OMAI UA LAVA TOU TAPENAGA – TA’ITA’IFONO NEOC ULU
Tusia: Tusiga Taofiga
O fautuaga ma tu’ualalo tu’usa’o na fa’aleoina e nisi o Ofisa Maualuluga a le Malo i Tusitala ma le Au Fa’asalalau, mo le fa’aleleia atili o a latou auaunaga.
O atugaluga o tusitala ma le au fa’asalalau na fa’avae i le tuai ona tali le aufaigaluega a le Malo i mataupu e fesiligia ai so latou finagalo, peita’i na tali le Ta’ita’ifono o le Komiti o Fa’alavelave Fa’afuase’i ia Ulu Bismarck Crawley ma ia fautuaina ai i latou nei, ina ia tautuanā, fa’atino muamua se su’esu’ega i mataupu ta’itasi e fa’alautele ai o latou silafia nai lo le fa’amoemoe tasi i se fa’amatalaga itiiti e tu’uina mai e le aufaigaluega a le Malo.
Saunoa Ulu e fa’apea;
“A outou malamalama lelei i Ta’iala, Faiga Fa’avae ma Tulafono a le Malo, e faigofie fo’i ona malamalama lelei i le taumafai atu a le aufaigaluega a le Malo. O nisi taimi e fesiligia ai e tusitala ma le au fa’asalalau Sui o le Malo, o ai e ona tiute ia, o ai e faia galuega nei, e lē ma’imaua se taimi i na fesili faigofie, ae mafai ona maua pe a e alu e su’esu’e. O tusitusiga ānoa, sa’o ma fa’amaoni, o le tusitala lena e lava lana su’esu’ega ma telē lona silafia i le mataupu o lo’o ia talanoa aga’i i ai.”
I tima’iga a le Minisita o Feso’ota’iga ma Fa’amatalaga Vavave Fa’aneionapo, Afamasaga Lepuia’i Rico Tupa’i, na ia toe fa’amanatu ai i tusitala le tāua o le sa’o o le fa’aāogaina o le gagana.
“Fa’amolemole se’i toe silasila ane i le fa’aleleia o le gagana o lo’o fa’aāogaina e molimoli ai le feau i le atunuu, auā o lau upu e avatu i le gagana peretania po’o le gagana Samoa, e teu fatu lava e le fanau, ma i’u ai ina alu fa’asapasapa ai lava le sesē o le gagana o lo’o fa’aāogaina.
Na fono fa’apipi’i le finagalo o le Ofisa Sili o le Matagaluega a le Palemia ma le Kapeneta ia Agafili Tomaimanō Shem Leo, ma ia fa’amalamalama au’ili’ili ai le fa’agasologa o galuega fa’atino a le Malo mo le fa’amatu’uina mai i tua o fa’amatalaga taualoa ma le moni auā le nofo silafia o tagata uma.
O le Matagaluega a le Palemia ma le Kapeneta, o le ogā totonugālemu lea o feso’ota’iga e tu’uina atu ai fa’amatalaga o fa’ai’uga uma a le Malo mo le silafia e le atunuu lautele tauala atu i le Vaega o le So’oupu ma le Savali (Press and Communication Divison – PCD).
O le tāua o le tapuvae tasi o feso’ota’iga e fa’alauiloa ai fa’ai’uga a Ta’ita’i o Samoa, e mautinoa ai le leai o se fetōtoa’i o auaunaga ‘ese’ese a le Malo, i fa’amatalaga ānoa ma le sa’o atoatoa ma fa’amaoni e tu’uina atu i le atunuu.
O le Vaega a le So’oupu ma le Savali (PCD), o se tasi o poutu i le vaai mamao a le Matagaluega, e ala i le mautinoa o lo’o nofo silafia Samoa i fa’amatalaga sa’o e tu’uina atu mai le Malo.
Saunoa Agafili, ina ua fa’amalosia le Poloa’iga o Fa’alavelave Fa’afuase’i i le Aso 24 o Ianuari 2020, o Samoa le ulua’i atunuu o le Pasefika na tapu ai femalaga’iga i va’alele ma va’a a lalo fa’avaomalo, afua i le fonotaga a le Komiti o le National Security a Samoa.
