea o Samoa mai lenei fa’ama’i, ua fa’ailoa e le Ofisa Sili, e 2,000 mea faigaluega fa’apitoa o lo’o i ai e siaki ai tagata malaga mai fafo.
