TALISAPAIA LE FA’AAOGAINA O LE GAGANA PATUPATU I FAIGA PALOTA
Tusia: Taunuuga Toatasi
O lau filifiliga i le taimi o faiga palota, e aia tutusa uma i ai tagata uma e o’o lava ia i latou e i ai a’afiaga tumau o le soifua.
Peitai, e iai nisi o i latou e po le va’ai, lea na a’e ai se tofā i le Ofisa o Faiga Palota, e saili se auala e agatutusa ai i latou e po le va’ai ona fa’atino a latou palota e aunoa ma se fa’alagolago i se isi tagata.
O le vaaiga aga’i i le lautele o i latou e i ai a’afiaga tumau o le soifua, ina ia fa’aaoga le latou aia tatau fa’aletagata soifua.
O le gagana patupatu o le gagana lea o le a fa’aaogaina e i latou e po le va’ai mo le faiga palota.
O le aso ananafi sa tu’uina atu ai e le Ofisa o Faiga Palota le avanoa i ai latou uma e i ai a’afiaga tumau o le soifua, ina ia aga’i atu ai e fa’atino a latou palota.
O le fa’aaogaina o le gagana patupatu mo le faiga palota a le atunu’u, o se fuafuaga na matua’i talisapaia e nisi o i latou e po le va’ai.
E pei ona fa’aalia e Lumanai Talailemotu, 35 tausaga o Leauva’a e fa’apea, o lona aiga lava sa fa’alagolago i ai le taimi e fai ai le faiga palota.
“Fa’afetai i le tofā ua a’e i le Ofisa o Faiga Palota aemaise o le Malo mo le fuafuaga matou te fa’aaoga ai le gagana patupatu e fa’atino ai a matou palota.
“O lona uiga o le a le toe i ai se isi e alu fua i le mea o le a ou iai. O le a le toe valaau foi la i se leoleo e sau e va’ai po’o sa’o, auā o lea o le a fa’afaigofie, e ala i le fa’aaogaina o le gagana patupatu.”
Sa taua foi e Laumanai e fa’apea, e ‘ese’ese uma tagata ma o latou lagona, e ‘ese’ese foi fesoaosoani sa matou fa’aaogaina e fa’atino ai le matou filifiliga.
Ae ua talafeuga lelei lea fa’amoemoe mo le aga’i i luma, ina ia fa’afaigofie ai mo matou e po le va’ai ona fa’atino le matou palota saoloto e aunoa ma se fa’alagolago i se isi, sa fa’aalia e Lumanai.
E fa’apea foi se manatu mai se tasi o tamā ia Vaaiti Ah Sang, 58 tausaga le matua o Nuusuatia.
“E taua tele le galuega o lo o fa’atino e le Ofisa o Faiga Palota e u’unaia ai pea le fa’amaoni i le fa’atinoga o lata palota. Auā o le faiga filifiliga a le atunu’u, e aia tutusa uma iai tagata ina ia fa’atino lata palota, e o’o lava ia matou lea e i ai a’afiaga tumau o le tino.
“Ae fa’afetai i le Malo ma le tofā ua a’e e fa’atino ai lea fa’amoemoe, ina ua unaia pea le sa’olotoga o lata filifiliga i le tagata o lo o mana’o iai.
“O se fa’amoemoe foi ua talafeuga lelei mo le aga’i i le lumana’i, ina ia tausisia ai pea le saoloto o i latou e i ai a’afiaga tumau i le soifua, e fa’atino ai a latou filifiliga sa’oloto e aunoa ma se tau fa’asino atu e le i si tagata. Auā o lau ma la’u filifiliga e patino lava ia oe ma a’u.
“Auā afai tatou te mananao e lilo le faiga o tatou palota ina ia aua ne’i iloa atu e isi, o le mea lea e tatau ona fai. Seivagana ai pe a fai e fai sota to’alua ma lata fanau, o tagata la ia te ia e mafai ona fesoasoani i le taimi lea. Ae mo le aga’i i le lumana’i, o le fa’afetai i le Malo mo le tofā tatala, ua fa’aauau ai pea le amanaia e le Malo o lagona ma manatu o i matou lea o lo o i ai a’afiaga tumau o le soifua.”