I lena taimi, e le’i moemoenoa le Malo, e ala i le taulogologo, fa’amanatu ma fa’alauiloa ia Samoa atoa, tulaga o le fa’ama’i oti mata’utia, e aofia ai ma puipuiga tauala atu i le Vaega a le So’oupu ma le Savali e pei ona fa’avaeina i le tausaga e 1904.
I fa’amaumauga a le Malo mai le Koviti – 19, o lo’o manino ai, e 24 fa’asilasilaga fa’alaua’itele sa fa’asalalauina mo le Koviti – 19 (public notices), 68 pepa o fa’amatalaga (press releases), 94 fa’atalatalanoaga ma Sui o le Malo (aofia ai le 80 fa’atalanoaga ma le Palemia) – Interviews, 184 mataupu lautele a tusitala ma le au fa’asalalau sa fa’atoai atu (Media Enquiries) tusa lea ma 3 i le 4 fa’atalatalanoaga (interviews) ma pepa o fa’amatalaga (releases) i vaiaso ta’itasi.
I le au au atoa o lea folasaga, na ia toe fa’amanatu ai i Tusitala ma le Au Fa’asalalau, le aogā o le tusia o fa’amatalaga moni, sa’o atoatoa ma lē fa’aituau e lē oia ai le ta’uleleia o so’o se tasi.
I vaiaso ta’itasi e faia ai fa’atalanoaga a le Palemia ma nisi o ala fa’asalalau, o iina o lo’o fa’amalamalama manino ai e le Ta’ita’i o le Malo nisi o fesili sa tu’uina atu, fa’atasi ai ma le sa’ili mae’ae’a e so’o se Fa’auluuluga o Matagaluega o tali o mataupu e tu’uina atu, ona fa’atoā tali mai lea o fesili ina ia mautinoa le sa’o ma moni fa’amaumauga o lo’o tu’uina atu auā le fa’afogafoga a Samoa.
O nei fa’amatalaga uma mai le Malo e tu’uina atu i le atunuu ma fa’asalalauina e so’o se tusitala ma le au fa’asalalau, e aunoa ma se totogi.
Ua mae’a tu’ufa’atasia fo’i le ta’iala e lima ta’ita’iina ai le galuega a le Vaega a le So’oupu ma le Savali e i ai le Communication Strategy, ma i so’o se Matagaluega po’o Fa’alapotopotoga a le Malo e tatau ona i ai sa latou so’oupu (media liaison) e feso’ota’i ma le Vaega a le So’oupu ma le Savali (PCD) i mataupu patino i le Malo.
Peita’i ua maitau pea e le Malo, nisi o tusitusiga ua le sa’o ona lipotia ma ua fa’aituau fo’i, o le ala lea o le fa’amanatu pea a Agafili i tusitala ma le au fa’asalalau, ina ia tausisi i le fa’amaoni ma le sa’o atoatoa o tala tusia.
“O le mau a Samoa, E pala le ma’a ae lē pala le tala, e ō’ō le vao. E talatau Toga ae tala tofi Samoa.”
Na ia fa’amalosi fo’i i le Peresetene ma le Asosi o Tusitala ma le Au Fa’asalalau, ia taulamua tusitala mātutua, i a’oa’oga fa’apenei, e mautinoa ai le mautu, mausalī ma amanaia le finagalo ma le fa’asoa a Ta’ita’i o le Atunuu ma Fa’auluuluga o Matagaluega uma, auā le fa’aleleia o le galuega tau tusitala mo nei ma a taeao.
“Auā tatou te le’o omai iinei e tau le pua ma lafo atu pe lafo mai fo’i, ae ua tatou potopoto fa’atasi mai lenei taeao, ona o le pua e tau ma ula, ma o le pua lena e ulā.”
“Tatou te mulumulu aufoe, aisea, ‘aua nei pisia o tatou mata, pe afai e lau fetoa’i tatou ape foe, ae a lelei lava foe, ona faimai lea o le upu, ua foe lava pese,” o toe upu ia a le Ofisa Sili o Pulega.
