MATIMATI LE GALUEGA FAUFAUTUA MO LE KAPENETA
Tusia: Tusiga Taofiga
O le Pulega Faatonu (Executive Government), e atoa i ai le tafatolu fefa’atauagai o le Malo Fa’atemokarasi o Samoa, fa’atasi ai ma le Fono Aoao Faitulafono (Legislative Assembly) ma le Fa’amasinoga (Judiciary).
O le Pulega Faatonu o le itutino lea o le Malo e ta’imua i le fa’atinoina o fa’aiuga ma faiga fa’avae talafeagai, mo le lumana’i manuia o Samoa ma ona tagata.
Peita’i e fa’alagolago le atoatoa ma le ‘ānoa o fa’aiuga a le Kapeneta, i le fautuaga ma le tu’ualalo a le aufaigaluega a le Malo, fa’atasi ai ma le fa’atinoga pe a pāsia aloaia se mataupu.
O le sefulu ai nei o tausaga, talu ona faia le Fonotaga a Sui o Matagaluega, Fa’alapotopotoga Tuma’oti a le Malo, Ofisa Fa’afa’avae ma Ofisa Tuto’atasi (Cabinet Liaison Officers Forum), e soālaupule ai mataupu ‘ānoa ma le loloto, auā le tu’ufa’atasia o fautuaga aloaia ma le atoatoa mo le fausiaina o fa’aiuga a le Kapeneta auā atina’e e manuia ai Samoa ma ona tagatanu’u.
O lenei Fonotaga sa ta’imua ai le Matagaluega o le Palemia ma le Kapeneta, ma le manulauti, o le fa’aleleia atili o galuega fai a Itutino uma o Auaunaga a le Malo auā le tu’ufa’atasia o fautuaga i le Kapeneta mo le fausia ma le fa’amaonia o Faiga Fa’avae a le Malo auā fa’amanuiaga mo le atunuu lautele e pei ona fa’asoa ai le aufaigaluega sa auai.
Na saunoa le Ofisa Sili o Pulega o le Matagaluega a le Palemia ma le Kapeneta, Agafili Tomaimanō Shem Leo, o lenei fonotaga e toe matimati ma fili tupe toa ai le tofā ma le uta a le aufaigaluega a le Malo, auā o le latou matāfaioi lea o le tautuaina o le Kapeneta.
O Sui o Matagaluega, Fa’alapotopotoga Tuma’oti, Ofisa Fa’afa’avae ma Ofisa Tuto’atasi, o i latou nei ua potopoto fa’atasi, e fa’asoa ma fetufaa’i i manatu ‘ānoa e saga fa’amalosia ai Faiga Fa’avae o lo’o fa’atino ma aiaia ai galuega fa’akapeneta aemaise le Malo.
So’o se pepa lava o fa’amatalaga e tu’ufa’atasia e se Itutino o le Malo, ma tu’uina atu i le Kapeneta e ta’ua o le PK – Pepa i le Kapeneta, e tatau ona tapenaina i lona tulaga atoatoa ma ia mautinoa e le’o fa’atumutumulima mataupu nei ma mau fa’avae e lagolagoina ai lea mataupu auā le talanoaina ma toe tu’uina mai ai se Fa’ai’uga a le Kapeneta – FK e lomia i le pepa samasama, mo le fa’amalosia ma fa’atinoina loa.
Na faailoa e Agafili, o lenei fonotaga e su’eina uma i luga ma’a, e fofola le fala ma fefa’asoaa’i, ina ia mautinoa le malamalama lelei o Sui uma o Itutino ‘ese’ese o le Malo, i la latou matāfaioi tauave mo le auaunaga i le Malo ma Samoa aoao.
Auā e lē mafai ona mautu se fa’ai’uga ‘ānoa ma le atoatoa, pe a le tonu, fa’amaoni ma sa’o fa’amatalaga e tu’uina atu e ala i le tautua a le aufaigaluega a le Malo, mo le iloiloina ma soālaupuleina e le Kapeneta auā ana fa’ai’uga fai.
A’o le lelei o fautuaga ma tu’ualalo e tu’uina atu i Ta’ita’i o le Malo, o le si’itia maualuga fo’i lena o le tele o atina’e lelei ma auaunaga a le Malo e fa’atinoina i lona tulaga silisili ona maualuga ma fiafia i ai latou e fa’aāogaina.
O ia atina’e e aofia ai le eletise, suāvai, auala, auaunaga tetele a le Malo, e aofia ai ma le Soifua Maloloina fa’apea A’oa’oga ma isi.
So’o se auaunaga lava e i ai ona lu’itau ma fa’afitauli, ma o le isi vala lena o lo’o mata’itu ma le toto’a e le Aufaigaluega a le Malo, ina ia mafai ona fa’aleleia atili ma si’itia ai le tautua mo Ta’ita’i o le Malo aemaise le atunuu atoa.
